އިސްލާމީ މަރުކަޒު ވީރާނާވަމުން އަންނައިރު، މަރާމާތު ނުކުރާތީ ކަންބޮޑުވުން ފާޅުކޮށްފި
މަސްޖިދުއްސުލްޠާން މުޙަންމަދު ތަކުރުފާނުލް އަޢުޡަމް (އިސްލާމީ މަރުކަޒު) ގެ އާބާތުރަ ފިލުވާ ރަނގަޅަށް ބަލަހައްޓަމުން ނުދާ ކަމަށް ވިދާޅުވެ ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުޙަންމަދު ވަޙީދު (ވައްޑެ) ކަންބޮޑުވުން ފާޅުކޮށްފިއެވެ.
އިސްލާމީ މަރުކަޒުގައި ވީރާނާވެފައިވާ ބައެއް ތަންތަނުގެ ފޮޓޯއާއެކު ވައްޑެ ކުރެއްވި ޓްވީޓެއްގައި ވިދާޅުވެފައިވަނީ ކުރީގެ ރައީސް މައުމޫން ޢަބްދުލްޤައްޔޫމް ގެ ވެރިކަމުގެ ކުރީކޮޅުން ފެށިގެން ނުހަނު ލޯތްބާއެކު ބަލަހައްޓަމުން އަންނަ، ރާއްޖޭގެ ރަމްޒީ އެއް ބިނާ ކަމުގައިވާ އިސްލާމީ މަރުކަޒު ވީރާނާވަމުން އަންނަތަން ފެނުމަކީ ނުހަނު ހިތާމަވެރި ކަމެއް ކަމަށެވެ،
"އިސްލާމީ މަރުކަޒަކީ ރައީސްމައުމޫނުގެ ވެރިކަމުގެ ކުރީކޮޅުއްސުރެ ވަރަށް ލޯބިން ފަރުވާތެރިކަމާއެކު ބަލަހައްޓަމުން އަންނަ ރާއްޖޭގެ މުހިންމު ރަމްޒީ ބިނާއެއް. މިތަން ވީރާނާވަމުން އަންނަތަން ފެނުމަކީ ވަރަށް ހިތާމަވެރިކަމެއް. މިތަން ރަނގަޅަށް ބަލަހައްޓައިދެއްވާ!" ވައްޑު ވިދާޅުވެފައިވެއެވެ.
ވައްޑެގެ ޓްވީޓުގައި އިސްލާމިކް މިނިސްޓަރު އަހުމަދު ޒާހިރު ޢަލީ އާއި މިނިސްޓްރީ އޮފް އިސްލާމިކް އެފެއާޒް ޓެގް ކުރައްވާފައިވެއެވެ. ނަމަވެސް އެމިނިސްޓްރީ ގެ ފަރާތުން ވެސް އަދި މިނިސްޓަރ ޒާހިރު ވެސް ފަރާތުން ވެސް މިކަމަށް އެއްޗެއް އަދި ވިދާޅުވެފައެއް ނުވެއެވެ.
ރައީސް މައުމޫންގެ ވެރިކަމުގައި 1984 ވަނަ އަހަރު ހުޅުވި އިސްލާމީ މަރުކަޒަކީ، އެ ވެރިކަމުގައި އެންމެ ބޮޑު އިސްކަމެއް ދީގެން އެންމެ ފުރަތަމަ ބިނާ ކުރެއްވި އިމާރާތެވެ.
