މަޑުއްވަރީއަށްފަހު ތިމަރަފުށި: "އަމީރު" ގެ ދަށުން ދިރިއުޅޭ އެކަހެރި މުޖުތަމަޢުގެ ހައިރާންވާ ފަދަ ކަންތައްތަކެއް

މިދިޔަ އަހަރުގެ ނޮވެމްބަރު 21 ވަނަ ދުވަހުގެ ރޭ ލަނޑާ ނަގަން ނުކުމެ އުޅުނު ރ.މަޑުއްވަރީ ބައެއްގެ މެދުގައި ޖެހުނު މައްސަލައާއި އެކަމާ ގުޅިގެން ހިނގައިދިޔަ ކަންތައްތަކަކީ މުޅި ރާއްޖެއަށް ސިހުން ގެނައި ކަންތައް ތަކެކެވެ.

Ads by MWSC

އެދޯނީގައި ތިބި މީހުންނަށް ކޮންމެ ވެސް ކަމެއްގައި "ބައިޢަތު" ނުހިފުމުން މަޑުއްވަރީ ފެހިއަލި ހައްމާދަށް ވަނީ "މަރުގެ ހުކުމް" އިއްވާފައެވެ. ވަގުތުން ވަގުތަށް ހުކުމް ތަންފީޒް ކުރުމަށް އޭނާއަށް ހަމަލާ ދިނެވެ، ނަމަވެސް އޭނާ ފަތާފައި މާޅޮހަށް އަރާ ފަރުވާ ލިބި ސަލާމަތް ވިއެވެ.

މިކަންތައްތަކާ ގުޅިގެން ފުލުހުން ވަނީ ހައްދު ފަހަނަ އެޅުމާ ދެކޮޅަށް މަޑުއްވަރީގައި ޚާއްޞަ އޮޕަރޭޝަނެއް ހިންގާފައެވެ. މި އޮޕަރޭޝަން ވެގެން ދިޔައީ އިތުރު ހައިރާންކަމެއް ލިބުނު ކަމަކަށެވެ. ކޯޓުން ބޭރުގައި ކައިވެނި ކުރުމާއި ، މިސްކިތަށް ނުގޮސް ވަކިން ޖަމާޢަތް ހަދައިގެން ނަމާދު ކުރުން ފަދަ ކަންކަން މަދު ނޫން މިންވަރަކަށް ދިޔައީ ހިނގަމުންނެވެ.

އެއަށްފަހު އޭގެ އެއްއަހަރު ފަހުން ނިރުބަވެރި ޙަމަލާއެއް ދިނުމަށް ރާވަމުންދާ ކަމުގައި ފުލުހުން ވަނީ ތ.ތިމަރަފުށިން ހަތްމީހަކު ހައްޔަރު ކޮށްފައެވެ. އެ ހަމަލާގެ ތަފްސީލް ފުލުހުން ހާމަކޮށްފައި ނުވި ނަމަވެސް ، ކޯޓުން އެމީހުންގެ މައްޗަށް މުއްދަތު ޖަހާފައިވުމާއެކު ރާވަމުން ދިޔައީ ކުޑަކަމެއް ނޫންކަން އެނގިގެން ދެއެވެ. މީގެ ކުރިން އދ.މަހިބަދޫގައާއި ލ.ގަމުގައި ކަނޑުއުޅަނދުތަކެއް ރޯކޮށް އަންދާ އަޅިއަށް ހަދާލުމުގެ ހާދިސާއާ ހަރުކަށި ފިކުރު މީހުންނާ ގުޅުވާއިރު އަދި ތިމަރަފުށީގެ މި ޙާދިސާއިން މިއަދު ޔަގީން ވެގެން ދިޔައީި ދީނީ ހައްދު ފަހަނަ އެޅުމުގެ ޢަމަލުތައް ރާއްޖޭގެ އެކި ކަންކޮޅުތަކުގައި ރަނގަޅަށް މޫލައި ހެދިފައިވާ ކަމެވެ.

