އުސޫލާ ޚިލާފަށް ރަށަށް އެރި މީހާ ކައުންސިލާ ހަވާލު ކޮށްފައެއް ނުވޭ: މާމެންދޫ ކައުންސިލު
ކޮވިޑް-19އާ ގުޅިގެން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ކަނޑައަޅާފައިވާ އުސޫލާއި ޚިލާފަށް ގއ. މާމެންދޫ އަށް އެރި މީހަކާ މެދު ފިޔަވަޅު އެޅުމަށް އެރަށު ކައުންސިލާ ހަވާލު ކޮށްފައިވާނެ ކަމަށް، ފުލުހުން ބުނި ބުނުން މާމެންދޫ ކައުންސިލުން ދޮގު ކޮށްފިއެވެ.
އޮންލައިން ނޫސް "ސީއެންއެމް" އަށް މައުލޫމާތު ދެއްވަމުން މާމެންދޫ ކައުންސިލު ރައީސް މުޙައްމަދު ޒައީމް ވިދާޅުވީ އެ މީހާ އެ ރަށުގައި ތާށިވެ، ކައުންސިލްގެ އިދާރާއަށް އައުމުން ފުލުހުންނަށް ގުޅި ކަމަށާއި އަދި ކައުންސިލް އިދާރާގެ މުވައްޒަފެއް އެ މީހާ ގޮވައިގެން ޕޮލިސް ސްޓޭޝަނަށް ދިޔަ ކަމަށެވެ.
ނަމަވެސް އެމީހާއަކީ ކުށެއް ކޮށްފައިވާ މީހަކަށް ނުވާތީ، ފުލުހުން އޭނާ ޖޫރިމަނާ ކޮށްފައި ދޫކޮށްލީ ކަމަށް ވެސް ޒައީމް ވިދާޅުވެފައިވެއެވެ.
ކައުންސިލަށް ނާންގާ ފުލުހުން އެމީހާ ކައުންސިލު ތެރެއަށް ދޫކޮށްލި ކަމަށާއި މި މައްސަލައިގައި އަތޮޅުގެ އިންޗާޖަށް ގުޅައި، ދެ މުއައްސަސާ ގުޅިގެން މިކަމަށް ހައްލެއް ގެންނަށް މަސައްކަތް ކުރުމަށް އެދުމުން ވެސް ފުލުހުންގެ މާ ބޮޑު އެއްބާރުލުމެއް ލިބިފައި ނުވާ ކަމަށް ވެސް މާމެންދޫ ކައުންސިލު ރައީސް ޒައީމް ވިދާޅުވި އެވެ.
މީގެ އިތުރުން ޒައީމް ވިދާޅުވީ މާލީ ފުދުންތެރިކަން ނެތުމުގެ ސަބަބުން އެމީހާއަށް އަމިއްލައަށް ފުރައިގެން ދެވެން ނެތް ކަމަށާއި، އޭނާއަށް އެހީތެރިވެވެން ކައުންސިލަށް ވެސް ނެތުމުން އެމީހާ އެރަށުގައި ތާށިވީ ކަމަށެވެ.
