އެމްޑަބްލިޔުއެސްސީ ޕްލާސްޓިކާ ދުރަށް: ތާޒާ ފެންފުޅި ބިއްލޫރި ފުޅިއަށް ބަދަލު ކުރަނީ
މިފެށޭ އަހަރުގެ ފުރަތަމަ ކުއާޓަރުގައި ތާޒާ ފެން ބިއްލޫރިފުޅީގައި ބަންދުކޮށްގެން ބާޒާރަށް ނެރުމަށް ތައްޔާރުވަމުން އަންނަ ކަމަށް މާލޭ ވޯޓާ އެންޑް ސެވަރޭޖް ކޮންޕެނީ (އެމްޑަބްލިޔުއެސްސީ)ގެ މެނޭޖިން ޑިރެކްޓަރު ހަސަން ޝާހު ވިދާޅުވެއްޖެއެވެ.
ރާއްޖެޓީވީން ގެނެސްދިން "ފަލަ ސުރުޙީ" ޕްރޮގްރާމްގައި ވާހަަކަ ދައްކަވަމުން ޝާހު ވިދާޅުވީ އެއް ފަހަރު ބޭނުންކުރާ ޕްލާސްޓިކް މަދުކުރުމަށް ސަރުކާރުން ކުރަމުން އަންނަ މަސައްކަތުގެ ދަށުން އަންނަ އަހަރު 500 އެމްއެލް އިން ދަށުގެ ޕްލާސްޓިކްގެ ބާވަތްތައް ބާޒާރުން އެއްކޮށް ނައްތައިލުމަށް ސަރުކާރުން ނިންމާފައިވާ ކަމަށާއި އެގޮތުން އެމްޑަބްލިޔުއެސްސީން ވެސް އެކަން ހުއްޓާލާނެ ކަމަށެވެ.
"ތާޒާއަކީ އައިބީއެމްގެ ބްރޭންޑެއް. އައިބީއެމްއަށް ފެން އުފައްދައިދެނީ އެމްޑަބްލިޔުއެސްސީން. އެކަމަކު އެމްޑަބްލިޔުއެސްސީގެ އެބަހުރި މިހާރު ވިސްނުމެއް އަޅުގަނޑުމެން އެއަށް ބޭނުންވާ ފީސިބިލިޓީ ވެސް ހަދައިފީމު. އަދި އެއަށް ބޭނުންވާ ފައިނޭންސްވެސް ހަދައިފީމު. އިރާދަކުރެއްވިއްޔާ މިއަންނަ އަހަރުގެ ފުރަތަމަ ކުއާޓާ ތެރޭގައި އެމްޑަބްލިޔުއެސްސީގެ ބިއްލޫރި ފުޅިތައް މާކެޓަށް ނުކުމެގެންދާނެ،" އެޕްރޮގްރާމުގައި ވާހަކަ ދައްކަވަމުން ޝާހު ވިދާޅުވެފައިވެއެވެ.
މީގެއިތުރުން ޝާހު ވިދާޅުވީ ތާޒާ ފެނުގެ ބަދަލުގައި ނެރޭ ބިއްލޫރި ފުޅީގެ ނަން "އާރްއޯ" ބްރޭންޑްގެ ނަން ދިނުމަށް ނިންމައި މިހާރު ރެޖިސްޓާ ކޮށްފައިވާ ކަމަށެވެ. މިގޮތުން އެންމެ ފުރަތަމަ ނެރޭނީ އެއް ލީޓަރުގެ ތާޒާ ފެންފުޅި ކަމަށްވެސް ޝާހު ވިދާޅުވިއެވެ.
Ads by STO
