Monday, 16 November 2026
Advertisement
MWSC — SmartMeter (leaderboard)
ޚަބަރު

ރިވިއު: ފުން އަސަރުތަކެއް ކުރުވި "ޖުންޖުލާ"

ރިވިއު: ފުން އަސަރުތަކެއް ކުރުވި "ޖުންޖުލާ"

ވީޑިއޯ ކްލަބުން މިރޭ "ޖުންޖުލާ" ބަލައިލުމަށްފަހު، މި އުފެއްދުން މިހާ ބޮޑަށް ހިތުގައި ހަރުލާނެ ކަމަކަށް ހީއެއް ނުކުރަމެވެ.

ވާހަކަ ފެށިގެން އަންނަނީ މަރަކުންނެވެ. ނަމަވެސް ހަގީގީ މިސްޓްރީއަކީ އެ މީހާ މަރުވުމުގެ ކުރިން ހިނގައިދިޔަ ކަންތައްތަކެވެ.

މި ސީރީޒް ނެރުމުގެ ކުރިން ފެނުނު ޕޯސްޓަރުތަކަށް ބަލާލާއިރު "ޖުންޖުލާ" ސިފަވަނީ ޑާކް ޕޮލިސް ތްރިލާއެއްގެ ގޮތުގައެވެ.

Advertisement
HDC — Sidebar (box)

ލީޑެއްގެ ގޮތުގައި ގެނެސްދީފައިވަނީ މަޝްހޫރު އެކްޓްރެސް ވާޝިއާ މުޙައްމަދެވެ. ވާޝިއާގެ ކެރެކްޓާ އަކީ ޒާރާއެވެ. މި ސީރީޒްގެ ފެށުން ގެނެސްދީފައިވަނީ ޒާރާގެ ކެރޭކަމާއި، މަލާމާތުގެ ރާގު އަދި އޭނާގެ މިޒާޖެވެ. ޒާރާއަކީ ގަޓު ފުލުހެކެވެ. ވާހަކައިގައި ހުންނަނީ ހަރުކަށި ކަމެކެވެ. ސާކެޒަމްއެވެ. ވާޝިއާ ވަނީ ޒާރާގެ ކެރެކްޓަރަށް އިތުރު ދިރުމެއް ގެނެސްދީފައެވެ.

<img class="alignnone size-large wp-image-332059" src="https://cdn.dhen.mv/wp-content/uploads/2026/10/6199628766447866991-2-1024x456.jpg" alt="" width="690" height="307" />

ދެން މިި އެޕިސޯޑްގައި ލީޑެއްގެ ގޮތުގައި ފެންނަނީ މަޝްހޫރު ބަތަލާ، މަރިޔަމް ނިޝާއެވެ. ނިޝާގެ ކެރެކްޓާއަކީ ޒަކިއްޔާއެވެ. މީގެ ކުރިން ގިނައިން ލޯބީގެ ރޯލުތަށް ކުޅެފައިވާ ނިޝާ، މި އެޕިސޯޑުން ފެންނަނީ ވަރަށް ތަފާތު، ކުރާނެކަމެއް ލަފާކުރަންނޭނގޭ އަދި ގަބޫލުކުރަން ދަތި މީހެއްގެ ގޮތުގައެވެ. ނަމަވެސް ވާހަކަ ކުރިއަށްދާ ވަރަކަށް، މޮޔައެއް ކަމަށް ބުނެ އެންމެން ދޫކޮށްލާ މީހާއަކީ، އެހެން މީހުން އަޅާނުލާ ދޫކޮށްލާ ކަންކަން އެންމެ ރަނގަޅަށް ފާހަގަކުރާ މީހާ ކަމުގައި ވެގެންދެއެވެ.

https://www.youtube.com/watch?v=9jyLQvqFc0A

މި އުފެއްދުމުގެ އެންމެ ފުން އަސަރެއް އެކުލެވިގެންވަނީ ޒަކިއްޔާ އާއި ހޫދުއާ ދެމެދު އޮންނަ ގުޅުމުގައެވެ. ހޫދުގެ ކެރެކްޓާ ކުޅެފައިވަނީ މުނީޒެވެ، އެމީހުން އެކުގައި ކައިބޮއި ހަދާ، އެކީގައި ހީނ މަޖާކޮށް އަދި ހިމޭންކަމާއެކު ސޯޝަލް ސެންޓަރުގެ ފާރުބުޑުގައި އިށީނދެ ތިބޭ ވަގުތުކޮޅުތަކުން، ތަހުގީގުކުރާ އަޑުގަދަ މަންޒަރުތަކަށްވުރެ މާ ފުން އިހުސާސްތަކެއް ގެނެސްދެއެވެ. ހޫދު ގިނަ ވާހަކަތަކެއް ނުދެއްކި ނަމަވެސް، އޭނާގެ ހިމޭންކަން ފަޅުކަމެއް ނުދައްކައެވެ. އޭނާގެ ކޮންމެ ހިމޭންވުމަކާއި، މޫނުމަތީގެ ކުލަވަރާއި އަދި ހަރަކާތްތަކުން ވެސް ގިނަ ވާހަކަތަކެއް ކިޔައިދެއެވެ.

