ބީއެމްއެލްގެ އޭޓީއެމްތަކުން މަހަކަށް ޑޮލަރު ނެގޭނެ ލިމިޓު ކަނޑައަޅައިފި
ބޭންކް އޮފް މޯލްޑިވްސް (ބީއެމްއެލް)ގެ އޭޓީއެމްތަކުން މަހަކަށް ޑޮލަރު ނެގޭނެ ލިމިޓު ކަނޑައަޅައިފިއެވެ.
ބީއެމްއެލްއިން މިއަދު ބުނީ އެ ބޭންކުގެ އޭޓީއެމް މެދުވެރިކޮށް ކަސްޓަމަރަކަށް މަހެއްގެ މައްޗަށް ނަގުދު ފައިސާ އިން ޑޮލަރު ނެގޭ އަދަދު 3,500ޑޮލަރު ކަމުގައި ހަމަޖައްސައިފައިވާ ކަމަށާއި އެގޮތަށް މިއަދުން ފެށިގެން އަމަލުކުރަން ފަށާފައިވާ ކަމަށެވެ.
އެ ބަދަލު ގެނައި ނަމަވެސް ކާޑަކުން ދުވާލަކަށް ނެގޭ 1,600ޑޮލަރުގެ ލިމިޓަށް އެއްވެސް ބަދަލެއް ނާންނާނެކަމަށް އެ ބޭންކުން ބުންޏެވެ.
މި ނިންމުމަކީ ނަގުދު ފައިސާއަށް ބަރޯސާވާ މިންވަރު ކުޑަކޮށް، އަވަސް، ރައްކާތެރި އަދި ލުއިފަސޭހަ ޑިޖިޓަލް މާލީ ނިޒާމެއް ކުރިއެރުވުމަށް ބީއެމްއެލް އިން ގެންގުޅޭ ދުރުރާސްތާގެ ސިޔާސަތުގެ ދަށުން ނިންމާފައިވާ ނިންމުމެއް ކަމަށް ވެސް ބީއެމްއެލްއިން ބުންޏެވެ.
ބީއެމްއެލްއިން އިތުރަށް ބުނީ ނަގުދު ފައިސާ ބޭނުންކުރަން ނުޖެހި، ދުވަހުން ދުވަހަށް ބޭނުންވާ ބޭންކިން ހިދުމަތްތައް ފަސޭހަކަމާއެކު ހޯދޭނެ ޑިޖިޓަލް ވަސީލަތްތައް ގާއިމުކުރުމަށްޓަކައި ބޭންކުން މުހިންމު ބޮޑެތި އިންވެސްޓްމަންޓްތަކެއް ވެސް ކޮށްފައިވާ ކަމަށެވެ.
"އެގޮތުން ބީއެމްއެލް މޮބައިލް ބޭންކިން އަދި އިންޓަނެޓް ބޭންކިންގ މެދުވެރިކޮށް، ކޮންމެ ވަގުތަކު، ކޮންމެ ތަނެއްގައި ހުރެގެންވެސް ބިލްތަކަށް ފައިސާ ދެއްކުމާއި، ފައިސާ ޓްރާންސްފާ ކުރުމުގެ އިތުރުން އެކައުންޓްގެ އެންމެހައި މުއާމަލާތްތައް ފަސޭހަކަމާއެކު ބަލަހައްޓައި މެނޭޖްކުރެވެއެވެ. މީގެ އިތުރުން، ރާއްޖެއާއި ރާއްޖެއިން ބޭރުގެ ވިޔަފާރިތަކަށް ކާޑު މެދުވެރިކޮށް އަދި ކޮންޓެކްޓްލެސްކޮށް ފައިސާ ދެއްކުމާއި، އެކައުންޓްތަކަށް ވަގުތުން ވަގުތަށް ފައިސާ ފޮނުވުމުގެ ޚިދުމަތް ވެސް ކަސްޓަމަރުންނަށް ފަސޭހަކަމާއެކު ލިބެއެވެ"ބީއެމްއެލްއިން ބުންޏެވެ.
