ވިޔަފާރީގެ މަޝްވަރާތައް ކުރިއަށްދާއިރު އިންޑިއާ އާއި ޖީސީސީން އަމާޒުހިފާފައިވަނީ ފުރިހަމަ ނަފާ ހޯދުމަށް
ނިއުދިއްލީ: އިންޑިއާގެ ޚާރިޖީ ވުޒާރާއިން ހޮނިހިރު ދުވަހު ބުނެފައިވާ ގޮތުގައި، އިންޑިއާ އާއި ގަލްފް ކޯޕަރޭޝަން ކައުންސިލް (ޖީސީސީ) އާ ދެމެދު އެކުލަވާލެވޭ ފްރީ ޓްރޭޑް އެގްރީމަންޓް (އެފްޓީއޭ) ނުވަތަ މިނިވަން ވިޔަފާރީގެ އެއްބަސްވުމުގެ ސަބަބުން ދެފަރާތުގެ ވިޔަފާރީގެ ފުރިހަމަ ނަފާ ހޯދޭނެއެވެ.
މިނިވަން ވިޔަފާރީގެ އެއްބަސްވުމެއް އެކުލަވާލުމަށް ޖީސީސީ އާއި އިންޑިއާއިން ފުރަތަމަ ފެށި މަސައްކަތް ހުއްޓިފައި އޮންނަތާ ވިހި އަހަރު ފަހުން، މިއަހަރުގެ ފެބްރުއަރީ މަހު އަލުން ވަނީ މަޝްވަރާތައް ފަށާފައެވެ. އަދި މިހާރު ވަނީ މިކަމާ ގުޅޭ މަޝްވަރާތައް ކުރިއަށް ގެންދާނެ ގޮތުގެ 'ޓާމްސް އޮފް ރެފަރެންސް' ގައި ދެފަރާތުން ސޮއިކޮށްފައެވެ.
ނިއުޔޯކުގައި ކުރިއަށްދާ އދ. ގެ އާންމު މަޖިލީހުގެ ހަވާސާގައި ހުކުރު ދުވަހު ބޭއްވި ބައްދަލުވުމެއްގައި ވެސް މި ވިޔަފާރީގެ އެއްބަސްވުމާ ގުޅޭގޮތުން ވަނީ ވާހަކަދެކެވިފައެވެ. މި ބައްދަލުވުމުގައި އިންޑިއާގެ އެކްސްޓާނަލް އެފެއާޒް މިނިސްޓަރު އެސް ޖައިޝަންކަރުގެ އިތުރުން ސައުދީ އަރަބިއްޔާގެ މިނިސްޓަރ އޮފް ސްޓޭޓް ފޯ ފޮރިން އެފެއާޒް އާދިލް އަލް-ޖުބައިރު އަދި ޖީސީސީގެ ސެކްރެޓަރީ ޖެނެރަލް ޖާސިމް މުޙައްމަދު އަލް-ބުދައިވީ ފަދަ ގަލްފުގެ އިސް އޮފިޝަލުން ބައިވެރިވެވަޑައިގަތެވެ.
އިންޑިއާގެ ޚާރިޖީ ވުޒާރާއިން ނެރުނު ބަޔާނެއްގައި ބުނެފައިވަނީ، މިއެއްބަސްވުމުގައި ސޮއިކުރުމުން އިންޑިއާ އާއި ޖީސީސީގެ ވިޔަފާރީގެ ފުރިހަމަ ގާބިލުކަން ހާމަވެ، މުޅި ދުނިޔޭގެ ލާބަޔަށް ކުރެވޭ މަސައްކަތްތަކަށް އިތުރު ބާރެއް ލިބިގެންދާނެ ކަމަށް އެ ފަރާތްތަކުން ފާހަގަކުރެއްވި ކަމަށެވެ. އަދި އޭގެ ސަބަބުން އެކްސްޕޯޓު ފުޅާވެ، ސިންދަފާތުވުމަށް މަގުފަހިވެ، ދެ ފަރާތުގެ އިގުތިސާދީ ގުޅުން އިތުރަށް ބަދަހިވެގެންދާނެ ކަމަށްވެސް އެ ބަޔާނުގައި ބުނެފައިވެއެވެ.
ޖީސީސީ އާއި އިންޑިއާއާ ދެމެދު ކުރެވުނު ވިޔަފާރީގެ އަގު 2025-26 ގެ މާލީ އަހަރުގައި 178 ބިލިއަން އެމެރިކާ ޑޮލަރަށްވުރެ މައްޗަށް އަރާފައިވާއިރު، ގަލްފު ސަރަހައްދުގައި އިންޑިއާގެ 10 މިލިއަނެއްހާ ރައްޔިތުން ދިރިއުޅެމުންދާކަން ފާހަގަކޮށްލެވެއެވެ.
ޖީސީސީ ސެކްރެޓޭރިއަޓުން ނެރުނު ބަޔާނެއްގައި ބުނެފައިވަނީ، މިނިވަން ވިޔަފާރީގެ އެއްބަސްވުމުގެ މަޝްވަރާތައް ފެށުމަކީ އިގުތިސާދީ އަދި އިންވެސްޓްމަންޓުގެ ފުރުސަތުތައް ފުޅާކުރުމަށް އެޅޭ ވަރަށް މުހިންމު ފިޔަވަޅެއް ކަމަށެވެ. މި ބައްދަލުވުމުގައި އަލް-ބުދައިވީ ވަނީ، ހަކަތަ، ޓެކްނޮލޮޖީ، އީޖާދީ މަސައްކަތްތައް އަދި ޑިޖިޓަލް ޓްރާންސްފޯމޭޝަން ފަދަ ދާއިރާތަކުން ގުޅުން ބަދަހިކުރުމުގެ މުހިންމުކަމަށް އަލިއަޅުއްވާލައްވާފައެވެ.
