އަމީނީ މަގު މަރާމާތަށް ޓާފް ދަނޑުން ފެށިގެން ބަންދުކޮށްފި
އަމީނީ މަގުގައި އަލަށް ތާރުއެޅި ސަރަހައްދުގައި އުފެދިފައިވާ މައްސަލަތައް ހައްލުކޮށް މަރާމާތުކުރުމަށްޓަކައި، މާފަންނު ޓާފް ދަނޑުން ފެށިގެން ކުރީގެ ހައުސިން މިނިސްޓްރީއާ ހަމައަށް އޮންނަ ސަރަހައްދު އާންމު ދަތުރުފަތުރަށް ބަންދުކޮށްފިއެވެ.
ދިވެހި ފުލުހުންގެ ޚިދުމަތުން 'އެކްސް' މެދުވެރިކޮށް އާންމުކޮށްފައިވާ ގޮތުގައި، އަމީނީ މަގުގެ ދެވަނަ ސެގްމަންޓުގެ މަސައްކަތަށް އެ ސަރަހައްދު ބަންދުކުރާތީ، އެތާނގައި ޕާކުކޮށްފައިވާ އެންމެހައި އުޅަނދުތައް މިރޭ ދަންވަރު ބާރަ ޖެހުމުގެ ކުރިން ނަގަންވާނެއެވެ. މީގެ އިތުރުން ފުލުހުން ހިއްސާކޮށްފައިވާ ޓްރެފިކް ޗާޓުން ދައްކާ ގޮތުގައި، ޓްރެފިކް ޕޮލިސް އިމާރާތުން ފެށިގެން މާފަންނު ދަނޑާ ދެމެދަށް ހަތަރު ފުރޮޅުލީ އުޅަނދުތަކަށް ނުވަދެވޭ ގޮތަށް މިހާރު ވަނީ ހަމަޖައްސާފައެވެ.
މި މަސައްކަތުގެ ތެރެއިން، ދިވެހިރާއްޖޭގެ އަޑު ހުންނަ ސަރަހައްދުގެ ހަތަރު އަނގޮޅި ކަންމަތީގައި ތާރުއަޅައި މިހާރު ވަނީ އެއްކޮށް ނިންމާލާފައެވެ. އަމީނީ މަގު ޒަމާނީ ފެންވަރަކަށް ތަރައްޤީކުރުމުގެ ބޮޑު މަޝްރޫޢަކީ ނިމިދިޔަ ރައީސް އިބްރާހީމް މުޙައްމަދު ޞާލިޙުގެ ވެރިކަމުގައި ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)އާ 84.4 މިލިއަން ރުފިޔާއަށް ހަވާލުކޮށްގެން ފެށި މަސައްކަތެކެވެ.
މި ސަރުކާރުން ވެރިކަމާ ހަވާލުވުމަށް ފަހު އަމީނީ މަގުގެ އެންމެ ފަހުގެ ބައިގައި ތާރުއަޅައި ނިންމި ނަމަވެސް، ހާބަރު ފުޑްކޯޓުތަކާ ދިމާލުން މަގުމަތީގައި ބޮޑެތި "މުލިހި" ތަކެއް އުފެދި ތާރުގަނޑު ވަނީ އުފުލިފައެވެ. މިކަމުގެ ސަބަބުން އެ މަގު ބޭނުންކުރާ އާންމު ރައްޔިތުންނަށް އިންތިހާއަށް ދަތިވެ، ސަރުކާރަށް ގިނަ ބައެއްގެ ފާޑުކިޔުންތައް އަމާޒުވުމާ ގުޅިގެން މިހާރު މި ކުރިއަށްގެންދަނީ އެ މަގު އަލުން ރަނގަޅު ފެންވަރަކަށް ހެދުމުގެ މަސައްކަތެވެ.
