މަޖިލީހުގައި އަމީން އިތުރުފުޅު ހެއްދެވި ކަމަށް ބުނާ މައްސަލައިގެ ބަހުސް މާދަމާ
ކުރީގެ ހެލްތު މިނިސްޓަރު އަބްދުﷲ އަމީން ރައްޔިތުންގެ މަޖިލީހުގައި އިތުރުފުޅު ހެއްދެވި ކަމަށް ބުނާ މައްސަލަ ދިރާސާކޮށް މަޖިލީހުގެ އިމްތިޔާޒާއި ސުލޫކު ކޮމިޓީއިން ދިރާސާކޮށް އެކުލަވާލި ރިޕޯޓަށް ބަހުސް ކުރުން މަޖިލީހުގެ މާދަމާގެ ޖަލްސާއަށް ތާވަލުކޮށްފިއެވެ.
އޮޑިޓަ ޖެނެރަލް ނެރުއްވި އޮޑިޓް ރިޕޯޓެއްގައި ކުރީގެ މިނިސްޓަރު އަމީން ދެއްވި މައުލޫމާތަކީ ސައްހަ މައުލޫމާތެއް ނޫން ކަމަށް ލިޔުއްވާފައިވެއެވެ. މިކަމާ ގުޅިގެން މަޖިލީހުގެ ސުލޫކު ކޮމިޓީން ދިރާސާކޮށް ނިންމީ ރިޕޯޓް ތަޅުމަށް ހުށަހަޅައި ބަހުސް ކުރުމެވެ.
އެ ރިޕޯޓުގައި ވާގޮތުން ރާއްޖޭން ބޭރުގައި ތާށިވި ބައެއް ދިވެހިން ގެނައުމުގައި ހިޔާނާތް ހިންގާފައިވާ ކަމަށާއި ޓެސްޓް ކިޓް ފަދަ ތަކެތި ހޯދާފައި ވަނީ ވެސް މާލިއްޔަތު ގާނޫނާއި ގަވާއިދާ ހިލާފަށް ކަމަށް ވެއެވެ.
އެގޮތުން ކޮމިޓީގެ ބައްދަލުވުމަށް ހާޒިރުވި މެންބަރުންގެ އިއްތިފާގާއެކު މި މައްސަލަ ދިރާސާކޮށް ސުލޫކު ކޮމިޓީއިން ނިންމާފައި ވަނީ މުޅި މަޖިލީހަށް އަދި މަޖިލީހުގެ ކޮމިޓީތަކަށް އަމީން ގަސްތުގައި އޮޅުވާލައިގެން މައުލޫމާތު ދެއްވި ކަމަށެވެ.
ކޮވިޑު-19 އަށް ފައްސިވާ މީހުންނަށް ފަރުވާ ދިނުމަށް ބޭނުންވާ ވެންޓިލޭޓަރުތައް ހޯދުމުގައި ބޮޑު ހިޔާނާތެއް ހިންގާފައިވާއިރު ހެލްތު މިނިސްޓްރީން ކުރި އެކި ހަރަދުތަކުގައި ކޮރަޕްޝަނާއި ބޮޑެތި ހިޔާނާތްތައް އެކުލެވޭ ކަމަށް އޮޑިޓު ރިޕޯޓުތަކުން ހާމަވެފައި ވެއެވެ.