ލާދީނީ ރިޕޯޓްތަކެއް ނެރުނު އުތެމައާއި އެމްޑީއެންގެ މެމްބަރުންނަށް ފިޔަވަޅު ނޭޅި އެ ޖަމްޢިއްޔާތަކުގައި ހިމެނޭ މީހުން ދައުލަތުގެ ތިންބާރުގައި އަތްގަދަ ކޮށްފައި ވާއިރު ، ހައްދު ފަހަނައެޅުމުގެ އަމަލުތައް ހިންގާ މީހުންނަށް ފިޔަވަޅު ނޭޅި އެ މީހުންގެ ރޭވުންތައް ވެސް މިއަދު ވަނީ ބިރު ގަންނަން ޖެހޭ މިންވަރަކަށް ކުރިއަށް ޖެހިފައެވެ. ސުވާލަކީ މިއީ ކިހިނެއް ހިނގާ ކަމެއް ހެއްޔެވެ؟ މިކަންކަމާ މެދު ފިޔަވަޅު ނޭޅި ، ހުއްޓުވަން ނުކުޅެދިފައި ވަނީ ކީއްވެ ހެއްޔެވެ؟

ތިމަރަފުށީގެ ޙާލަތު އޮޅުން ފިލުވާލުމަށް ކުރި މަސައްކަތުގައި "ދެން"އާ ވާހަކަ ދެއްކި އެރަށުގެ އާންމުންނާ މަސްޢޫލުވެރި މަޤާމުތަކުގައި ތިބި ބައެއް މީހުން ވެސް ވަނީ މަޢުލޫމާތު ހިއްސާ ކޮށްފައެވެ.

އާލާވަމުން ދިޔަ ސުންނަތް ، ހައްދު ފަހަނައެޅުމުގެ ޢަމަލުތަކުގެ ތެރެއަށް

ހެދުން އެޅުމާއި އަޅުކަންތަކާއި ދިރިއުޅުމާ ގުޅުން ހުރި ، ކީރިތި ރަސޫލާ ޞައްލަﷲ ޢަލައިހި ވަސައްލަމަގެ ސުންނަތުން ސާބިތުވާން ހުރި ވަރަށް ގިނަ ކަންކަމަކީ ، މީގެ އެތައް އަހަރެއް ކުރީން ، ސަރުކާރުން ހިފަހައްޓާފައި ހުރި ކަންކަމެވެ. އަދި އެ ކަންކަމަށް ޢަމަލު ކުރުމާ ގުޅިގެން ގިނަ ބަޔަކު ނުޙައްޤުން ޖަލަށްލާ އަނިޔާއާ ކުރިމަތިލާން ޖެހުނެވެ. ނަމަވެސް ދިވެހި އެތައް ދަރީންނެއް ޢިސްލާމީ ޢިލްމު އުނގެނެން ފެށުމާއި އަނިޔާތަކަށް ބިރެއް ނެތި ރާއްޖޭގެ ބައެއް ޝައިޚުން ފާޅުގައި ނުކުމެ ޙައްޤު ބަސް ބުނަމުން ދިޔުމާއެކު ޒިޔާރަތަށް ނަދުރު ބުނުން ފަދަ ޚުރާފީ އެތައް ކަމެއް ހުއްޓި ސުންނަތް އާލާވާން ފެށިއެވެ. ﷲގެ މިންވަރުފުޅުން މަގު ގެއްލި ، އިޖުތިމާއީ އެތައް މައްސަލަތަކެއްގެ ޝިކާރައަކަށް ވެފައިވާ ޒުވާނުން ހަމަ މަގަށް އެޅި އެމަގުގައި ދިރިއުޅުން ބިނާ ކުރިއެވެ.

