އައު މާރުކޭޓް ކޮމްޕްލެކްސް އަޅާ ބިން މާދަމާގެ ނިޔަލަށް ހުސްކުރަން އަންގައިފި

މާލޭގައި ޒަމާނީ ފެންވަރުގެ މާރުކޭޓް ކޮމްޕްލެކްސެއް ތަރައްޤީކުރުމުގެ މަޝްރޫޢު ފެށުމަށްޓަކައި، މިހާރު ލޯކަލް މާރުކޭޓު ހިންގަމުންދާ ބިން ހުސްކޮށް މާދަމާގެ ނިޔަލަށް ކޮންޓްރެކްޓަރާ ހަވާލުކުރުމުގެ މަސައްކަތް މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ފަށައިފިއެވެ.

ސަރުކާރުން މި މަޝްރޫޢު ކުރިއަށްގެންދިއުމަށް މިއަހަރުގެ މާރިޗު މަހުގެ ތެރޭގައި ޓްރަސްޓެންގ މޯލްޑިވްސް ޕްރައިވެޓް ލިމިޓެޑާ ހަވާލުކުރި ނަމަވެސް، މާލެ ސިޓީ ކައުންސިލުން އެ ސަރަޙައްދު ހުސްކޮށްނުދިނުމުގެ ސަބަބުން ޢަމަލީ މަސައްކަތް ވަނީ ފަސްމަސް ދުވަހަށް ލަސްވެފައެވެ. ބިން ހަވާލުކުރުން ލަސްވުމާ ގުޅިގެން ކޮންޓްރެކްޓަރުގެ ފަރާތުން ކަންބޮޑުވުން ފާޅުކުރަމުންދާތީ، އެންމެ ފަހުގެ މުހުލަތެއްގެ ގޮތުގައި މާދަމާއަށް އެތަން ހުސްކުރަން ކަމާ ބެހޭ ވުޒާރާއިން މިހާރު ވަނީ އަންގާފައެވެ.

މި ބަދަލާ ގުޅިގެން، ތައިސޭ ކޮށީގެ ފަހަތުގައި އޮންނަ ބިމުގައި ވަގުތީ މާރުކޭޓެއް ޤާއިމުކޮށް ވިޔަފާރިވެރިންނަށް މިހާރު ވަނީ ގޮޅިތައް ދޫކުރަން ފަށާފައެވެ. ކުރީގެ މާރުކޭޓުގައި 124 ގޮޅި ހިންގި ނަމަވެސް، އައު ވަގުތީ ސަރަޙައްދުން ޖާގަ ލިބިފައި ވަނީ 96 ފަރާތަކަށެވެ. އަދި ބާކީ ތިބި 28 ވިޔަފާރިވެރިންނަށް ގޮތެއް ހަމަޖެއްސުމުގެ މަސައްކަތް ކަމާ ބެހޭ ފަރާތްތަކުން އަންނަނީ ކުރަމުންނެވެ.

ދައުލަތުގެ ބަޖެޓުން 126.4 މިލިއަން ރުފިޔާ ޚަރަދުކޮށްގެން ހަ ފަންގިފިލާއަށް އިމާރާތްކުރާ މި ކޮމްޕްލެކްސްއަކީ 15،525 އަކަފޫޓުގެ ބިމެއްގައި އަޅާ، ޖުމްލަ 95،000 އަކަފޫޓަށްވުރެ ބޮޑު ޖާގައެއް ހިމެނޭނެ ބޮޑު ބިނާއެކެވެ. މި މަޝްރޫޢު ނިމުމުން، މަސް މާރުކޭޓާއި ދަތުރުވެރިންގެ މާރުކޭޓުގެ އިތުރުން ލޯކަލް މާރުކޭޓުގެ ހުރިހާ ޚިދުމަތެއް އެއް ފުރާޅެއްގެ ދަށުން ލިބިގެންދާނެއެވެ. އެގޮތުން ވިޔަފާރިކުރުމަށް ޖުމްލަ 455 ގޮޅި މިތަނުގައި ހަދާނެއެވެ.

އަހަރަކާއި އަށް މަސްދުވަހުގެ ތެރޭގައި ނިންމަން އަމާޒު ހިފާފައިވާ މި އިމާރާތުގެ ބޭސްމަންޓް ޚާއްސަކުރެވިފައި ވަނީ 400 ސައިކަލު ޕާކުކުރެވޭނެ ޖާގައަކަށެވެ. އަދި އެންމެ މަތީ ފަންގިފިލާ ފަރުމާކޮށްފައި ވަނީ ކެއިންބުއިމުގެ ޚިދުމަތްދޭ ފުޑް ކޯޓެއްގެ ގޮތުގައެވެ. މި މަޝްރޫޢުގެ މައިގަނޑު މަޤުޞަދަކީ މާލޭގެ ބާޒާރުމަތި ތަރުތީބުކޮށް، މަގުތަކާއި ބަނދަރު ޒަމާނީ ފެންވަރަކަށް ބަދަލުކޮށް، ޚިދުމަތް ހޯދާ ފަރާތްތަކާއި ދޭ ފަރާތްތަކަށް ލުއިފަސޭހަ މާޙައުލެއް ޤާއިމުކުރުމެވެ.