ދެ އަހަރު ފަހުން ކަނޑު އަޑިން ފެނުނު ކެމެރާއެއްގެ ފަހަތުގައި ހިތްދަތި ހާދިސާ އެއް!
ގެއްލިފައިވާ އެއްޗެއް އަނބުރާ ފެނުމުން ކުރެވޭ އިހުސާސް ގިނަ މީހުންނަަށް އެނގޭނެއެވެ. ޚާއްސަ ކޮށް ކަނޑު އަޑިން ފެންނަ މިފަދަ ސާމާނަކީ ގިނަ ފަހަރު އޭގެން ތާރީޚީ ބޮޑެތި ކަންތައްތައް އެނގިގެންދާ އެއްޗިއްސެވެ.
ކެނެޑާގައި ޑައިވް ކުރަން ގޮސް އުޅުނު ކުދިންތަކަކަށް މޫދުގެ 40 ފޫޓު އަޑިން ފެނުނު މި ކެމެރާ ވެގެން ދިޔައީ އެ ކުދިންނަށް ލިބުނު ބޮޑު ޝަރަފެއްގެ ގޮތުގައެވެ. ކެމެރާއިން ފެނުނު އެއްޗެހީގެ އިތުރުން އޭގެ ވެރިފަރާތް ހޯދުމަށް ރެއާ ދުވާލު މަސައްކަތް ކުރަމުން މި ކުދިން ދިޔައެވެ.
ކެމެރާ ފެނުމާއެކު އަވަހަށް ލެބޯޓްރީ އަކަށް ގެންދިޔައީ މިކެމެރާގެ ހަގީގަތް ހޯދުމަށެވެ. އޭރު އެ ކެމެރާ އޮތީ އަސްލު ނޭނގޭ ވަރަށް ފެހި ޖަހާފައެވެ. ދިރޭ ތަކެތި އޭގައި އުޅުނު ކަމަށް ވެސް މި ކުދިން ބުންޏެވެ. އެހެންނަމަވެސް ލެބޯޓްރީ އިން ކުރި ތަހުގީގުން ތަފާތު ކަންތައްތަކެއް އެނގިގެން ދިޔައެވެ. ކެމެރާ ނުހުޅުވުނު ނަމަވެސް އޭގައިވާ މެމޮރީ ކާޑު ލިބުނެވެ. އެ ކާޑު މަސައްކަތް ކުރާނެ ކަމުގެ އުންމީދެއް ނެތް ނަމަވެސް ދެން މަސައްކަތް ފެށުނީ އެ ކާޑުގައި ވަނީ ކޯއްޗެއްތޯއާއި އެއީ ކާކު ގެންގުޅުނު ކެމެރާއެއްތޯ އަދި އެ ކާޑުން އެނގެނީ ކޯއްޗެއްތޯ ބެލުމަށެވެ.
ލެބޯޓްރީ އިން ހޯދި ހޯދުމުން އެނގުނު ގޮތުގައި އެއީ 8ޖީބީ ގެ އެސްޑީ ކާޑެކެވެ. ކާޑު ރަނގަޅަށް ސާފު ކުރުމަށްފަހު ހުޅުވާތޯ ކުރި މަސައްކަތް ކާމިޔާބު ވިއެވެ. އެ ކުދިން ބުނި ގޮތުގައި އެ ކާޑު މަސައްކަތް ކުރާނެ ކަމުގެ އެއްވެސް އުންމީދެއް ނުކުރި ނަމަވެސް ކާޑު ހުޅުވުމުން އެންމެންވެސް ތިބީ ވަރަށް އުފަލުން ކަމަށެވެ.
ކާޑުން އާއިލާއެއް ނަގާފައިވާ ގްރޫޕް ފޮޓޯތައް ފެނުނެވެ. މީގެ އިތުރުން އާއިލާގެ އެކި މީހުން ވަކިން ނަގާފައިވާ ފޮޓޯ ތަކާއި ދަތުރެއްގެ އެކި އެކި ފޮޓޯ ތައް ފެނުނެވެ. މިއާއި އެކު މި ކެމެރާގެ ވެރިފަރާތް ހޯދުމަށް މަސައްކަތް ފެށުނެވެ. ޚާއްޞަކޮށް އާއިލާއެއްގެ އުފާވެރި މަންޒަރުތައް ފެނުމުން ކެމެރާ ފެނުނު ކުދިން އެއާއިލާ އާއި ބައްދަލުކޮށްލާ ހިތް ވިއެވެ.
