އިސްލާމީ މަރުކަޒު މަރާމާތު ކުރުމުގެ މަސައްކަތް ދަނީ ކުރިއަށް: މިނިސްޓްރީ
އިސްލާމީ މަރުކަޒުގައި މިހާތަނަށް ކުރެވޭ އެންމެ ބޮޑު މަރާމާތުގެ މަސައްކަތް ކުރިއަށްދާ ކަމަށް އިސްލާމިކް މިނިސްޓްރީން ވިދާޅުވެއްޖެއެވެ.
އިސްލާމިކް މިނިސްޓްރީން މިއަދު ވިދާޅުވީ އިސްލާމީ މަރުކަޒުގައި މިހާތަނަށް ކުރެވޭ އެންމެ ބޮޑު މަރާމާތުގެ މަސައްކަތް ޚަލީފާ ފައުންޑޭޝަންއާ ހަވާލުކޮށްގެން 2019 ވަނަ އަހަރުން ފެށިގެން ކުރަމުން އަންނަ ކަމަށެވެ.
އެގޮތުން މަރުކަޒުގެ އެތެރޭގެ ބައެއް މަސައްކަތް ނިމި ބޭރުގެ ބައެއް މަސައްކަތް ކުރަމުންދާއިރު ގުއްބު އަދި މުންނާރުގެ ބޮޑެތި މަރާމާތުގެ މަސައްކަތްތަކެއް ކުރަން ވަނީ ތައްޔާރުވެފައިވާ ކަމަށް ވެސް އެ މިނިސްޓްރީން ވިދާޅުވިއެވެ.
ރަށްރަށުގެ މިސްކިތްތައް ބެލެހެއްޓުމާ ގުޅޭ ގޮތުން އެ މިނިސްޓްރީން ވިދާޅުވީ މިދިޔަ އަހަރުން ފެށިގެން މިސްކިތްތައް ބެލެހެއްޓުން ބަޖެޓާއެކު ކައުންސިލްތަކާ ހަވާލު ކުރެވިފައިވާ ކަމަށެވެ.
އިސްލާމިކް މިނިސްޓްރީން މިހެން ވިދާޅުވެފައި މިވަނީ، އިސްލާމީ މަރުކަޒުގެ ގެ އާބާތުރަ ފިލުވާ ރަނގަޅަށް ބަލަހައްޓަމުން ނުދާ ކަމަށް ވިދާޅުވެ ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުޙަންމަދު ވަޙީދު (ވައްޑެ) ކަންބޮޑުވުން ފާޅު ކޮށްފައިވާ ދަނޑިވަޅެއްގައެވެ.
