އައްޑޫ ސިޓީގެ ކަރަންޓުގެ ޚިދުމަތް ސްޓެލްކޯގެ ބެލުމުގެ ދަށަށް
ސަރުކާރުން ފެނަކަ ކޯޕަރޭޝަން އުވާލުމަށް ނިންމެވުމާ ގުޅިގެން، ހުޅުދޫ އާއި މީދޫ ވެސް ހިމެނޭހެން އައްޑޫ ސިޓީގެ ކަރަންޓުގެ އެންމެހައި ކަންކަން ރަސްމީ ގޮތުން ސްޓެލްކޯއާ ހަވާލުކޮށް، އެ ކުންފުނިން ޚިދުމަތް ދޭން ފަށައިފިއެވެ.
އައްޑޫގެ ގުޅިފައިވާ ރަށްތަކުގެ ކަރަންޓު ވިއުގައާ ސްޓެލްކޯއިން އިއްޔެ ހަވާލުވެފައިވާއިރު، ވަކިން އޮންނަ ހުޅުދޫ އަދި މީދޫގެ އިންޖީނުގެތަކާ އެ ކުންފުނިން ހަވާލުވީ މިއަދު ބޭއްވި ޚާއްޞަ ރަސްމިއްޔާތުތަކެއްގައެވެ. މި ރަސްމިއްޔާތުގައި ސްޓެލްކޯގެ މެނޭޖިންގ ޑިރެކްޓަރ ޑރ. ޢަލީ އަޒުވަރު ޤައުމީ ދިދަ ނަންގަވައިދެއްވިއިރު، އެ ކުންފުނީގެ ދިދަ ނަންގަވައިދެއްވީ ޑެޕިއުޓީ މެނޭޖިންގ ޑިރެކްޓަރ ޢާއިޝަތު މުޒްނާއެވެ. އޭގެ ފަހުން، މި ދެ ރަށުގެ އިންޖީނުގޭގެ އޮޕަރޭޝަންތައް ކުރިއަށްދާ ގޮތް އިސްވެރިން ވަނީ ބައްލަވާލައްވައި، ޚިދުމަތްތައް އިތުރަށް ހަރުދަނާކުރުމާ ގުޅޭގޮތުން މަޝްވަރާކުރައްވާފައެވެ.
ހަތްހާހެއްހާ މީހުންގެ އާބާދީއެއް އޮންނަ ހުޅުދޫ އަދި މީދޫއަކީ ފާއިތުވި އަހަރުގެ ޑިސެމްބަރު މަހުން ފެށިގެން އިދާރީ ގޮތުން ވަކި ދެ ރަށުގެ ގޮތުގައި ކަނޑައަޅާފައިވާ ދެ ރަށެވެ. މީގެ ކުރިން މުޅި އައްޑޫއަށް ފެނަކައިން ކަރަންޓު ދެމުން އައި ނަމަވެސް، އެ ކުންފުނީގެ އެންމެހައި ޒިންމާތައް ސްޓެލްކޯގެ ދަށަށް ބަދަލުކުރުމަށް ސަރުކާރުން ވަނީ ދާދި ފަހުން ނިންމާފައެވެ.
ހިތަދޫ، މަރަދޫ، މަރަދޫފޭދޫ، ފޭދޫ އަދި ގަމަށް މިހާރު ކަރަންޓު ފޯރުކޮށްދެނީ އައްޑޫ ސިޓީ ސެންޓްރަލް ޕަވަރ ސްޓޭޝަނުންނެވެ. އެހެންނަމަވެސް، ކަރަންޓުގެ ޚިދުމަތަށް ދިމާވެފައިވާ ގޮންޖެހުންތަކަށް ދާއިމީ ނިމުމެއް ގެނައުމަށްޓަކައި ދުބާއީގެ ޑެފިނިޓް ސޮލިއުޝަންސް ކުންފުންޏާ ގުޅިގެން އައު އިންޖީނުގެއެއް އެޅުމުގެ ބޮޑު މަޝްރޫޢެއް މިހާރު ވަނީ ފަށާފައެވެ.
މި އައު މަޝްރޫޢުގެ ދަށުން 5.2 މެގަވޯޓުގެ ލޯ-ސްޕީޑް 5 ޖަނަރޭޓަރު ބަހައްޓައި، 26.37 މެގަވޯޓަށް ކަރަންޓު އުފެއްދުމުގެ ކެޕޭސިޓީ އިތުރުކުރެވިގެންދާނެއެވެ. އޭގެ އިތުރުން ފިޔުލް ފާމެއް ޤާއިމުކުރުމާއި، ބަންކަރިންގެ ޚިދުމަތް ފެށުމާއި، ބެލްޖިއަމްގެ ތަޖުރިބާކާރުން މެދުވެރިކޮށް މުވައްޒަފުންނަށް ތަމްރީނު ދިނުން ވެސް މި ޕްރޮޖެކްޓުގައި ހިމެނެއެވެ. ސަރުކާރުން ލަފާކުރާ ގޮތުގައި މި މުހިންމު މަސައްކަތް ނިމުމުން ކުރިއަށް އޮތް 20 އަހަރަށް އައްޑޫގެ ކަރަންޓުގެ ޑިމާންޑް ފުރިހަމައަށް ކަވަރުކުރެވޭނެއެވެ.
