ނުރައްކާތެރިކޮށް ދުއްވާ ފަރާތްތައް ދެނެގަނެ، ކުށް ތަކުރާރުކުރާ ނަމަ ވަނަވަރު އާންމުކުރަނީ
އާންމު ރައްޔިތުންނަށް ބިރުވެރިކަން އިހުސާސްވާ ފަދަ ގޮތަކަށް މަގުމަތީގައި އުޅަނދުތައް ދުއްވާ މީހުން ހުއްޓުވައި، އެފަދަ އަމަލުތައް ތަކުރާރުކުރާ މީހުންގެ މައުލޫމާތު މީޑިއާތަކަށް ތިލަކުރުމުގެ އިތުރުން ޖިނާއީ ދައުވާކުރުމަށްޓަކައި ދިވެހި ފުލުހުންގެ ޚިދުމަތުން މުޅިން އާ ހާއްސަ އޮޕަރޭޝަނެއް ފަށައިފިއެވެ.
ފުލުހުންގެ އިދާރާއިން ހާމަކޮށްފައިވާ ގޮތުގައި، މި އާ ކެމްޕޭނުގެ މައިގަނޑު މަގުސަދަކީ މަގުމަތީގެ އަމާންކަން ނަގާލާ މީހުންގެ ވަނަވަރު ދެނެގަނެ ގާނޫނީ ގޮތުން އެންމެ ހަރުކަށި އަދަބު ދިނުމެވެ. މިގޮތުން، ފުރަތަމަ ފަހަރަށް ފުލުހަށް ހާޒިރުކޮށް ނަސޭހަތް ދިނުމަށް ފަހު، ދެވަނަ ފަހަރަށް އެ ކުށް ތަކުރާރުކޮށްފިނަމަ ހަމައެކަނި ކުރިން ކުރަމުން އައި ޖޫރިމަނާއަކުން ފުއްދާލުމުގެ ބަދަލުގައި، އިތުރު އެއްވެސް އިންޒާރަކާ ނުލައި އެ މީހަކާ ދެކޮޅަށް ޖިނާއީ ތަހުގީގެއް ފަށާނެކަމަށް ވަނީ އަންގާފައެވެ. އަދި އާދަވެގެން މިފަދަ ނުރައްކާތެރި ކަންކަން ކުރާ މީހުންގެ ފުރިހަމަ މައުލޫމާތު އާންމުކޮށް ފަޟީހަތްކުރާނެކަމުގެ އިންޒާރު ވެސް ދީފައިވެއެވެ.
މި ހާއްސަ ހަރަކާތުގެ ތެރެއިން ފުލުހުން އެންމެ ބޮޑަށް ފާރަވެރި ވާނީ، ސައިލެންސަރުގެ އަޑުގަދަކޮށްގެންނާއި، މަގުމަތީގައި ހުއްދަނެތި ރޭސްޖަހައި ސްޓަންޓު ހެދުމުގެ އިތުރުން، ބާރު ސްޕީޑުގައި ޒިގްޒެގްކޮށް ދުއްވާ އުޅަނދުތަކަށެވެ. މީގެ އިތުރުން މަސްތުވާތަކެތި ބޭނުންކޮށްގެން ހުރެ ދުއްވުމާއި، ނުރައްކާތެރި ގޮތްގޮތަށް ކުރިއަރަން މަސައްކަތްކުރުމާއި، ފުލުހުންގެ ޗެކްޕޮއިންޓުތަކުން މަޑުނުކޮށް ފިލަން އުޅޭ ފަރާތްތަކަށް ވެސް ވަރުގަދަ ފިޔަވަޅުތަކެއް އެޅުމަށް ވަނީ ހަމަޖެހިފައެވެ. މިފަދަ ކުށްތަކަށް އަރައިގަންނަ މީހުން ދުއްވާ އުޅަނދުތައް އެއް މަސްދުވަހަށް ޓޯކުރުމަށް ފަހު، އެއާ ހަވާލުވާން ނާންނަ އުޅަނދުތައް ގަވާއިދުގެ ތެރެއިން ނައްތާލެވޭނެއެވެ. އަދި ޑްރައިވަރުގެ އިތުރުން، އެ އުޅަނދެއް ރަޖިސްޓްރީކޮށްފައިވާ ވެރިފަރާތާ މެދުގައި ވެސް ގާނޫނީ ފިޔަވަޅު އެޅޭނެއެވެ.
މިއާ އެކު ފުލުހުން ފާހަގަކޮށްފައިވާ ގޮތުގައި، ސަރުކާރުގެ އެކި މުއައްސަސާތަކާއި ކުންފުނިތަކުގައި ވަޒީފާއަދާކުރާ ބައެއް ފަރާތްތަކުން ވެސް މިފަދަ އަމަލުތަކުގައި ބައިވެރިވާކަން ވަނީ ފާހަގަކުރެވިފައެވެ. އެހެންކަމުން، އެ މީހުންނާ މެދު އިދާރީ ފިޔަވަޅު އެޅުމަށްޓަކައި އެ މީހަކު ނިސްބަތްވާ އޮފީހަކަށް އެ މައުލޫމާތު ފޯރުކޮށްދެމުން ގެންދާނެއެވެ. މަގުމަތީގެ ސަލާމަތްތެރިކަން ކަށަވަރުކުރުމަށް އާންމު ރައްޔިތުންނަށް ވެސް އެހީތެރިވެވޭނެ މަގު ފަހިކޮށްދިނުމުގެ ގޮތުން، ސޯޝަލް މީޑިއާ ނުވަތަ އެހެނިހެން ގޮތްގޮތުން އާންމުން ފުލުހުންނާ ހިއްސާކުރާ ފޮޓޯއާއި ވީޑިއޯތަކުގެ ސައްހަކަން ބެލުމަށް ފަހު، އެފަދަ ހެކިތަކުގެ މައްޗަށް ބިނާކޮށް ވެސް ކުށްވެރިންނަށް ފިޔަވަޅު އަޅަމުން ގެންދާނެކަމުގެ ޔަގީންކަން ފުލުހުން ވަނީ ދީފައެވެ.
