އޭއެފްސީ ބްރެކެޓް ޗެލެންޖު: ސެމީ ފައިނަލްގެ ވޯޓުލުން ހުޅުވާލައިފި، އަވަހަށް ދަގަނޑޭއަށް ވޯޓު ލައްވާ!
އޭޝިއާގެ ފުޓްބޯޅައިގެ މައި އިދާރާ އޭއެފްސީއިން ކުރިއަށް ގެންދާ ، އޭއެފްސީ ކަޕްގެ އެންމެ މޮޅު ގޯލް ހޮވާ މުބާރާތުގައި “އޭއެފްސީ ބްރެކެޓް ޗެލެންޖު”ގެ ވާދަވެރި ސެމީ ފައިނަލުގެ ވޯޓުލުން ހުޅުވާލައިފިއެވެ. ވޯޓުލުން ހުޅުވާލައިފައިވަނީ މިއަދު މެންދުރު 1:00ގައެވެ.
ދިވެހިރާއްޖޭގައި މިހާތަނަށް އުފެދުނު އެންމެ މޮޅު ފުޓުބޯޅަ ކުޅުންތެެރިޔާ އަލީ އަޝްފާގު ދަގަނޑޭ ސެމީ ފައިނަލުގައި ވެސް ވާދަކުރާނީ އޭނާ ކުއާޓާ ފައިނަލުގައި ވެސް ވާދަކުރި ގައުމު، ވިއެޓްނާމްގެ ކުޅުންތެރިއަކާއެވެ. އޭނާ އަކީ ވިއެޓްނާމްގެ ހަނޯއީ އެފްސީގެ ގުޔެން ގުއެންޑް ހައި އެވެ. މީގެ ކުރިން ވެސް މި ޗެލެންޖުގައި ދަގަނޑޭ ވާދަ ކޮށްފައި ވަނީ އާބާދީ ބޮޑެތި ގައުމުތަކުގެ ކުޅުންތެރިންނާއެވެ. އެގޮތުން ކުވައިތުގެ ރޮޖަރީނިއޯ އަދި ބަންގްލަދޭޝްގެ އަބްރާނީއާ ވާދަކޮށް ވެސް ދަގަނޑޭ ވަނީ ކާމިޔާބު ހޯދާފައެވެ.
މި ޗެލެންޖުގެ ކުއާޓާ ފައިނަލު ވެސް ވަރަށް ފޯރިގަދައެވެ. ދަގަނޑޭ ކުއާޓާ ފައިނަލުގައި ވެސް ވާދަ ކުރީ ވިއެޓްނާމްގެ ހަނޯއީ އެފްސީއަށް ކުޅެމުން އަންނަ އެގައުމުގެ ކުޅުންތެރިޔާ ގުއެން ވެންކުއާ ދެކޮޅަށެވެ. ކުއާޓާ ފައިނަލު ދަގަނޑޭ ކާމިޔާބު ކުރީ ކުޑަ ތަފާތަކުންނެވެ. އެގޮތުން ޗެލެންޖުގެ ވޯޓު ލުމުގެ ވަގުތު ހަމަވި އިރު ޕޯލްގެ ޖުމުލަ ނަތީޖާގައި ދަގަނޑޭއަށް ލިބުނީ 51.45 އިންސައްތަ ވޯޓެވެ. އަދި ގުއެން ވެންކުއަށް ލިބިފައިވަނީ 48.55 އިންސައްތަ ވޯޓެވެ.
ޗެލެންޖުގައި ވާދަކުރުމަށް ހޮވާފައިވާ ދަގަނޑޭގެ ލަނޑަކީ ހިތްގައިމު ލަނޑެކެވެ. ދަގަނޑޭގެ ކޮއްޓުމުގެ މޮޅު ހުނަރު ހަމައެކަނި އެލަނޑުން ވެސް ސާބިތުވެގެން ދާނެއެެވެ. މި ލަނޑު އޭނާ ޖެހީ 2013 ވަނަ އަހަރު ނިއުރޭޑިއެންޓްގެ ޖާރޒީގައި އިންޑޮނޭޝިއާގެ ޕެރިސިބޯއާ ދެކޮޅަށެވެ. އެ ޓީމުގެ މުޅި ޑިފެންސް ފޫ އަޅުވާލުމަށްފަހު މި ލަނޑު ދަގަނޑޭ ކާމިޔާބު ކުރީ ކީޕަރު ކައިރިން ވެސް ކަޓުވާފައެވެ. އެތައް ޑިފެންޑަރުންނެއް ކައިރީގައި ޖައްސާފައި ތިބި އިރުވެސް ނުހަނު ހަމަޖެހިލާފައި ފަހަރަކު ކުޅުންތެރިއެއްގެ ގާތުން ނައްޓާލާފައި ޖެހި މި ގޯލަކީ ދިވެހި ކޮންމެ ރައްޔިތެއްގެ ވެސް ގައިން ހީބިހި ނަގައިގެންދާ ގޯލެކެވެ. ކިތަންމެ ފަހަރަކު ބެލި ކަމުގައި ވިޔަސް ފޫއްސެއް ނުވާނެ ކަން ޔަގީނެވެ.
ކުއާޓާ ފައިނަލު ވެސް ދަގަނޑޭ ކާމިޔާބު ކުރީ ދިވެހީން އަތާއި އަތް ގުޅާލައިގެން ކުރި ބުރަ މަސައްކަތުންނެވެ. ސެމީ ފައިނަލުގައި ވެސް އާބާދީ ބޮޑު ވިއެޓްނާމްގެ މައްޗަށް ކުރި ހޯދައި ދަގަނޑޭ މި ޗެލެންޖުގެ ފައިނަލަށް ގެންދިއުމަށް އަވަހަށް ވޯޓު ލާން ފަށާށެވެ. އެކުވެރިންނާއި ދަންނަހާ މީހަކަށް ވެސް ދަގަނޑޭއަށް ވޯޓު ދިނުމަށް ހަނދާން ކޮށްދޭށެވެ.
