ޖޯޖިއާގެ ފަރަގު ކުޑަކޮށްފި، ޓްރަމްޕް ކުރީގައި އުޅެނީ އެންމެ 1500 ވޯޓުން
އެމެރިކާގެ ރިޔާސީ އިންތިހާބުގެ ނަތީޖާއަށް މުޅި ދުނިޔެ މި އަންނަނީ އިންތިޒާރު ކުރަމުންނެވެ. ރިޔާސީ އިންތިހާބުގެ އިލެކްޓޮރަލް ވޯޓުގެ ނަތީޖާއިން ދައްކާ ގޮތުގައި އަދިވެސް އެންމެ ކުރީގައި އުޅެނީ ޑިމޮކްރެޓް ކެންޑިޑޭޓް އަދި އެމެރިކާގެ ކުރީގެ ނައިބު ރައީސް ޖޯ ބެއިޑަން އެވެ.
އިންތިހާބުގެ ޕޯލްސް ބަންދު ކުރިތާ 3 ދުވަސް ވާން ކައިރި ވެފައިވާއިރު އަދިވެސް ނަތީޖާ ނުލިބޭ 6 ސްޓޭޓެއް އެބައޮތެވެ. އެއީ ޕެލްސިލްވޭނިޔާ (20 އިލެކްޓޯރަލް ވޯޓް)، ޖޯޖިޔާ (16 އިލެކްޓޯރަލް ވޯޓް)، ނޯތް ކެރޮލައިނާ (15 އިލެކްޓޯރަލް ވޯޓް)، އެލަސްކާ (3 އިލެކްޓޯރަލް ވޯޓް) އަދި ނެވާޑާ (6 އިލެކްޓޯރަލް ވޯޓް)އެވެ.
މިވަގުތު 264 އިލެކްޓޯރަލް ވޯޓާއެކު ކުރީގައި އޮތް ބެއިޑަން އަށް މިއިން ކޮންމެ ސްޓޭޓެއް ކާމިޔާބު ކުރެވުނު ނަމަވެސް ރައީސް ކަމަށް އިންތިހާބު ވެގެންދާނެއެވެ.
ރިޕޯޓުތައް ބުނާ ގޮތުގައި މިވަގުތު 99 އިންސައްތަ ވޯޓު ގުނާ ނިމިފައިވާ ޖޯޖިއާ ސްޓޭޓް ބެއިޑެން ކާމިޔާބު ކުރުން ވަރަށް ގާތެވެ. ޖޯޖިއާގައި ޓްރަމްޕް މިވަގުތު ކުރީގައި އޮތީ 1500 އަށް ވުރެ މަދު ވޯޓުގެ ތަފާތަކުންނެވެ. މިވަގުތު 2,448,056 ވޯޓާއެކު ޓްރަމްޕް ކުރީގައި އޮތްއިރު ބެއިޑެން އަށް ލިބިވަޑައިގެންފައި ވަނީ 2,446,577 ވޯޓެވެ.
މި ސްޓޭޓް އަދި ރިޔާސީ އިންތިހާބު ކާމިޔާބު ކުރުމަށް ބެއިޑެން އަށް ބޭނުންވަނީ އެންމެ 1479 ވޯޓެވެ. ޖޯޖިއާގައި 40 ހާޙަށް ވުރެ ގިނަ ވޯޓު އަދި ގުނައި ނުނިމެއެވެ.
އެމެރިކާގެ އިންތިޚާބީ ޤަވާއިދުގެ މަތިން ރައީސް ކަމަށް ކުރިމަތި ލައްވާ ކެނޑިޑޭޓަކު ޖުމްލަ 270 އިލެކްޓޯރަލް ކޮލެޖް ވޯޓް ހޯއްދަވަން ޖެހެއެވެ. މިހާތަނަށް އިޢުލާން ކޮށްފައިވާ ވޯޓްތަކުން ދައްކާ ގޮތުގައި ޓްރަންޕަށް ލިބިވަޑައިގެންފައި ވަނީ، 214 އިލެކްޓޯރަލް ވޯޓް އެވެ. އަދި ބެއިޑަން އަށް 264 އިލެކްޓޯރަލް ވޯޓާއެކު ކުރީގައި އުޅުއްވާއިރު އިންތިޚާބު ކާމިޔާބު ކުރަން އެމަނިކުފާނަށް ދެން ބޭނުން ވަނީ ހަ އިލެކްޓޯރަލް ކޮލެޖް ވޯޓެވެ.