މި އޮއިވަރުގައި ތިމަރަފުށީގެ ވެސް އެތައް ޒުވާނުންނެއް ދީނީ ދަޢުވަތު ފެތުރުމުގައި ޙަރަކާތްތެރިވަމުން ދިޔައެވެ. އެރަށުން ވާހަކަ ދެއްކި މީހަކު ބުނި ގޮތުގައި 2015 އާއި 2016 ހިސާބުގައި އެ ޒުވާނުން މަސައްކަތް ކުރީ ކައުންސިލާއި އެރަށުގެ ރައްޔިތުންނާ ގުޅިގެން ވަރަށް ވެސް އެކުވެރިކޮށެވެ. ދީނީ ނަސޭޙަތް ދިނުމުގެ ޕްރޮގްރާމްތަކާއި ހުސްބިމުގައި ބޮޑު ޖަމާޢަތް ހަދައިގެން ޢީދު ނަމާދު ކުރުމުގައި ރަށު ކައުންސިލާ ވަރަށް ގާތުން އެ ޒުވާނުން މަސައްކަތް ކުރިއެވެ. ނަމަވެސް ކުއްލިއަކަށް އާންމުންނާ ދުރުވެ އެޒުވާނުން އެކަހެރި ދިރިއުޅުމެއް އިޚްތިޔާރު ކުރިއެވެ.

ބަދަލުތައް އަންނަން ދިމާވި ސަބަބެއް ނޭނގެ ، އަމީރަށް ތަބާވާ ޢަދަދު މިހާރު 50 އަށް

އާންމުންނާ އެކުވެރިކޮށް އުޅުނު ޒުވާނުންނަށް ކުއްލިއަކަށް އައި ބަދަލުގެ ސަބަބު ނޭނގުނު ނަމަވެސް މިއަދު އެމީހުންނަކީ ވަކި އުސޫލުތަކަށް ތަބާވާ ބައެކެވެ. 50 އެއްހާ މީހުން އެ އެކަހެރި ދިރިއުޅުމުގައި އުޅޭއިރު އެމީހުންގެ "އަމީރެއް" ވެސް އެބަހުއްޓެވެ. ކުރީގެ "އަމީރު" މާލެ ބަދަލު ވުމާއެކު ފަހުން ހުރީ އެހެން އަމީރެއް އައްޔަން ކޮށްފައެވެ.

ފުލުހުންގެ ބަންދުގައި މިހާރު ހުރި "އަމީރު"އަށް ތަބާވާ ބައެއް ކުދީން މިހާރު ތިބީ "ޖިހާދަށް" ދިޔުމަށް ފުރުސަތު ލިބިއްޖެނަމަ އެކަމަށް ވެސް ތައްޔާރަށެވެ. މީގެ އިތުރުން ވަކި މީހެއްގެ ފަހަތުގައި ނޫނީ މިސްކިތުގެ ޖަމާޢަތުގައި ބައިވެރި ނުވުމާއި ، ގޭގައި ވަކި ޖަމާޢަތް ހަދައިގެން ނަމާދު ކުރުމާއި ދަރީންނަށް ވެކްސިން ނުދިނުމުގެ ކަންކަން ތިމަރަފުށީގައި ވެސް ދަނީ ހިނގަމުންނެވެ. މީގެ އިތުރުން އެމީހުންގެ މެދުގައި ހިނގާ ކައިވެނިތައް ކުރުވުމުގެ ހުއްދަ އޮތީ ވެސް އެންމެ މެޖިސްޓްރޭޓަކަށެވެ.

ވޯޓްލުމާއި ދެކޮޅު ، ގިނަ ޝެއިޚުންނަކީ ތާޣޫތުން ، ޤަބޫލު ކުރަނީ "ޅޮހީ ޝައިޚް"

