ކޮވިޑް-19 ގެ ސަބަބުން ނުކުޅެދުންތެރިކަން ހުންނަ ފަރާތްތަކަށް ގޮންޖެހުންތައް ކުރިމަތިވެފައިވޭ : ޖެންޑަރ މިނިސްޓަރު
ކޮވިޑް-19 ގެ ސަބަބުން ނުކުޅެދުންތެރިކަން ހުންނަ ފަރާތްތަކަށް ބޮޑެތި ގޮންޖެހުން ތަކަކާ ކުރިމަތިވެފައި ވާ ކަމަށް މިނިސްޓަރ އޮފް ޖެންޑަރ، ފެމިލީ އެންޑް ސޯޝަލް ސާވިސަސް އައިޝަތު މުހައްމަދު ދީދީ ވިދާޅުވެއްޖެއެވެ.
މިނިސްޓަރ މިހެން ވިދާޅުވެފައި ވަނީ މިއަދު ބައިނަލްއަގުވާމީ ގޮތުން ފާހަގަކުރާ ނުކުޅެދުންތެރިކަން ހުންނަ މީހުންގެ ދުވަހާ ގުޅިގެން ދެއްވި ވީޑިއޯ މެސެޖެއްގައި ވާހަކަފުޅު ދައްކަވަމުންނެވެ.
މިނިސްޓަރ ވިދާޅުވީ ނުކުޅެދުންތެރިކަން ހުންނަ ފަރާތްތަކާއި އެފަރާތްތަކުގެ އާއިލާތަކަށް ދިމާވެފައިވާ ގޮންޖެހުންތަކުން އަރައިގަތުމަށް އެހީތެރިވުމަށް މިދިޔަ އޭޕްރީލްމަހުން ފެށިގެން އެމިނިސްޓްރީން ގިނަ ގުނަ މަސައްކަތްތަކެއް ކުރަމުން އަންނަ ކަމަށެވެ. އަދި ނުކުޅެދުންތެރިކަން ހުންނަ ފަރާތްތަކަށް ލިބެން ޖެހޭ ފުރުސަތުތައް ފަހިކޮށްދީ މުޖްތަމައުގެ އެހެން މީހުންނެކޭވެސް އެއްފަދައިން އެމީހުންނަށް ވެސް ދިރިއުޅެވޭނެ މާހައުލެއް ގާއިމް ކުރުމަށް މަސައްކަތް ކުރަމުންދާ ކަމަށެވެ.
"ކޮވިޑް-19 ސަބަބުން ނުކުޅެދުންތެރިކަން ހުންނަ މީހުންނާއި އެފަރާތްތަކުގެ އާއިލާތަކަށް ދިމާވެފައިވާ ދަތިތަކާއި އެހީތެރިކަން ބޭނުންވާ ކަންކަތައްތައް ދެނެގަނެ ފާހަގަަކުރެވުނު ކަންތައްތަކާއި ގުޅިގެން އެކަންތައްތަކުގެެ ހައްލު ހޯދައިދިނުމަށް ބޭނުންވާ އެކަށީގެންވާ ނިޒާމްތައް އެކުލަވާލެވުނު" މިނިސްޓަރ އައިޝަތު ވިދާޅުވިއެވެ.
މިނިސްޓަރ ވަނީ ނުކުޅެދުންތެރިކަން ހުންނަ ފަރާތްތަކަށް ދިވެހި މުޖްތަމައުން ދެމުން އަންނަ ސަމާލުކަން އިތުރު ވެފައިވާކަން ފާހަގަ ކުރައްވާފައެވެ.
