އެފްޑީސީގެ ފްލެޓުތަކުން 500 އަށްވުރެ ގިނަ ފަރާތުން ޤަވާއިދުން ކުލި ނުދައްކާ
ހުޅުމާލޭގައި ސަރުކާރުން އިމާރާތްކޮށްފައިވާ "އަމާން އުދަރެސް" އަދި "އަމާން ދޯދި"ގެ ފްލެޓްތަކުގެ ތެރެއިން ފަސްސަތޭކައަށްވުރެ ގިނަ ފަރާތަކުން އެއްބަސްވުމާ އެއްގޮތަށް ގަވާއިދުން ކުލި ނުދައްކާކަން ފަހި ދިރިއުޅުން ކޯޕަރޭޝަން (އެފްޑީސީ)އިން ހާމަކޮށްފިއެވެ.
އެ ކޯޕަރޭޝަނުން އާންމުކުރި އެންމެ ފަހުގެ މައުލޫމާތުތަކުން ދައްކާ ގޮތުގައި، މި މަޝްރޫޢުގެ ދަށުން ދޫކޮށްފައިވާ ތަންތަނުގެ ތެރެއިން ބޮޑު ބައެއްގެ ކުލި ގަވާއިދުން ލިބެމުންދެއެވެ. އެގޮތުން، 3،362 އާއިލާއަކުން ކޮންމެ މަހަކު ވެސް ބަރާބަރަށް ފައިސާ ދައްކަމުން އަންނައިރު، ކުލި ނުދައްކާ 564 ފްލެޓެއް ވާކަމަށް އެ ކުންފުނިން ބުނެފައިވެއެވެ. އަދި މިހާތަނަށް ކުލި ނުދައްކާ ފަރާތްތަކުން ވީހާ ވެސް އަވަހަކަށް އެ ފައިސާ ހަލާސްކުރުމަށް އެފްޑީސީން ވަނީ އެދިފައެވެ.
ފައިސާ ނުދެއްކުމުގެ މައްސަލައިގެ އިތުރުން، މި ޓަވަރުތަކުގައި ދިރިއުޅޭ ބައެއް ފަރާތްތަކުގެ އަމަލުތައް ހުންނަ ގޮތުން އެހެން މީހުންނަށް އުނދަގޫވާ ފަދަ ކަންކަން ކުރިމަތިވަމުންދާކަން ވެސް އެފްޑީސީން ވަނީ ފާހަގަކޮށްފައެވެ. އޭގެ ތެރޭގައި އިމާރާތުގެ އާންމު ޤަވާއިދުތަކާ ޚިލާފުވުމާއި އަޑުގަދަކުރުމުގެ ޝަކުވާތައް ހިމެނެއެވެ. މިފަދަ ދެ މައްސަލައެއް މިހާތަނަށް ބަލައި ފިޔަވަޅު އަޅާފައިވާއިރު، ކުންފުނީގެ އެންގުންތަކަށް ތަބާނުވި އިތުރު ދެ މައްސަލައެއް މިހާރު ވެސް ދަނީ ތަހުގީގުކުރަމުންނެވެ.
އެފްޑީސީން ބުނެފައިވާ ގޮތުގައި، ފްލެޓުތަކާ ގުޅޭގޮތުން ހުށަހެޅޭ ކޮންމެ ޝަކުވާއަކީ ވެސް ވަރަށް ސީރިއަސްކޮށް ބަލަމުން އަންނަ މައްސަލަތަކެކެވެ. ކުންފުނީގެ އެންމެ ބޮޑު އަމާޒަކީ ސޯޝަލް ހައުސިންގގެ ދަށުން ބޯހިޔާވަހިކަން ލިބިފައިވާ ހުރިހާ ރައްޔިތުންނަށް ވެސް އަމާން އަދި ހިތްފަސޭހަ މާހައުލެއް ކަށަވަރުކޮށްދިނުމެވެ. އެހެންކަމުން، މި މަގުސަދު ހާސިލުކޮށް، ދެމެހެއްޓެނިވި ގޮތެއްގައި މި ޚިދުމަތް ކުރިއަށް ގެންދިއުމަށްޓަކައި އެންމެހާ ފަރާތްތަކުގެ ފުރިހަމަ އެއްބާރުލުން ދިނުމަށް އެ ކުންފުނިން ވަނީ އިލްތިމާސްކޮށްފައެވެ.
