އެމެރިކާ-މެކްސިކޯ ބޯޑަރ: 545 ކުއްޖަކާ މައިންބަފައިންވަނީ ދުރުކޮށްފަ
އެމެރިކާއާއި މެކްސިކޯއާއި ދެމެދުގައި އޮންނަ ބޯޑަރު ހުރަސްކޮށް، ވަގަށް އެމެރިކާއަށް އެތެރެވި މީހުންގެ ތެރެއިން 545 މީހެއްގެ ދަރިން، އެމީހުންގެ މައިންބަފައިންނާ ދުރުވެފައިވާ ކަމަށް ރިޕޯޓްތައް ބުނެފިއެވެ.
ބޭރުގެ މީޑިޔާތަކުން ބުނެފައިވަނީ 2017 ވަނަ އަހަރާއި 2018 ވަނަ އަހަރާއި ދެމެދުގައި އެމެރިކާގެ ރައީސް ޓްރަންޕް އޭރު ގެންގުޅުއްވި ހަރުކަށި ބޯޑަރު ސިޔާސަތުގެ ދަށުން ވަގަށް އެމެރިކާއަށް އެތެރެވާ މީހުންގެ ދަރިންނާއި އެމީހުން ވަކި ކުރެއެވެ. އަދި މިގޮތަށް ވަކިކޮށްފައި، ހަމައެކަނި މައިންބަފައިން އެމެރިކާއިން ޑީޕޯޓްކޮށްލައެވެ. އަދި އެކުދިން ކޮންމެވެސް އެޑޮޕްޝަން އެޖެންސީއަކާ ހަވާލު ކުރެއެވެ.
ދަރުމައަށް މަސައްކަތް ކުރާ ޖަމިއްޔާތަކުން އެމެރިކާގެ އެންމެ މަތީ ކޯޓަށް ހުޅަހެޅި، މިގޮތަށް ކުދިންނާއި މައިން ބަފައިން ދުރުކުރި މައްސަލަ މިހާރު ނިމިފައިވާއިރު، ކޯޓުންވަނީ، މި ކުދިން ހޯދާ މިކުދިންގެ އަސްލު މައިންބަފައިންނަށް ހަވާލު ކުރުމަށް ކޯޓު އަމުރެއް ނެރެފައެވެ.
މިއަމުރުގެ ދަށުން މިހާތަނަށް އެތައް ހާސް ކުދިންނެއް އެކުދިންގެ މައިން ބަފައިންނާ ހަވާލުކޮށްފައިވާއިރު، މިހާތަނަށް 545 ކުއްޖެއްގެ މައިންބަފައިން ނުފެންނަ ކަމަށް ރިޕޯޓްތައް ބުނެފައެވެ. އަދި މިކުދިންގެ މައިންބަފައިން ފެންނަންދެން އެކުދިން ތިބޭނީ ސަރުކާރުގެ ބެލުމުގެ ދަށުގައި ކަމަށްވެސް ރިޕޯޓްތައް ބުނެފައެވެ.
އެމެރިކާގެ ރިޔާސީ އިންތިޚާބު މިހާ ކުޑަތަން ވެފައިވާ ދަނޑިވަޅެއްގައި މިފަދަ މައްސަލައެއް ފެންމަތިވުމުން، އެމެރިކާގެ މިހާރުގެ ރައީސް ޑޮނާލްޑް ޓްރަންޕް ދެވަނަ ދައުރަކަށް އައުމަށް ކުރަމުން އަންނަ މަސައްކަތަށް ގިނަ ގޮން ޖެހުންތަކަކާ ކުރިމަތިލާން ޖެހޭނެއެވެ.
