އިސްދޫ ކައިރިން ބޭރުގެ ދެ މަސްބޯޓް ފެނިއްޖެ
ލ. އިސްދޫ ކައިރިން ބޭރުގެ ދެ މަސްބޯޓެއް ފެނިގެން ސިފައިން ހަރަކާތްތެރި ވެއްޖެއެވެ.
އެމްއެންޑީއެފްގެ ތަރުޖަމާނު މޭޖަރ އިބްރާހިމް އާޒިމް ވިދާޅުވީ މި ދެ ބޯޓު ފެނިފައި ވަނީ އިސްދޫ މުލީގެ 87 ނޯޓިކަލްމޭލު ބޭރުން މަސްވެރިކަން ކުރަމުންދިޔަ ދޯންޏަކަށް ކަމަށެވެ.
މިކަމުގެ މައުލޫމާތު އެމްއެންޑީއެފް އަށް ލިބިފައިވަނީ މިއަދު ހަވީރު 5:05 ހާއިރު ކަމަށް އެމްއެންޑީއެފް އިން ބުނެފައިވެއެވެ.
ބޭރުގެ އެ ދެ މަސްބޯޓު ފެނިގެން އެމްއެންޑީއެފުން ވަނީ އެސަރަޙައްދުގައި ހަރަކާތްތެރިވެފައެވެ.
މިއީ ކޮން ޤައުމެއްގެ ދެ މަސްބޯޓެއް ކަމާއި، މިކަމާއި ގުޅޭ އިތުރު ތަފްސީލެއް އެމްއެންޑީއެފުން އަދި ދެއްވާފައެއް ނުވެއެވެ.
ބޭރުގެ މަސް ބޯޓުތައް ރާއްޖޭގެ ކަނޑުގެ އެކި ސަރަޙައްދުތަކުން މީގެ ކުރިން ވެސް ވަނީ ފެނިފައެވެ. އެފަދައިން ފެންނަ ބޯޓުތައް ކޯސްޓުގާޑުން ހުއްޓުވާ އަނބުރާ އެޤައުމަކަށް ފޮނުވާލައެވެ. އަދި އެހީތެރިކަން ބޭނުންވާ ބޯޓެއް ނަމަ އެބޯޓަކަށް ރާއްޖޭ ސިފައިން އެހީތެރިކަން ވެސް ފޯރުކޮށްދެއްވައެވެ.
