ނުތަނަވަސް ވަނީތަ؟ ދުވަސް ކޮޅަކަށް ނަމަވެސް ފޭސްބުކާ ދުރަށް ޖެހިލުން ބުއްދިވެރި!
ހިތްހަމަ ނުޖެހި، ނުތަނަވަސްވެ، ހަމަ ވާނުވާ ނޭނގި ދެރަވާ ގޮތްވޭ ހެއްޔެވެ؟ މީސް މީޑިއާ، ނުވަތަ ވަކިން ޚާއްސަކޮށް ފޭސްބުކާ ދުވަސްކޮޅަކަށް ދުރަށް ޖެހިލުމުން މިކަންކަމުން ސަލާމަތް ވެވޭނެ ކަމަށް ދިރާސާތަކުން ދައްކައިފިއެވެ.
ދިރާސާތަކުން ބުނެފައި ވަނީ ސޯޝަލް ނެޓްވޯކެއް ކަމަށްވާ "ފޭސްބުކް" މާގިނައިން ބޭނުން ކުރުމަކީ، އިންސާނާއަށް ނަފްސާނީ ގޮތުން ވަރަށް ގިނަ ގެއްލުންތަކެއް މެދުވެރިވާ އަދި ދިރިއުޅުމާ މެދު ކޮންމެވެސް ވަރަކަށް ފޫހި ކުރުވާ، ކަަމެއް ކަމުގައެވެ. އެހެންކަމުން ފޭސްބުކް ބޭނުން ކުރާވަރު ލިމިޓް ކޮށްލުން ނުވަތަ ދުވަސްކޮޅަކަށް ފޭސްބުކާ ދުރަށް ޖެހިލުން ރަނގަޅު ކަމަށް ވެސް ދިރާސާތަކުން ދައްކައެވެ.
ސައިބަރސަކޮލޮޖީ، ބިހޭވިއަރ އެންޑް ސޯޝަލް ނެޓްވޯކިންގްގައި ޝާއިއު ކޮށްފައިވާ ރިޕޯޓެއްގައި ބުނެފައިވަނީ ފޭސްބުކާ ދުރަށް ޖެހިލުމުން ދިރިއުޅުމާ މެދު ތަންކޮޅެއް ޕޮޒިޓިވްކޮށް ވިސްނި، ކަންކަމާ ކުރިމަތިލާން ހިތްވަރު ވެސް ލިބޭނެ ކަމަށެވެ.
މިކަން ދިރާސާ ކުރުމަށް ޑެންމާކްގެ ޔުނިވަރސިޓީ އޮފް ކޮޕެންހެގަން އިން މޯޓެން ޓްރޮމްހޯލްޓް ވަނީ އެކްސްޕެރިމެންޓެއް ކޮށްފައެވެ. މި އެކްސްޕެރިމެންޓުގައި 1000 އެއްހައި މީހުން އޭނާ ވަނީ ބައިވެރި ކޮށްފައެވެ. އަދި ދެ ގްރޫޕަކަށް ބެހުމަށްފަހު، އެއް ގްރޫޕްގެ މީހުން ގާތު އޭނާ ބުނީ ހަފްތާއެއް ވަންދެން ފޭސްބުކް ބޭނުން ނުކުރުމަށެވެ. އަނެއް ގްރޫޕުގެ މީހުން ހަމަ އާދައިގެ މަތިން ފޭސްބުކް ބޭނުން ކުރަން އޭނާ އެދުނެވެ.
ހަފްތާއެއް ފަހުން ބެލިއިރު، އެމީހުންގެ ތެރެއިން ފޭސްބުކް ބޭނުން ނުކުރި ގްރޫޕް ތިބީ ވަރަށް ބޮޑަށް ހިތްހަމަ ޖެހި އުފާވެފައިކަން ފާހަގަ ވިއެވެ. އެމީހުންގެ ދިރިއުޅުން ބަދަލުވީ ކިހިނެއްތޯ ސުވާލު ކުރުމުން އޭގެ ތެރެއިން ގިނަ މީހުން ބުނީ، ފޭސްބުކް ބޭނުން ކުރުން ހުއްޓާލުމުން، ދިރިއުޅުމުގެ އެހެން ކަންކަމަށް ވަގުތުދީ އެހެން ކަންކަމާމެދު ރަނގަޅަށް ވިސްނެން ފެށި ކަމަށެވެ. އެގޮތުން އާއިލާއާއި ގާތް ރައްޓެހިންނަށް ވެސް ވަގުތު ދެވި، ދިރިއުޅުމުގައި ޒިންމާދާރުވެ އެމީހުންގެ ވަށައިގެން ވާކަންތައްތައް ވެސް އެނގެން ފެށިކަމަށެވެ.
މިއީ ޙަޤީޤަތެވެ. ގިނަ ފަހަރަށް އަހަރުމެންގެ ތެރެއިން ގިނަ މީހުންނަކީ ފޭސްބުކް ބޭނުން ކުރާއިރު އެއަށް ގެއްލި ގޮސް ހުސްވެފައި ތިބޭ މީހުންނެވެ. ދިރިއުޅުން އޮންނަނީ ފޭސްބުކާ މާބޮޑަށް ގުޅުވާލާފައެވެ. ތަނަކަށް ދިޔަޔަސް، މީހަކާ ބައްދަލު ވިޔަސް އަދި ބަލި ވިޔަސް އެވާހަކަ ފޭސްބުކްގައި ޖަހާލާ މީހުން ގިނައެވެ.
ފޭސްބުކާ ހެދި ޖެހޭ މައްސަލަތައް ވެސް މަދެއް ނޫނެވެ. ލާ ފޮޓޯ އަކަށް ލައިކެއް ނުދީގެން ނުވަތަ ކޮމެންޓެއް ނުކޮށްގެން ނުވަތަ ރުޅި އަންނަ މީހެއްގެ ފޮޓޯއަކަށް/ސްޓޭޓަސް އަކަށް ކޮމެންޓެއް ކޮށްގެން ޖެހޭ މައްސަލަތައް މަދެއް ނޫނެވެ. މިފަދައިން ކަންތައް ކުރުމުގެ ސަބަބުން އެކަކު އަނެކަކާ ބައެއް ފަހަރު މޫނުވެސް ކެނޑެއެވެ.
ހަގީގަތަކީ ފޭސްބުކްގެ އަވައިގައި ޖެހި ދިރިއުޅުމަށް ދޭންޖެހޭ ސަމާލުކަން ފުރިހަމައަށް ނުދެވޭ ކަމެވެ. އަދި ފޭސްބުކުން ބައެއް ފަހަރު ފެންނަ އެއްޗެހިން އަމިއްލައަށް ހިތް ނުތަނަވަސްވެ ދެރަވާކަމެވެ. ވީމާ މިކަމަކީ ޙައްލުކުރުން ރަނގަޅު، އަދި ޙައްލު ކުރަން ލަސް ވެސް ވެފައިވާ ކަމެކެވެ.