އެގޮތުގެ މަތިން ކެމެރާގައި ވާ ފޮޓޯ ބޭނުންކޮށްގެން މި ކެމެރާގެ ވެރިފަރާތް ހޯދުމުގެ މަސައްކަތް ފެށުނެވެ. ޓްވިޓަރ، ފޭސްބުކް މެދުވެރިކޮށް މައުލޫމާތު އާންމު ކުރިއެވެ. ދުވަސް ތައް ފާއިތުވެގެންގޮސް ހަފްތާއެއް ފަހަނައަޅައި ހިނގައްޖެއެވެ. ޓީމުން ދިޔައީ އުންމީދު ކަނޑާ ނުލައި މަސައްކަތް ކުރަމުންނެވެ. ހަފްތާއެއް ފަހުން ކޯސްޓް ގާޑް އަކަށް މަސައްކަތް ކުރާ މީހެއް، އާންމު ކޮށްފައިވާ ފޮޓޯގައި ވާ މީހެއް ދަންްނަ ކަމަށް ހަބަރު ދިނެވެ.
އެ ކޯސްޓް ގާޑް ދިން މައުލޫމާތުގެ އަލީގައި ކެމެރާގެ ވެރިފަރާތް ހޯދުނެވެ. ކެމެރާ ލިބުމާ އެކު އުފަލުން ފޮޅިފައިވާ އެ މީހާ ކުދިންނަށް ޝުކުރު އަދާ ކުރިއެވެ. އެ ކެމެރާގައި ވާ ފޮޓޯ ތަކަކީ ވަރަށް ތާރީޚީ ފޮޓޯތަކެއް ކަމަށާއި، އެ ދަތުރަކީ ދުވަހަކުވެސް ހަނދާނުން ފޮހެ ނުލެވޭނެ ދަތުރެއްކަމަށް މި މީހާ ބުންޏެވެ. އަދި ކެމެރާ ކަނޑަށް ވެއްޓުނު ސަބަބު ހާމަ ކުރަން ބޭނުންވިއެވެ.
ކައިރި ރަށަކަށް އޭނާ ކުރި ދަތުރެއްގައި ކަން ހިނގައިދިޔަ ގޮތް ކިޔައިދިނެވެ. އެކަނި ކައިރި ރަށަކަށް އޭނާގެ އަމިއްލަ ބޯޓުގައި ކުރި އެ ދަތުރު ފެށިއިރުވެސް މޫސުން ރަނގަޅުކަމަށް އޭނާ ބުންޏެވެ. ކޮޅިގަނޑެއްގައި ޖެހުނީ އެ ރޭގެ ވަގުތެއްގައެވެ. އޭނާ އެވަގުތު ހުރީ ބޯޓުގެ ކުރީކޮޅުގައި ފޮޓޯ ނަގާށެވެ. މާ ގިނަ އިރުތަކެއްނުވެ ބޮޑު ރާޅެއް އައިސް ބޯޓާ ހަމަކޮށް ބޯޓު ދިޔަ ވާން ފެށިއެވެ. އޭނާ ދެން ޖެހުނީ މޫދަށް ފުންމާލާށެވެ. އަމިއްލަ ބޯޓު ދިޔަ ވާތަން އޭނާގެ ލޯ ކުރިމަތިން ފެންނަމުން ދިޔައެވެ. ކައިރިން ހުސް ފަސްގަނޑެއް ފެނުމުން އެތަނަށް ފަތާފައި ގޮސް 6 ގަޑި އިރު މަސައްކަތް ކުރީ އެތަނުން ސަލާމަތް ވާނެ ގޮތެއް ފެނޭތޯއެވެ. ކުރި މަސައްކަތުން ބޯޓެއްގައި ބަޔަކު އަންނަތަން އޭނާއަށް ފެނުނެވެ. އެމީހުން އައިސް ކޯސްޓް ގާޑަށް ގުޅައި އޭނާ ސަލާމަތް ކުރިއެވެ. ހަންދާންތައް އާކުރަމުން އޭނާ ކުދިންނަށް ކިޔައިދިނެވެ.
އެމެރާ އަލުން އޭނާއަށް ލިބުން ވެގެންދިޔައީ އޭނާގެ ހަޔާތައް އައި ބޮޑު އުފަލަކަށެވެ. ލޯބިވާ މަންމަ އޭގެ ކުޑަ ދުވަސްކޮޅެއް ކުރިން މަރުވެ މަންމަގެ ހަނދާންތައް އެ ކެމެރާގައި ވާ ކަމަށް އޭނާ ބުންޏެވެ. ކެމެރާއިން ފެނުނު އާއިލީ ފޮޓޯ އަކީ މަންމަ މަރުވި ދުވަހު ނަގާފައިވާ ފޮޓޯއެއް ކަން ރޮމުން އޭނާ ކިޔައިދިނެވެ.
Ads by STO
