އައު އުފެއްދުންތަކަކާ އެކު ހޮޓެލް އޭޝިއާ މައުރަޒުގައި އެސްޓީއޯ ބައިވެރިވެއްޖެ

"ހޮޓެލް އޭޝިއާ" މައުރަޒުގައި، ވިޔަފާރީގެ ގިނަ ދާއިރާތަކެއް ތަމްސީލުކުރުމަށާއި އައު އުފެއްދުންތަކެއް ދައްކާލުމުގެ ބޭނުމުގައި ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ)އިން ބައިވެރިވެއްޖެއެވެ.

ހުޅުމާލޭ ސިންތެޓިކް ޓްރެކްގައި މި މަހުގެ 30ވަނަ ދުވަހުގެ ނިޔަލަށް ކުރިއަށްދާ މި އަހަރުގެ މައުރަޒުގައި އެ ކުންފުނިން މައިގަނޑު ގޮތެއްގައި ދައްކާލުމަށް ހަމަޖެހިފައި ވަނީ އެސްޓީއޯ އެނާޖީ، އެސްޓީއޯ ޕީޕަލްސް ޗޮއިސް އަދި ޖެނެރަލް ޓްރޭޑިންގގެ އުފެއްދުންތަކާއި ހިދުމަތްތަކެވެ. އަދި ހަމައެހެންމެ، މުޅިން އައު ބްރޭންޑެއް ބާޒާރަށް ނެރުމަށް ތާވަލުކޮށްފައިވާއިރު، މި އުފެއްދުން ބޭނުންކޮށްގެން ތައްޔާރުކުރާ ފޮނިކާތަކެއްޗާއި އައިސްކްރީމްގެ ރަހަ ބަލައިލުމުގެ ފުރުސަތު މައުރަޒަށް ޒިޔާރަތްކުރާ ފަރާތްތަކަށް ލިބިގެންދާނެއެވެ.

އެސްޓީއޯގެ ހާއްސަ ސްޓޯލުން ގިނަ ކަންތައްތަކެއް ތަޖުރިބާކޮށްލުމަށް ވަނީ މަގުފަހިކޮށްދީފައެވެ. އޭގެ ތެރޭގައި، ސުޕަމާކެޓުން ލިބެން ހުންނަ ބާވަތްތައް ބޭނުންކޮށްގެން ވަގުތުން ތައްޔާރުކުރާ ލުއިކާނާގެ ސްޓޭޝަނަކާއި، މައުރަޒު ކުރިއަށްދާ ތިން ދުވަހު ކޮފީ ސްޓޭޓްގެ ބައެއް ބުއިންތައް ހިލޭ ލިބޭނެ އިންތިޒާމު ހިމެނެއެވެ. މީގެ އިތުރުން ވެސް، ކުންފުނިން އެތެރެކުރާ އިލެކްޓްރޯނިކްސް ސާމާނާއި އަސާސީ ކާބޯތަކެތި ދައްކާލުމަށް ބަހައްޓާފައި ހުންނާނެއެވެ.

ފަތުރުވެރިކަމުގެ ދާއިރާއަށް އަމާޒުކޮށްގެން، ރިސޯޓުތަކަށް ތެޔޮ ފޯރުކޮށްދިނުމުގެ ހިދުމަތާ ގުޅޭ މައުލޫމާތު އެސްޓީއޯ އެނާޖީގެ ފަރާތުން ހިއްސާކުރުމަށް ވަނީ ހަމަޖެހިފައެވެ. އަދި މި ހިދުމަތްތަކާ މެދު ކަސްޓަމަރުންގެ ބޭނުންތައް ހުރިގޮތް ދެނެގަތުމުގެ މަސައްކަތް ވެސް އެ ސްޓޯލްގައި ކުރިއަށްދާނެ ކަމަށް އެ ކުންފުނިން މައުލޫމާތުދެއެވެ.

މައުރަޒަށް ޒިޔާރަތްކުރާ އާންމުންނަށް ހާއްސަކޮށްގެން އަގުހުރި އިނާމުތަކެއް ލިބޭ ޕްރޮމޯޝަންތަކެއް ވެސް އެސްޓީއޯއިން ވަނީ ފަށާފައެވެ. އެގޮތުން، ސްޓޯލްގައި ނަންނޯޓުކުރާ ފަރާތްތަކުގެ މެދުގައި ކޮންމެ ދުވަހަކު ގުރުއަތުލައިގެން ހޮވޭ ފަރާތަކަށް ހަދިޔާ ދިނުމަށް "ރެޖިސްޓަރ އެންޑް ވިން"ގެ ނަމުގައި ހަރަކާތެއް ކުރިއަށް ގެންދާނެއެވެ. ހަމައެއާ އެކު، އެސްޓީއޯ ޕީޕަލްސް ޗޮއިސްގެ ސޯޝަލް މީޑިއާ ޕޭޖު ފޮލޯކުރާ ފަރާތްތަކަށް އަމާޒުކޮށްގެން ބާއްވާ "ފޮލޯ އެންޑް ވިން" ޕްރޮމޯޝަންގެ ނަސީބުވެރިއަކަށް ޑިޝްވޯޝަރެއް ލިބޭނެކަމަށް ވެސް އެ ކުންފުނިން ވަނީ ބުނެފައެވެ.