މުޅި ދުނިޔެއަށް ވާވަރަށް ވެކްސިން ފޯރުކޮށްދޭން 2 އަހަރު ނަގާނެ : ޑރ. ފައިސަލް
މުޅި ދުނިޔޭގެ އާބާދީއަށް ވާވަރަށް ވެކްސިން ފޯރުކޮށްދޭން އަދި 2 އަހަރު ނަގާނެ ކަމަށް ކުޑަކުދިންގެ ޚާއްސަ ޑޮކްޓަރ ޑރ އަޙްމަދު ފައިސަލް ވިދާޅުވެއްޖެއެވެ.
ވެކްސިނާ ގުޅޭ ގޮތުން ޑރ. ފައިސަލް މިއަދު ވިދާޅުވީ އެދެވޭ މިންވަރަށް މުޅި ދުނިޔެއަށް ވާވަރަށް ވެކްސިން ފޯރު ކޮށްދޭން އަދި 2 އަހަރު ނަގާނެ ކަމަށެވެ. ޑރ ފައިސަލް ވިދާޅުވީ ކޮވިޑާ ގުޅިގެން އުފައްދަމުންދާ ވެކްސިންތަކުން މިވަގުތަށް ރާއްޖޭގައި ބެހެއްޓޭނީ މައިނަސް 2އާއި 8 ޑިގްރީއާ ދެމެދުގެ ފިނިހޫނު މިނުގައި ބެހެއްޓޭ އޮކްސްފޯޑް ނުވަތަ ރަޝިޔާގެ ވެކްސިން ކަމަށެވެ.
އެގޮތުން ފައިޒާއިން ތައްޔާރުކުރަމުން އަންނަ ކޯވިޑް-19 އަށް ޚާއްސަ ވެކްސިން މި ސަރަހައްދުގެ އެއްވެސް ގައުމެއްގައި ބެހެއްޓެން ނެތް ކަމަށް ވިދާޅުވަމުން ޑރ.ފައިސަލް ވިދާޅުވީ ފައިޒާގެ ވެކްސިން ބަހައްޓަން ޖެހެނީ މައިނަސް 70ޑިގްރީ ފިނިހޫނުމިނުގައި ކަމަށެވެ. އެެހެންކަމުން އެ ވެކްސިން ބަހައްޓާނެ ގޮތެއް މި ސަރަހައްދުގެ އެއްވެސް ގައުމެއްގައި ނެތް ކަމަށް ޑރ ފާހަގަ ކުރެއްވިއެވެ. ކޮވިޑް-19 އަށް ވެކްސިނެއް ތައްޔާރު ކުރުމަށް ދުނިޔޭގެ އެކި ކަންކޮޅުތަކުން ކުރަމުން އަންނަ މަސައްކަތުގައި މިހާރު ޞިއްޙީގޮތުން ރައްކާތެރި، އަދި ވެކްސިން ޖެހުމުން ބަލިން ރައްކާތެރިކަން ފޯރުކޮށްދޭކަން ޔަޤީންކުރެވިފައިވާ ހަތަރު ވެކްސިނެއް މިހާރު ފާހަގަ ކުރެވިފައިވާ ކަމަށް މީގެ ކުރިން ހެލްތު އިމަޖެންސީ އޮޕަރޭޝަން ސެންޓަރުގެ ތަރުޖަމާނު ޑރ.ނަޒްލާ ވަނީ ވިދާޅުވެފައެވެ.
އަންނަ އަހަރުގެ ކުރީކޮޅު ރާއްޖެއަށް ކޮވިޑް-19 ވެކްސިންގެ ފުރަތަމަ ބެޗް ލިބޭނެކަމަށް ޑރ.ނަޒްލާ ވިދާޅުވިއެވެ. އެހެން ނަމަވެސް ، ވެކްސިން ލިބޭނީ އެކި ބެޗް ބެޗަށް އެކި މިންވަރަށް ކަމަށާއި ، ވެކްސިން ލިބެމުންދާ މިންވަރަކުން ވެކްސިން ޖަހާނެ ފަރާތްތައް ގިންތި ކުރުމުގެ މަސައްކަތް ހަލުވިކަމާއިއެކު ކުރަމުންދާ ކަމަށް ނަޒްލާ ވިދާޅުވިއެވެ. އަދި ވަކި ތަރުތީބަކުން އެ ވެކްސިން ޖެހުމުގެ މަސައްކަތް ކުރާނެ ކަމަށް ވެސް ޑރ.ނަޒްލާ ފާހަގަ ކުރެއްވިއެވެ.