އިންޑިއާއިން މިހާރުވެސް ވަނީ ޖީސީސީގެ ދެ މެމްބަރު ގައުމު ކަމަށްވާ އޮމާނާއި ޔޫއޭއީ އާއެކު ކޮމްޕްރިހެންސިވް އިކޮނޮމިކް ޕާޓްނާޝިޕް އެގްރީމަންޓް (ސެޕާ) ގާއިމުކޮށްފައެވެ. މިއީ މިދިޔަ އަހަރު އަދި 2022 ވަނަ އަހަރު ސޮއިކުރެވުނު އެއްބަސްވުންތަކެކެވެ.
ތަކްޝަޝީލާ އިންސްޓިޓިއުޝަންގެ ރިސާޗް އެނަލިސްޓް، ވަންޝިކާ ސަރާފް އަރަބް ނިއުސްއަށް މައުލޫމާތު ދެއްވަމުން ވިދާޅުވީ، ޖީސީސީއާއެކު ވެވޭ މިނިވަން ވިޔަފާރީގެ އެއްބަސްވުމުގެ ސަބަބުން ނިއުދިއްލީއަށް ބޮޑެތި ފައިދާތަކެއް ލިބިގެންދާނެ ކަމަށެވެ. އޭގެ ތެރޭގައި އިންޑިއާގެ އެކްސްޕޯޓުތަކަށް ބާޒާރުގައި ފަހި ފުރުސަތުތައް ލިބުމާއި، ސަޕްލައި ޗެއިންތަކާ ގުޅުން ބަދަހިވުމުގެ އިތުރުން އިންޑިއާގެ ހުނަރުވެރި މަސައްކަތްތެރިންނާއި ޚިދުމަތްތަކަށް އިތުރު ފުރުސަތުތައް ތަނަވަސްވުން ހިމެނޭކަން އޭނާ ފާހަގަކުރެއްވިއެވެ.
ޖީސީސީގައި ހަ ގައުމު ހިމެނޭއިރު، އެ ޖަމާއަތުގެ ބޮޑުކަމުން އެކަނިވެސް މިއެއްބަސްވުމުގެ މުހިންމުކަން ހާމަވާކަމަށް އޭނާ ވިދާޅުވިއެވެ. އަދި ކަސްޓަމްސްގެ އިޖުރާއަތްތަކާއި، އުފެއްދުންތަކުގެ އަސްލު ކަނޑައަޅާ ގަވާއިދުތަކާއި އަދި ރެގިއުލޭޓަރީ މިންގަނޑުތަކުގައި އެއްގޮތްތަކެއް ގެންގުޅުމަށް މިއެއްބަސްވުމުން މަގުފަހިވާނެ ކަމަށްވެސް އޭނާ ވިދާޅުވިއެވެ. އާންމުގޮތެއްގައި މިނިވަން ވިޔަފާރީގެ އެއްބަސްވުންތަކުގެ ފައިދާ އިންޑިއާގެ މެޝިނަރީ، ޓެކްސްޓައިލް، އަދި ގަހަނާ އުފައްދާ ސިނާއަތްތަކަށް ލިބުނު ކަމުގައިވިޔަސް، ގަލްފު ސަރަހައްދަށް ބަލާއިރު ދަނޑުވެރިކަމާއި ޕްރޮސެސްކޮށްފައިވާ ކާބޯތަކެތި، ބޭހުގެ ބާވަތްތަކާއި މެޑިކަލް އާލާތްތައް، އަދި ޚިދުމަތް ދިނުމުގެ ދާއިރާތަކަށް "މާބޮޑެތި ފައިދާތަކެއް" ފެނިގެންދާނެ ކަމަށް ސަރާފް ވިދާޅުވިއެވެ.
"ޖީސީސީއަކީ އިންޑިއާއާއެކު އެންމެ ފުޅާ ދާއިރާއެއްގައި ވިޔަފާރިކުރާ އެއް ޖަމާއަތް. ވަކިވަކި ގައުމުތަކަށް ބަލާއިރުވެސް، އިންޑިއާގެ ދުނިޔޭގެ ވިޔަފާރީގެ ބައިވެރިންގެ ތެރެއިން ޔޫއޭއީ އޮތީ ތިންވަނައިގައި، އަދި ސައުދީ އަރަބިއްޔާ އޮތީ ފަސްވަނައިގައި،" ސަރާފް ވިދާޅުވިއެވެ. "އެހެންކަމުން، މިއަހަރުގެ ކުރީކޮޅު އިންޑިއާ އާއި ޖީސީސީގެ އެފްޓީއޭގެ މަޝްވަރާތައް ރަސްމީކޮށް ފެށުމަށް ނިންމި ނިންމުމަކީ، މި އިގުތިސާދީ ގުޅުމުގެ ބޮޑު ބައެއް މުއައްސަސީ އޮނިގަނޑެއްގެ ތެރެއަށް ގެނައުމަށް އިންޑިއާއަށް ލިބޭ ވަރަށް ބޮޑު ފުރުސަތެއް."
