ދަރިވަރުންނަކީ އިލްމީ ތެދުވެރިކަމާއި ނަފުސުގެ އަހުލާގު އިސްކުރާ ބަޔަކަށް ވާންޖެހޭ: މިނިސްޓަރު ހީނާ
ދަރިވަރުންނަކީ ހަމައެކަނި މައުލޫމާތުން މުއްސަނދި ބަޔަކަށް ވުމުގެ ބަދަލުގައި، އިލްމީ ތެދުވެރިކަމާއި ނަފުސުގެ އަހުލާގު އިސްކުރާ ނަމޫނާ ބަޔަކަށް ވުމަށް ހެރިޓޭޖް މިނިސްޓަރު ހީނާ ވަލީދު މިއަދު އިލްތިމާސްކުރައްވައިފިއެވެ.
މިނިސްޓަރު އެފަދައިން ގޮވާލެއްވީ މިއަދު ވިލާ ކޮލެޖްގެ މިއަހަރުގެ ދަސްވެނިވުމުގެ ފުރަތަމަ ދަންފަޅީގައި ހިންގުމުގެ ދާއިރާ، އުނގަންނައިދިނުމާއި ކިޔަވައިދިނުމުގެ ދާއިރާއިން ސަނަދު ހާސިލުކުރި ދަރިވަރުންގެ ދަސްވެނިވުން ޝަރަފުވެރިކޮށްދެއްވައި ވާހަކަފުޅުދައްކަވަމުންނެވެ.
މިނިސްޓަރުގެ ވާހަކަފުޅުގައި ފިކުރީ ވިސްނުންތަކާ އިލްމީ ސިކުނޑިތަކެއް އުފަންކޮށްގެން ހަމައެކަނި ފުދެން ނެތްކަން ފާހަގަކުރައްވާ، ގައުމަކަށް ބޭނުންވަނީ ހަރުދަނާ އަހުލާގީ ގިޔަމްތަކެއްގެ މަތީގައި ތިބޭ ބަޔެއްކަމަށް ވިދާޅުވިއެވެ. އެގޮތުން ބޭނުންވަނީ އިންސާނީ ކަރާމާތަށް ހުރުމަތްތެރިކޮށް ހިތާ، އެކަކު އަނެކަކުގެ ހިޔާލަށް އިހުތިރާމްކުރުމާއި، ކޮންމެ ކަމެއްގެވެސް ހަގީގަތް ބެލުމާ، ތިމާފަދަ އަނެކުންނަށްވެސް އިހުތިރާމް ކުރުމުގެ ތަހުޒީބީ ސިފަތައް އަށަގަނެފައިވާ ބައެއްކަމަށެވެ.
އަދި އިލްމު ހާސިލްކުރާ ފަރާތްތައް އެފަދަ ސިފަތަކުގެ ނަމޫނާއަށް ވާންޖެހޭކަމަށް މިނިސްޓަރު ހީނާ ވިދާޅުވިއެވެ. އެގޮތުން ގައުމެއްގައި އިލްމީ ރޫހެއް ބިނާކޮށް ފިކުރީ ވިސްނުންތަކެއް އާލާކުރެވެނީ އެ ގައުމެއްގެ ތަރުބަވީ ނިޒާމާ ތައުލީމީ ނިޒާމުގެ ތެރެއިންކަމުގައިވާއިރު، އިލްމީ ރޫހެއް އުފައްދާ އީޖާދީ އަދި ފިކުރީ ވިސްނުންތަކެއްގެ މަތީގައި ގައުމެއް ދެމެހެއްޓުމުގެ އެންމެ ބޮޑު އެއް މަސްއޫލިއްޔަތެއް އެޅިފައި ވަނީ ތަރުބިއްޔަތު ކުރުމާ އުނގަންނައިދިނުމުގެ ދާއިރާގެ ބޭފުޅުންގެ އިސްތަށިފުޅުގައިކަން ވެސް މިނިސްޓަރު ފާހަގަކުރެއްވިއެވެ.
އެހެންކަމުން ގައުމު އެއް ޖީލުން އަނެއް ޖީލަށް ނަގަހައްޓައިދޭ އެއް ބަޔަކީ އެ ގައުމެއްގައި އުނގަންނައިދިނުމުގެ ދާއިރާގެ ބޭފުޅުންކަން ވަޒީރު ފާހަގަކުރެއްވިއެވެ. އޭގެ އިތުރަށް އިލްމީ މީހުންގެ ގޮތުގައި މުޖުތަމައުގެ ތެރެޔަށް ނުކުންނައިރު، މައުލޫމާތުގެ މުއްސަނދިކަމާއި އެއްވަރަށް، އިލްމީ ތެދުވެރިކަމާއި ނަފުސުގެ އަހުލާގުގެ މުހިއްމުކަން ވަޒީރު ފާހަގަކުރެއްވިއެވެ.
އަދި ހާސިލުކުރާ ސަނަދަކީ ހަމައެކަނި ލިޔުމެއް ނޫންކަމާއި، އެ މަސްއޫލިއްޔަތު އަދާކުރުމަށް ލިބިފައިވާ ހުނަރުގެ ބޭނުންކޮށް ޤައުމަށް ހިދުމަތްކުރެއްވުމަށް ވެސް މިނިސްޓަރު ގޮވާލެއްވިއެވެ.
