ތައިލެންޑަށް ކުރިމަތިވި ފެންބޮޑުވުމުގެ ކާރިސާއާ ގުޅިގެން ރައީސް ތަޢުޒިޔާ ފޮނުއްވައިފި

ތައިލެންޑަށް ބޯކޮށް ވާރޭވެހި، ފެންބޮޑުވުމުގެ ސަބަބުން އެ ޤައުމަށް ލިބުނު ބޮޑެތި ގެއްލުންތަކާއި އެތައް ބައެއްގެ ފުރާނަ ގެއްލުމާ ގުޅިގެން، ރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ތައިލެންޑުގެ ބޮޑުވަޒީރު އަނުތިން ޗާންވިރަކުލްއަށް މިއަދު ތަޢުޒިޔާގެ މެސެޖެއް ފޮނުއްވައިފިއެވެ.

ދިވެހި ސަރުކާރާއި ރައްޔިތުންގެ ނަމުގައި ރައީސް ފޮނުއްވި މި މެސެޖުގައި، ޤުދުރަތީ މި ހިތާމަވެރި ހާދިސާގައި ބައެއްގެ ފުރާނަ ގޮސް، ގިނަ ބައެއްގެ ގެދޮރު ގެއްލުމަކީ ނުހަނު ކަންބޮޑުވެވަޑައިގަންނަވާ ކަމެއްކަން ވަނީ ފާހަގަކުރައްވާފައެވެ. އަދި މި އުނދަގޫ ދަނޑިވަޅުގައި ތައިލެންޑުގެ ރައްޔިތުންނާއި، ސަރުކާރާއި، ބޮޑުވަޒީރަށް ފުރިހަމައަށް ހަމްދަރުދީވާކަމަށް އެމަނިކުފާނު ވިދާޅުވިއެވެ.

މީގެ އިތުރުން، މި ކާރިސާގައި އެކިވަރުގެ އަނިޔާތައް ލިބުނު މީހުންނަށް އަވަސް ޝިފާއަކަށް އެދިވަޑައިގެން، މީހުން ސަލާމަތްކުރުމަށާއި ހާލުގައި ޖެހުނު ފަރާތްތަކަށް އެހީތެރިކަން ފޯރުކޮށްދިނުމަށް މިހާރު ކުރިއަށްގެންދާ އޮޕަރޭޝަންތައް އެއްވެސް ހުރަހަކާނުލައި ކާމިޔާބުކަމާ އެކު ނިމިގެންދާނެކަމަށް އުންމީދުކުރައްވާކަމުގައި ވެސް ރައީސްގެ މެސެޖުގައި ބަޔާންކުރައްވާފައިވެއެވެ.

ބެންކޮކް މެޓްރޮޕޮލިޓަން އެޑްމިނިސްޓްރޭޝަނުން މަޢުލޫމާތު ދީފައިވާ ގޮތުގައި، މި ހިނގާ މަހުގެ މެދުތެރެއިން ފެށިގެން ތައިލެންޑުގެ ވެރިރަށަށް ކުރިމަތިވި ފެންބޮޑުވުމުގެ އެކިއެކި ހާދިސާތަކުގައި މިހާތަނަށް 8 މީހަކު ވަނީ މަރުވެފައެވެ. އަދި މިކަމުގެ ނޭދެވޭ އަސަރު 329،000 އަށްވުރެ ގިނަ އާއިލާއަކުން ގާތްގަނޑަކަށް 7 ލައްކަ މީހުންނަށް ކޮށްފައިވާކަމަށް އެ އިދާރާއިން ރިޕޯޓުކޮށްފައިވެއެވެ.