ދަތުރުފަތުރުގެ އައު ޤާނޫނަށް އަމަލުކުރަން ފަށައިފި
ރާއްޖޭގެ މަގުމަތީގެ ސަލާމަތްތެރިކަން ކަށަވަރުކޮށް، އުޅަނދުފަހަރު ދުއްވުމާއި ޕާކުކުރުމުގެ ނިޒާމު ހަރުދަނާކުރުމުގެ މަޤްޞަދުގައި ރައްޔިތުންގެ މަޖިލީހުން ފާސްކޮށް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަޞްދީޤުކުރެއްވި އެއްގަމު ދަތުރުފަތުރުގެ އައު ޤާނޫނަށް މިއަދު ރަސްމީކޮށް އަމަލުކުރަން ފަށައިފިއެވެ.
މުޅިން އަލަށް އަމަލުކުރަން ފެށި މި ޤާނޫނުގެ ދަށުން މާލެ ސަރަޙައްދު ވަނީ "ރަޖިސްޓްރޭޝަން އެންޑް ޓްރެފިކް މެނޭޖްމަންޓް ކޮންޓްރޯލްޑް ޒޯނެއް"ގެ ގޮތުގައި ކަނޑައަޅާފައެވެ. މީގެ ސަބަބުން މާލެ ސަރަޙައްދުގައި ދެން އުޅަނދުތައް ރަޖިސްޓްރީ ކުރެވޭނީ ކަނޑައެޅިފައިވާ ވަކި ޚާއްޞަ ޝަރުޠުތަކެއް ފުރިހަމަވުމުންނެވެ. ހަމައެއާ އެކު، އުޅަނދުފަހަރު ބޭނުންކުރެވޭނެ އެންމެ ދިގު މުއްދަތެއްގެ ގޮތުގައި 20 އަހަރު ކަނޑައަޅާފައިވާއިރު، މި އުސޫލަށް އަމަލުކުރަން ފަށާނީ މީގެ ތިން އަހަރު ފަހުންނެވެ. އަދި ދަތުރުފަތުރުގެ ކަންކަން ބެލެހެއްޓުމަށްޓަކައި ކުރިއަށް އޮތް 3 އަހަރަށް "ގްރޭޓަރ މާލެ ޓްރާންސްޕޯޓް އެންޑް މޮބިލިޓީ އޮފީސް"ގެ ނަމުގައި އައު އިދާރާއެއް އުފެއްދުމާއި، ރައްކާތެރިކަން ކަށަވަރުކުރުމަށް "ނޭޝަނަލް ރޯޑް ސޭފްޓީ ކައުންސިލް" އެއްގެ އިތުރުން ޚާއްޞަ ފަންޑެއް އެކުލަވާލުން ވެސް މި ޤާނޫނުގައި ލާޒިމުކުރެއެވެ.
ޓްރެފިކް މައްސަލަތައް މަދުކުރުމަށްޓަކައި މި ޤާނޫނުން ވަނީ "ޑީމެރިޓް ޕޮއިންޓް" ނިޒާމެއް ތަޢާރަފުކޮށްފައެވެ. ޤަވާއިދާ ޚިލާފުވާ ފަރާތްތަކުގެ ލައިސަންސުން ޕޮއިންޓް އުނިކުރަމުން ގޮސް ވަކި މިންވަރަކަށް ދަށްވުމުން، އެ ފަރާތްތަކަށް ޖެހޭނީ ޚާއްޞަ ތަމްރީނުތަކެއް ފުރިހަމަކުރާށެވެ. މީގެ އިތުރުން، ޖޫރިމަނާއާއި ފީގެ ގޮތުގައި ދައްކަންޖެހޭ ފައިސާގެ އަދަދު 5،000 ރުފިޔާއަށްވުރެ މައްޗަށް ހިނގައްޖެނަމަ، އެ މީހެއްގެ ލައިސަންސް ހިފެހެއްޓުމުގެ ބާރު ކަމާބެހޭ ފަރާތްތަކަށް ލިބިގެންވެއެވެ. އުޅަނދު ދުއްވި މީހަކު ނޭނގޭ ޙާލަތްތަކުގައި، އުޅަނދު ވަގަށް ނަގާފައިވާކަން ސާބިތުކޮށްނުދެވޭނަމަ، އޭގެ ފުރިހަމަ ޒިންމާ ނަގަންޖެހޭނީ އުޅަނދުގެ ވެރިފަރާތުންނެވެ.
އައު ޤާނޫނުގައި މަނާކޮށްފައިވާ އިތުރު ކަންކަމުގެ ތެރޭގައި، މަގުމަތީގެ އެއް ލޭނަކުން ދެ އުޅަނދު ޖެހިޖެހިގެން ދުއްވުމާއި، ނެވިގޭޝަން ބޭނުމަށް ފިޔަވައި ފޯނު ފަދަ ތަކެތި ބޭނުންކުރުން ހިމެނެއެވެ. އަދި އުޅަނދުގެ ރަޖިސްޓްރީ ބަދަލުނުކޮށް އަދި އަހަރީ ފީ ނުދައްކައި ދުއްވުމަކީ ވެސް ޤާނޫނީ ކުށެކެވެ. މި ޤާނޫނަށް އަމަލުކުރަން ފެށުމާ އެކު، ކުރިން އޮތް 2009ވަނަ އަހަރުގެ އެއްގަމު ދަތުރުފަތުރުގެ ޤާނޫނާއި 1978ވަނަ އަހަރުގެ ހިނގާފައި އުޅޭ މީހުންނާބެހޭ ޤާނޫނު ވަނީ އުވިފައެވެ.
