ގެއްލެން އުޅުނު ކަޅުވަކަރު މިސްކިތް އަލުން ހުޅުވުމަކީ ލިބުނު ބޮޑު ކާމިޔާބީއެއް: މިނިސްޓަރ ޔުމްނާ
ކުރީގެ ސަރުކާރުން ރޫޅާލާ، މާލެއިން ބޭރުކުރަން އުޅުނު ކަޅުވަކަރު މިސްކިތް އަލުން ހުޅުވުމަކީ ލިބުނު ބޮޑު ކާމިޔާބީއެއް ކަމަށް މިނިސްޓަރ އޮފް ކަލްޗާ އެންޑް ހެރިޓޭޖް ޔުމްނާ މައުމޫނު ވިދާޅުވެއްޖެއެވެ.
ރާއްޖެ އިސްލާމްވި ދުވަހާއި ގުޅިގެން ކަޅުވަކަރު މިސްކިތް މިއަދު ރަސްމީކޮށް ހުޅުވާފައިވާއިރު، މިރަސްމިއްޔާތުގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙާއި ދައުލަތުގެ ބައެއް އިސްވެރިން ބައިވެރިވެ ވަޑައިގެންނެވިއެވެ.
ކަޅުވަކަރު މިސްކިތް ކުރިން ހުރި ސަލްޓަންޕާކުގައެވެ. ނަމަވެސް ކުރީ ސަރުކާރުގައި އެތަން ރޫޅާލާ، އެތަނުގައި ވަނީ އައިސް ސްކޭޓް ކުރެވޭ ގޮތަށް ވިންޓަރ ތީމް ޕާކެއް އަޅާފައެވެ.
ކަޅުވަކަރު މިސްކިތް އަލުން ހުޅުވުމުގެ ރަސްމިއްޔާތުގައި ވާހަކަ ދައްކަވަމުން މިނިސްޓަރ ޔުމްނާ ވިދާޅުވީ، އެމިސްކިތް ކުރިން ރޫޅާލުމަކީ އެކަމަނާ ވަރަށް ހިތްހަމަޖެހި ވަޑައިނުގަތް ކަމެއްކަމަށެވެ. އެއިރު އެކަމަނާ ހުންނެވީ ހެރިޓޭޖް ޑިޕާޓްމެންޓު ހިންގެވުމާ ހަވާލުވެގެންނެވެ. އެމަގާމުން ކުރީގެ ސަރުކާރުގައި އިސްތިއުފާ ދެއްވީ މިސްކިތް ރޫޅާލުމުން ކަަމަށް ވެސް މިނިސްޓަރ މިއަދު ވިދާޅުވި އެވެ.
"ސަގާފީ ތަރިކަ ރައްކާތެރި ނުކުރެވޭ ގޮތަށް އެތަނުގައި ހުރުމުގެ ބޭނުމެއް ނެތް ކަމަށް އަޅުގަނޑަށް ފާހަގަކުރެވުނީ،" މިނިސްޓަރ ޔުމްނާ ވިދާޅުވި އެވެ.
ކަޅުވަކަރު މިސްކިތް މިހާރު ބަހައްޓާފައި ވަނީ، ދާރުލް އާސާރާ ޖެހިގެން އޮތް، ދިރާގުގެ ހެޑް އޮފީސް ކުރިން ހުރި ބިމާއި ސަލްޓަން ޕާކުން ބައެއް ނަގައިގެން ކަނޑައަޅާފައިވާ ސަރަހައްދެއްގައެވެ.
"އަޅުގަނޑު ވަރަށް އުފާކުރަން މިއަދު މި މަގާމުގައި ހުންނަން ފުރުސަތު އަޅުގަނޑަށް ދެއްވީތީ، ރައީސަށް ޝުކުރު ދަންނަވަން. ހަގީގަތުގައި ވެސް ވަރަށް ބޮޑު ކާމިޔާބީއެއް. މިއީ، ގެއްލިގެން އެހެން ތަނަކަށް ދާން އުޅުނު މިސްކިތެއް،" ހެރިޓޭޖް މިނިސްޓަރ ޔުމްނާ ވިދާޅުވި އެވެ.
