"ކޮވިޑް ތެރޭގައި ތިބަލަނީ ހޮސްޕިޓަލް ވިއްކާލަން ، 2022 އަށް މައިމީހާގެ ފައްޓަރުބައި ވެސް ތައްޔާރަށް ބާއްވާތި!"
ކޮވިޑްގެ މި ބަލިމަޑުކަމުގެ ދުވަސްވަރުގައި ވެސް ސަރުކާރުން ބަލަނީ ބަލި މީހުންނަށް ފަރުވާ ދޭ ، ދަރުމަވަންތަ ހޮސްޕިޓަލް ވިއްކާލުމަށް ކަމަށާއި 2022 އަށް މައިމީހާގެ ފައްޓަރުބައި ވެސް ތައްޔާރަށް ބޭއްވުމަށް އިދިކޮޅު ޕީއެންސީގެ ނައިބު ރައީސް އަދި ކުރީގެ ޔޫތު މިނިސްޓަރު މުޙައްމަދު ޙުސައިން ޝަރީފް (މުންދު) ވިދާޅުވެއްޖެއެވެ.
ދައުލަތުގެ ބަޖެޓަށް ފައިސާ ހޯދުމަށް ދަރުމަންތަ ހޮސްޕިޓަލް "ވިއްކާލުމަށް" ސަރުކާރުން ތައްޔާރުވަމުންދާ މިދަނޑިވަޅުގައި މުންދު ކުރެއްވި ފޭސްބުކް ޕޯސްޓެއްގައި ވިދާޅުވީ ސަރުކާރުން ފައިސާ ހޯދަން ބޭނުންވީމާ ، ވިއްކާލަން ތަންތަން ބެލިއިރު ފެނުނީ ދަރުމަވަންތަ ހޮސްޕިޓަލް ކަމަށެވެ.
"ބޭކާރު ވެގެން ، ޚަރަދު ބޮޑުވެގެން ،ކޮރަޕްޓްވެގެން ، ދޮރުތައް ކުޑަވެގެން ،ކޮޓަރިތައް ބޮޑުވެގެން އުޅުނު ރައީސް ޔާމީން އެޅުއްވި ދަރުމަވަންތަ ހޮސްޕިޓަލް ބަޖެޓަށް ލާރިކޮޅެއް ބޭނުންވީމަ ވިއްކާލަނީ ، ލާރި ހޯދަން ސަރުކާރުގެ އެސެޓްތައް ބެލީމަ ފެނުނީ މިތަން" މުންދު ވިދާޅުވިއެވެ.
މީގެ އިތުރުން މުންދު ވަނީ ދަރުމަވަންތައާ ގުޅުވައިގެން އެމްޑީޕީން ކުރިން ދެއްކި ވާހަކަތަކަށް ވެސް ރައްދު ދެއްވާފައެވެ. އެގޮތުން ދަރުމަވަންތަ ހޮސްޕިޓަލްގެ އަގަކަށް 600 މިލިއަން ޔޫއެސް ޑޮލަރަށް ވުރެ މަތީ އަގެއް ސަރުކާރުން ކަނޑައަޅުއްވާފައިވާތީ މުންދު ވަނީ އެކަން ފާހަގަ ކުރައްވާފައެވެ.
"އަންނި ބުނިއެއްނު އެތަނަކީ އަސްލު 200 މިލިއަންއަށް އެޅޭ ތަނެކޭ، ބާކީ އެއީ ކޮރަޕްޝަނޭ" މުންދު ވިދާޅުވިއެވެ.
ދަރުމަވަންތަ ހޮސްޕިޓަލް މޯގޭޖްކޮށް ލޯނު ނެގުމަށްޓަކައި ފިނޭންސް މިނިސްޓަރ އަމީރު މިހާރު ވަނީ ދަރުމަވަންތަ ހޮސްޕިޓަލްގެ އަގުމަގު ކުރުމަށް އެދި ހައުސިން މިނިސްޓަރ މުޙައްމަދު އަސްލަމަށް ސިޓީއެއް ފޮނުވާފައެވެ. އެގޮތުން އެތަނުގެ އަގެއް ކަމަށް އަމީރު ލަފާކޮށްފައި ވަނީ 600 މިލިއަން ޑޮލަރެވެ.
Ads by STO