ތިމަރަފުށީގެ މިދެންނެވި ރައްޔިތުންނަކީ ވަކި ސިޔާސީ ޕާޓީއަކަށް ތާއީދު ކުރާ ބައެއް ނޫނެވެ. އަދި އެމީހުންނަކީ ސިޔާސީ ކަންކަމުގައި ހަރަކާތްތެރިވާ ބައެއް ވެސް ނޫނެވެ. މީގެ އިތުރުން "މަޖުބޫރު" ޙާލަތެއްގައި ނޫނީ އިންތިޚާބެއްގައި ވޯޓްލާކަށް ނުދެއެވެ.އެމީހުންގެ ތެރޭގައި ދީނީ ޢިލްމު ޙާޞިލްކޮށްގެން ހުރި މީހެއް ވެސް ނެތްއިރު ރާއްޖޭގެ ގިނަ ޝައިޚުންނަކީ އެމީހުންގެ ނަޒަރުގައި ތާޣޫތުންނެވެ. އެމީހުންގެ ހިތުގައި އެ ޝައިޚުންނަށް އޮތީ އިންތިހާ ނަފްރަތެވެ. ނަމަވެސް އަބަދުވެސް "ޅޮހީ ޝައިޚް"ގެ ވާހަކަ އަޑު އިވޭ ކަމަށާއި އެމީހުން ޤަބޫލު ކުރާ ޝައިޚަކީ އެއީ ކަމަށް ތިމަރަފުށިން ވާހަކަ ދެއްކި މީހުން ބުނެފައި ވެއެވެ.

ރާވަމުން ދިޔަ ހަމަލާއަކީ ބަޔަކާ ގުޅިގެން ، އެހެން ރަށެއްގައި ދިނުމަށް ރޭވި ހަމަލާއެއް ކަމަށް ބެލެވޭ ، ތިމަރަފުށީގެ ރައްޔިތުންނަށް ބިރުވެރި ކަމެއް ނެތް 

ނިރުބަވެރި ހަމަލާއެއް ދޭން އުޅޭ ކަމުގެ ތުހުމަތުގައި ތިމަރަފުށީން ފަސް މީހަކު ހައްޔަރުކުރީ މިމަހުގެ 11 ވަނަ ދުވަހުއެވެ. އޭގެ ފަހުން ހައްޔަރު ކުރި ދެމީހުންނާއެކު ހަތް މީހަކަށް ބަންދުގެ މުއްދަތު ޖަހާފައި ވާއިރު އޭގެ ތެރެއިން އެއްވެސް މީހެއްގެ ފަރާތުން ބިރުވެރި ކަމެއް ނެތް ކަމަށް ތިމަރަފުށީން ވާހަކަ ދެއްކި މީހުން ބުނެފައި ވެއެވެ. އަދި އެފަދަ ކަމެއް ހިންގުމަށް ރާވަމުން ދިޔަ ނަމަ އެކަން ކުރަމުން ދިޔައީ އެރަށުން ބޭރު ބަޔަކާ ގުޅިގެން އެހެން ތަނެއްގައި ހަމަލާ ދިނުމަށް ލަފާ ކުރެވޭ ކަމަށް ވެސް އެ ރަށުން ވާހަކަ ދެއްކި މީހުން ބުނެއެވެ.

ޙަޤީޤަތަކީ މިއީއެވެ. އެމްޑީއެންއާއި އުތެމަ ފަދަ ލާދީނީ ޖަމާޢަތްތައް ފަދައިން ، ރަޖިސްޓްރީ ނުކުރިއެއް ކަމަކު ހައްދު ފަހަނައެޅުން ޕްރޮމޯޓްކުރާ އެތައް ޖަމާޢަތެއް ވެސް މި ރާއްޖޭގައި ޙަރަކާތްތެރި ވެއެވެ. ކުރިން ހިމަންދޫއެވެ. އިއްޔެ މަޑުއްވަރިއެވެ. މިއަދު ތިމަރަފުއްޓެވެ. މާދަމާ މިފަދަ ކަންކަން ފެންނާނީ ކޮން ރަށަކުން ކަމެއް ނޭނގެއެވެ. ހިތާމައަކީ އެފަދަ އެއްވެސް ކަމެއް މިރާއްޖޭގައި ނުހުއްޓުވުމެވެ. އަދި ކިއެއްތަ! ލާދީނީ ފިކުރުތައް ޕްރޮމޯޓްކުރާ މީހުން އާންމުގެ މައްޗަށް ބަސްކިޔާ މަގާމުތަކުގައި ތިބުމީ ހިތާމައިގެ ކޮޅެއް ނެތް ކަމެކެވެ.