ކޮވިޑަކީ ލޮލަށް ނުފެންނަ ބޮޑު ސުނާމީއެއް: ޝާހިދު
ކޮވިޑް19 އަކީ މުޅި ދުނިޔެ ސުންނާފަތި ކުރަމުން އަންނަ، ލޮލަށް ނުފެންނަ ކުދިކުދި ވައިރަސްތަކެއްގެ ސިފައިގައި މުޅި މުޖުތަމައުއަށް ހަމަލާ ދެމުންދާ ބޮޑު ސުނާމީއެއް ކަމަށް ފޮރިން މިނިސްޓަރު އަބްދުﷲ ޝާހިދު މިއަދު ވިދާޅުވެއްޖެއެވެ.
މިނިސްޓަރ މިހެން ވިދާޅުވެފައި ވަނީ ގައުމީ އެއްބައިވަންތަކަމުގެ ދުވަހުގެ މުނާސަބަތުގައި ފޮރިން މިނިސްޓްރީން މިއަދު ހެނދުނު ބޭއްވި ރަސްމިއްޔާތުގައި ވާހަކަ ދައްވަމުންނެވެ. އެ ދުވަހު ރާއްޖެއަށް ލިބުނު ގެއްލުންތައް ޝާހިދު ސިފަ ކުރެއްވީ ހަނގުރާމައިގެ މައިދާނެއްގައި ލިބުނު ގެއްލުންތަކެއްގެ ގޮތުގައެވެ.
"އެދުވަހު ދިވެހި ރައްޔިތުން ދިމާކުރި ވަރުގަދަ ރާޅާއެކު، އެއްބައިވެގެން އެކުވެރި ވެގެން ދިޔަ ދިއުމަށް ވުރެ ގަދަޔަށް ދިވެހިން އެއްބައިވި ދުވަހެއް ދިވެހިރާއްޖޭގެ ތާރީހުގައި ނެތޭ ދެންނެވުމަކީ ދޮގަކަށް ނުވާނެ،" މިނިސްޓަރު ވިދާޅުވިއެވެ.
ޝާހިދު ވިދާޅުވި ގޮތުގައި، ސުނާމީ ކާރިސާއަށްފަހު، އަނެއްކާވެސް މުޅި ދުނިޔެއާއެކު ރާއްޖެވެސް ކުރިމަތިލަމުން މިދަނީ މާ ނުރައްކާތެރި، ލޮލަށް ނުފެންނަ ސުނާމީއަކާ ކަމަށެވެ. އަދި މިއަދު ހަމަލާ ދެމުން މިދާ ސުނާމީ އަކީ ކުދިކުދި ވައިރަސްތަކެއްގެ ސިފައިގައި މުޅި މުޖުތަމައުއަށް ހަމަލާ ދެމުންދާ ސުނާމީއެއް ކަމަށާއި މުޅި ދުނިޔެ ފަނާ ކުރަމުންދާ، މުޅި ދުނިޔޭގެ ހުރިހާ ބޯޑަރުތައް ބަންދުކޮށް ދުނިޔޭގެ ހުރިހާ ގުޅުންތައް ބުރިބުރި ކުރަމުންދާ ސުނާމީއެއް ކަމަށް މިނިސްޓަރ ވިދާޅުވިއެވެ.
"ތަފާތަކީ އެ ސުނާމީއަކީ ލޮލަށް ފެންނަ ސުނާމީ އަކަށް ނުވުން. އަޅުގަނޑުމެންގެ ކުރިމަތީގައި މިއަދު އަޅުގަނޑުމެންނަށް ހަމަލާދެމުން އަންނަ ސުނާމީއަކީ ކުދި ކުދި ވައިރަސްތަކެއްގެ ސިފައިގައި އަޅުގަނޑުމެންގެ މުޅި މުޖުތަމައުއަށް ހަމަލާދެމުންދާ ސުނާމީއެއް. މުޅި ދުނިޔެ ފަނާ ކުރަމުންދާ ސުނާމީއެއް،" މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ މި ނުރައްކާތެރި ދަނޑިވަޅުގައި ދިވެހިން ދައްކަމުން އަންނަ އެއްބައިވަންތަކާމެދު ފަހުރުވެރިވެ ވަޑައިގެންނަވާ ކަމަށެވެ.އަދި ފްރަންޓްލައިނަށް ނުކުމެ މަސައްކަތް ކުރަމުން އަންނަ ހުރިހާ ފަރާތްތަކުން ކުރަމުން އަންނަނީ ވަރުގަދަ ޖިހާދެއް ކަމަށް އެމަނިކުފާނު ވިދާޅުވިއެވެ.
ދުޔޭގެ އެންމެން ހަނާވާއިރުވެސް ލޮލަކަށް ނުފެނޭތޯ!