"ދިވެހިން ބޭނުންވުމުން އިސްލާމްދީނުގެ ހުކުމްތައް ބަދަލެއް ނުކުރެވޭނެ"
ދިވެހިން ބޭނުންވީ ކަމުގައި ވިޔަސް އިސްލާމްދީނުގައި އޮންނަ ހުކުމެއް ބަދަލުނު ކުރެވޭނެ ކަމަށް ވިދާޅުވެ ގިނަ ދީނީ އިލްމުވެރިން ކަންބޮޑުވުން ފާޅު ކުރައްވައިފިއެވެ.
ޔުނިވާސަލް ޕީރިއޮޑިކް ރިވިއު (ޔޫޕީއާރު) ގެ ތިންވަނަ ސައިކަލްގައި މިރޭ ތަގުރީރު ކުރައްވަމުން އޭޖީ ރިފްއަތު ވިދާޅުވީ، ރާއްޖޭގައި މަރުގެ އަދަބު ދިނުން މަޑުޖައްސާފައި އޮތް އޮތުން ދަމަހައްޓާނެ ކަމަށާއި ނަމަވެސް މަރުގެ އަދަބު އުވާލެވޭނީ ދިވެހި ރައްޔިތުންގެ މަޝްވަރާ ހޯދައި، ރައްޔިތުން އެގޮތަށް ބޭނުންވާނަމަ ކަމަށެވެ.
ބަންޑާރަ ނައިބުގެ މި ވާހަކަފުޅާ ގުޅިގެން ގިނަ ދީނީ އިލްމުވެރިން ވަނީ ނުރުހުން ފާޅުކޮށްފައެވެ.
މި މައްސަލައާ ގުޅިގެން ޝެއިޚް އިލްޔާސް ވިދާޅުވީ ކިތަންމެ ގިނަ ބަޔަކު އެދުނަސް، މާތްﷲގެ ޤާނޫނު ބަދަލު ނުކުރެވޭނެކަން ނޭނގުމަކީ ޖާހިލުކަމުގެ އަލާމާތެއް ކަމަށާއި ގަދަބަސް ނުބުނެ، ކިބުރުވެރިކަމާއި ބޮޑާކަން ދޫކޮށް އަވަހަށް ތައުބާވުން ބުއްދިވެރި ކަމަށެވެ.
ޝެއިޚް އަލީ ޒައިދު ވެސް ވަނީ މަރުގެ އަދަބު ދިނުމުގެ މައްސަލައިގައި ދިވެހި ރައްޔިތުން ތާއީދުކުރާނީ އިސްލާމްދީނުގައި އެކަން އައިސްފައިވާ ގޮތަށް ކަމަށް ޔަގީންކުރައްވާ ކަމަށް ވިދާޅުވެފައެވެ.
"ޤިސާސްގެ ހުކުމަކީ ކީރިތި ގުރުއާނު ގެ ނައްސުން ސާބިތު މުޅި އުންމަތް އިޖުމާއު ވެފައިވާ މައްސަލައެއް. އެއީކީ ޚިޔާލު ހޯދަން ޖެހޭނެ ކަމެއް ނޫން! އޭގެ ހުރިހާ ޝަރުތެއް ވާޖިބު ވެއްޖެނަމަ އެހުކުމް ދެމެހެއްޓުމަކީ ވެރިންގެ މައްޗަށް ވާޖިބެއް!" ޝެއިޚް އަލީ ޒައިދު ކުރެއްވި ޓްވީޓެއްގައި ވިދާޅުވިއެވެ.
މި މައްސަލައާ ގުޅިގެން ޝެއިޚް ޑރ. އިޔާޒް ވިދާޅުވީ ދިވެހި ރައްޔިތުން ބޭނުންވި ނަމަވެސް މާތްﷲ ކަނޑައަޅުއްވާފައިވާ ހުކުމަކަށް ބަދަލު ނުގެނެވޭނެ ކަމަށެވެ.
އިލްމުވެރިންގެ އިތުރުން ގިނަ އަދަދެއްގެ އާންމުންވެސް އަންނަނީ އޭޖީގެ ވާހަކައާ ގުޅިގެން ނުރުހުން ފާޅު ކުރަމުންނެވެ.
Ads by STO
