އެންއައިސީ އަށް ގާސިމް އައްޔަން ކުރަން ކޮމިޓީން ރުހުންދީފި
ނޭޝަނަލް އިންޓެގްރިޓީ ކޮމިޝަން (އެންއައިސީ) އަށް ޅ.ނައިފަރު ނިކަގަސްދޮށުގެ، ގާސިމް އަބްދުލްކަރީމް އައްޔަން ކުރަން ރައްޔިތުންގެ މަޖިލީހުގެ މިނިވަން މުއައްސަސާ ކޮމިޓީއިން ފާސްކޮށްފި އެވެ.
އެންއައިސީ ގެ މަގާމެއް ހުސްވެފައި މިވަނީ އެ ކޮމިޝަންގެ ރައީސް ކަމުގައި ކުރިން ހުންނެވި އަހުމަދު ސުލައިމާން އެކޮމިޝަނުން ވަކިކުރުމުންނެވެ.
ގާސިމް ގެ ނަން އެމަގާމަށް ފޮނުއްވީ ރައީސް އިބްރާހިމް މުޙައްމަދު ޞާލިޙެވެ.
ގާސިމް އާއި އިންޓަވިއު ކުރުމަށްފަހު މިނިވަން މުއައްސަސާ ކޮމިޓީއިން ވަނީ އޭނާއަށް ރުހުން ދިނުމަށް ފެންނަ ކަމަށް މި މަހުގެ 14 ވަނަ ދުވަހު ފާސްކޮށްފައެވެ. އޭނާގެ ނަން ކޮމިޓީއިން ފާސްވީ ވޯޓު ދެއްވި 11 މެމްބަރުންގެ ތެރެއިން 10 މެމްބަރުންގެ އަގުލަބިއްޔަތުންނެވެ.
މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ގެ ބޮޑު ޚިޔާނާތް ފަޅާ އަރުވާލީ ވެސް ގާސިމް އަބްދުލްކަރީމް އެވެ. އެއިރު އޭނާއަކީ ބީއެމްއެލްގެ ފ. ނިލަންދޫ ބްރާންޗުގެ މެނޭޖަރެވެ.
"ވިސްލް ބްލޯވިން" އުސޫލާ ހިލާފަށް ގާސިމް ބީއެމްއެލްގެ ކަސްޓަމަރެއްގެ މައުލޫމާތު ހާމަކުރުމުގެ ކުށުގައި އޭނާ އަށް މަހާއި 12 ދުވަހަށް ޖަލަށްލި އެވެ. ހުކުމް ތަންފީޒުކޮށް ނިމުުމުން، އޭނާ ދޫކޮށްލާފައި ވަނީ 2016 ވަނަ އަހަރުގެ ނޮވެމްބަރު މަހުގެ 17 ވަނަ ދުވަހުއެވެ.