އެންމެ ބޮޑަށް އަޅައިގަތް ކަމަކީ، "ޖުންޖުލާ" ގައި މި މައްސަލައަކީ ހަމައެކަނި ކުށްވެރިއަކީ ކާކުތޯ އަދި ކުށެއްނެތް މީހާއަކީ ކާކުތޯ ހޯދާ ހޯދުމަކަށް ނުހެދުމެވެ. އޭގެ ބަދަލުގައި، އަނިޔާވެރިކަމާއި، އަޅާނުލުމާއި، ނުކުޅެދުންތެރިކަމާއި، އެކަނިވެރިކަމުގެ އިތުރުން ގާނޫނާއި އިންސާފާ ދެމެދު އޮންނަ ހިތްހަމަނުޖެހޭ ފަރަގު މި އުފެއްދުމުން ދައްކުވައިދެއެވެ. ފަހު މަންޒަރުތަކާ ހަމައަށް އަންނައިރު، ޒާރާ ތަހުގީގުކުރަނީ ހަމައެކަނި މަރެއް ނޫނެވެ؛ މުޖުތަމައުއަށް ބުރައަކަށްވާ މީހުންނާމެދު މުޖުތަމައު ކަންތައްކުރާ ގޮތާ ކުރިމަތިލުމަށް އޭނާއަށް މަޖުބޫރުވެއެވެ.

ފުރަތަމަ ކޮޅުގެ ބައެއް މަންޒަރުތައް ކުރިއަށްދާ ގޮތް ތަންކޮޅެއް އޮމާންނޫންހެން ހީވި ނަމަވެސް، އަދި ޑާކް ހިއުމަރާއި އުނދަގޫ މައުޟޫއުތަކާ ދެމެދު ކުއްލިއަކަށް އަންނަ ބަދަލުތަކަށް ހޭނެން ވަގުތުކޮޅެއް ނެގި ނަމަވެސް، ވާހަކައިގެ ޖަޒުބާތީ ބައިތައް ގުޅެން ފެށުމުން، މިއަށް ނަޒަރު ހުއްޓާލަން މަޖުބޫރުވެއެވެ.

ފަހުބަޔަކީ ޔަގީނުންވެސް މި އުފެއްދުމުގެ އެންމެ ވަރުގަދަ ބައެވެ. އެއީ ފަސޭހަ ނުވަތަ ހިތްހަމަޖެހޭ ޖަވާބެއް ދިނުމަށް ދެކޮޅުހަދާ ނިމުމެކެވެ. އޭގެ ބަދަލުގައި، ބެލުންތެރިންނާ މި ސުވާލު ކުރިމަތިކުރުވައެވެ: ނިޒާމުގެ ތެރެއިން މީހަކަށް ތަކުރާރުކޮށް ނާކާމިޔާބީއާ ކުރިމަތިލާން ޖެހުމުން، ހަގީގީ އިންސާފަކީ ކޮބައިހެއްޔެވެ؟

އަދި "ފަހު ފިލާވަޅު" މި ނަމުގެ ހަގީގީ މާނަ ހާމަވެގެންދާއިރު، އުއްމީދުކުރި ވަރަށްވުރެ މާ ފުން އަސަރެއް ކުރުވައެވެ.

"ޖުންޖުލާ" އަކީ ހިތްނުތަނަވަސްކުރުވާ، ޖަޒުބާތީ އަދި ހަމަ ޔަގީނުންވެސް ވަރަށް ފުރިހަމަ ދިވެހި އުފެއްދުމެކެވެ. މިއީ ހަމައެކަނި މަރެއްގެ މިސްޓްރީއެއް ނޫނެވެ. މިއީ މީހުންނަށް ފެންނަ ކަންތައްތަކާއި، މީހުން އަޅާނުލާ ދޫކޮށްލާ ކަންތައްތަކާއި، އަދި މީހަކު ސަލާމަތްކުރަން އެއްވެސް މީހަކު ނައުމުން އޭނާއަށް ދަސްވާ ހިތްދަތި ފިލާވަޅުތަކުގެ ވާހަކައެވެ.

މިއީ ވަރަށް ވަރުގަދަ ފެށުމެކެވެ.

ރިއެކްޝަން

Advertisement
Ooredoo — Square (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.