ކުރީގެ ލޯބިވެރިޔާ ދިން ހަދިޔާ 47 އަހަރު ވީއިރުވެސް ނުކަނޑާ!
ކުރީގެ ލޯބިވެރިޔާ ނުވަތަ ބައިވެރިން މަތިން ހަނދާން ނައްތާލުމަކީ އެންމެންނަކަށް ކުރާކަށް ފަސޭހަ ކަމެއް ނޫނެވެ. ބައެއް މީހުންނަށް، އެގުޅުން ކެނޑިގެން ކިތަންމެ ގިނަ ކުރީގެ ބައިވެރިޔާގެ ހަނދާންތަކުން ދުރަށް ދާން އުނދަގޫ ވެއެވެ. އެމީހުން ތިމާގެ ހިތް ހަލާކު ކޮށްލާފައިވީ ނަމަވެސް، އެހަނދާންތަކާ ދުރުވުމަކީ ކުރެވުމަށްވުރެ ނުކުރެވުމާ ގާތްވެފައިވާ ކަމެކެވެ.
ކެނެޑާ ގެ މިފިރިހެން މީހާއަށް ވެގެން އުޅެނީ މިފަދަ ގޮތެކެވެ. އޭނާގެ ކުރީގެ ލޯބިވެރިޔާ ދިން ހަދިޔާއެއް އަދިވެސް ނުކަނޑާ ގެންގުޅޭތާ މިހާރު ގާތްގަނޑަކަށް ފަސް ޑިކޭޑް ވެއްޖެއެވެ.
އަލްބަރޓާގެ އެޑްމޮންޓޮން އަށް އުފަން އެޑްރިއަން ޕިއާރސް އަށް އޭނާގެ ހައިސްކޫލް ލޯބިވެރިޔާ ދިން ހަދިޔާ، އަދިވެސް ނުކަނޑާ ގެންގުޅޭތާ މިހާރު 47 އަހަރު ވެއްޖެއެވެ.
ރިޕޯޓުތަކުން ބުނެފައިވާ ގޮތުގައި އެޑްރިއަންގެ ލޯބިވެރިޔާ އޭނާއާ ގުޅުން ކަނޑާލުމުގެ ކުރިން ހަދިޔާއެއް ދިނީ، އެގުޅުން ކެނޑުމުން އެޑްރިއަން ވާނެ ދެރަ ކުޑަކުރުމުގެ ގޮތުންނެވެ.
އެޑްރިއަން މިހާރު ކައިވެންޏެއްކޮށް، ދަރިން ލިބިފައިވީ ނަމަވެސް، އަދިވެސް ކުރީގެ ލޯބިވެރިޔާ ދިން ހަދިޔާ ގެންގުޅެއެވެ. އެހަދިޔާ އޭނާ ނުކަނޑަނީ ލޯބިވެރިޔާ އޭތި ދިން ގޮތަށް ބާއްވަން ކަމަށާއި އެހަދިޔާ ދުވަހަކު ވެސް ނުކަނޑާނެ ކަމަށް އޭނާ އަމިއްލަ ނަފްސަށް ވައުދު ވެފައިވާތީ ކަމަށެވެ. އެޑްރިއަން ބުނީ ބައެއް ފަހަރު އެހަދިޔާގެ ޓޭޕުތައް ދޫ ވާން ފެށުމުން އޭނާ ޓޭޕު އާ ކުރާ ކަމަށެވެ.
ކުރީގެ ލޯބިވެރިޔާ ގުޅުން ކަނޑާލި ރޭ ސިފަ ކޮށްދެމުން އެޑްރިއަން ބުނީ އޭނާ އެރޭ ވަރަށް ބޮޑަށް ދެރަވެ ރުޅިވެސް އައި ކަމަށެވެ. އެއީ ކްރިސްމަސް ދުވަސް ކަމަށްވާތީ އެހަދިޔާ ކްރިސްމަސް ގަސް ދަށަށް އެއްލާލި ކަމަށާއި އެންމެން އެމީހުންގެ ހަދިޔާތައް ކެނޑިއިރު ވެސް އޭނާ އޭތި ނުކަނޑާ ކަމަށް އެޑްރިއަން ބުންޏެވެ.
އެޑްރިއަން ބުނީ ވިކީ ނަމަކަށް ކިޔާ އޭނަގެ ކުރީގެ ލޯބިވެރިޔާ އޭނާއާ ގުޅުން ކަނޑާލީ އެހެން މީހަކާގުޅެން ކަމަށެވެ. އޭނާ ބުނީ ވިކީ ދެކެ ވާ ލޯބިން އެހަދިޔާ އަދިވެސް ނުކަނޑާ ހުރި ކަމުގައިވިޔަސް، ހަދިޔާ ދިންތާ 50 އަހަރު ފުރުމުން އޭނާ އޭތި ކަނޑާފާނެ ކަމަށެވެ.
