ފުރަން ދިޔަ މީހެއްގެ އަތުން ވަޒަނެއްގެ ދޯރިއެއް ފެނުނު މައްސަލަ ބަލަނީ
ފުރަން ދިޔަ މީހެއްގެ އަތުން ވަޒަނެއްގެ ދޯރިއެއް ފެނުނު މައްސަލައެއް ފެންމަތިވެއްޖެއެވެ.
ފުލުހުން މިއަދު މީޑިއާތަކާ ހިއްސާކުރި މެސެޖުގައި ބުނީ ވަޒަނެއްގެ ދޯރި ފެނުނީ މިއަދު ހެނދުނު ވެލާނާ އިންޓަނޭޝަނަލް އެއާޕޯޓުގެ ޑޮމެސްޓިކް ޓާމިނަލްއިން ފުރަން ދިޔަ ދިވެއްސެއްގެ އަތުން ކަމަށެވެ.
އެ މައްސަލަ ބަލަމުންދާކަން ހާމަކޮށް ފުލުހުން ބުނީ އޭނާ ފުލުހުންގެ ބެލުމުގެ ދަށަށް ގެނެސްފައި ނުވާ ކަމަށެވެ.
އެ މައްސަލައިގެ އިތުރު ތަފްސީލެއް ފުލުހުން ނުދެއެވެ.
މީގެ ކުރިން ވެސް އެއާޕޯޓުގައި މީހުންގެ އަތުން ވަޒަން ފެނިގެން ހައްޔަރުކޮށްފައިވެއެވެ.
