ވާޝިޔާއާ އެކު ގަޑިއިރެއް: ކިޔައިދިނީ ބެލުންތެރިންނަށް ސަޕްރައިޒް އެތައް ވާހަކަތަކެއް

ދިވެހި ފިލްމީ ދާއިރާއިން މިއަދު އައު އެތައް މޫނުތަކެއް ފެންނަމުން އެބަދެއެވެ. ޒުވާން އެތައް ފަންނާނުންނެއް ކުރިއަރައިގެން ދާ މަންޒަރު އެބަފެނެއެވެ. ދެހާހުގެ ކުރީކޮޅު ފިލްމީ ދާއިރާއަށް ލޯ ހުޅުވާލި ބައެއް ތަރިން މިއަދު ދާއިރާއާ ވަކިވެފައިވާއިރު، އަދި ބައެއް ތަރިން ވަކިވުމަށް ވިސްނަމުންދާއިރު މިފަދަ ޒުވާން ފަންނާނުން ދިވެހި ފިލްމީ ދާއިރާއިން ފެނުމަކީ ހަމަ ޔަގީނުން ވެސް ބެލުންތެރިން އުފާ ކުރާނެ ކަމެކެވެ.

Ads by MWSC

ދިވެހި ފިލްމީ ދާއިރާގެ އުދަރެހަށް މި ފަހުން އަރައިގެން އައި ތަރިންގެ ތެރެއިން އެންމެ ވިދުން ގަދަ އަދި ބެލުންތެރިންގެ މެދުގައި އެންމެ މަގުބޫލުކަން ހޯދައިފައިވާ އެއް ތަރި އަކީ ވާޝިޔާ މުހައްމަދު (ޝިޔާ) އެވެ. ބައިސްކޯފްގެ ސީރީޒެއް ކަމަށްވާ "ތިން ބިބީ" އިން ފިލްމު އިންޑަސްޓްރީއަށް ނުކުތް މި ފަންނާނަކީ އުމުރުން ވަރަށް ހަގު އެހެނަސް، ކުޅަދާނަ، ހުނަރުވެރި އަދި މޮޅު ފަންނާނެކެވެ.

ވާޝިޔާގެ ފިލްމީ ކެރިއަރާ ބެހޭގޮތުން ވާހަކަ ދައްކާލުމުން އެނގިގެން ދިޔައީ މި ދާއިރާއަށް އޭނާގެ ހިތުގައި އޮތް ޝައުގުވެރިކަން އެކަންޏެއް ނޫނެވެ. އެއީ އެހާމެ ހިތްހެޔޮ މީހުންނާ ގުޅޭ ހިތްތިރި އަދި މަޖާ މިޒާޖެއްގެ މީހެއްގެ ވެސް މެއެވެ.

ވާޝިޔާގެ ފިލްމީ ކެރިއަރު އަލިފުން ޔާ އަށް އޭނާ ވަނީ "ދެން"އާ ހިއްސާ ކޮށްފައެވެ.

ޅަފަތުގައި ފިލްމު ކުޅެން ޝައުގުވެރިކަން ހުރިތަ؟

ޒުވާން ތަރި ވާޝިޔާއަކީ ކުރިން ވެސް ފިލްމު ކުޅެން ޝައުގުވެރިކަން ހުންނަ ކުއްޖެއް ކަމަށެވެ. އެހެން ނަމަވެސް ފިލްމު ތަކުގެ މާ ބޮޑެތި ރޯލް ތަކުން އަދި ލީޑް ރޯލުތަކުން ފެނުމަކީ ވާޝިޔާ އޭރު ބޭނުންވި ކަމެއް ނޫނެވެ. އޭނާގެ ވިސްނުމުގައި އެއަށްވުރެ ބޮޑަށް ހުރީ އޭރު ހުރީ ކޮންމެވެސް ކަހަލަ ސަޕޯޓިންގ ރޯލަކުން ފިލްމީ ދާއިރާއިން ފެނިލުމުގެ ވިސްނުމެވެ. އެހެން ކަމުން ގަބޫލު ކުރެވޭ ގޮތުގައި ކެރިއަރެއްގެ ގޮތުގައި ފިލްމީ ދާއިރާ ޚިޔާރު ކުރުމަކީ އޭނާ އޭރު ވިސްނި ކަމެއް ނޫނެވެ.

ދެން އިމޭޖަސް/ޝަމްވީލް

ސްކޫލް ދައުރުގައި ތަމްސީލްތަކުގައި ނަގާކިޔާ

ސުކޫލް ދައުރުގައި ތަމްސީލް ޑްރާމާ ތައް ކުޅުމަކީ ވަރަށް ގިނަ ދަރިވަރުން ޝައުގުވެރިކަން ހުންނަ ކަމެކެވެ. އެގޮތުން ވާޝިޔާ އަކީ ވެސް އޭނާގެ ސުކޫލް ދައުރުގައި ގިނަ ތަމްސީލް ޑްރާމާ ތަކެއްގައި ބައިވެރިވި ކުއްޖެކެވެ. މާފަންނު މަދަރުސާ، ޣިޔާސުއްދީން އިންޓާރނޭޝަނަލް ސުކޫލް އަދި މެޕްސް އިންޓާރނޭޝަނަލް ހައި ސުކޫލްގައި ވެސް ތައުލީމް ހާސިލް ކުރި ވާޝިޔާ ވަނީ އޭނާގެ ސުކޫލް ދައުރުގެ ބައެއް ހަނދާންތައް ވެސް "ދެން"އާ ހިއްސާ ކޮށްފައެވެ.

ސުކޫލް ދައުރުގައި ކުޅުނު ތަމްސީލް ތަކުގެ ތެރެއިން އޭނާ އެންމެ ހަނދާން ހުންނަނީ، އޭނާ ފަންޑިތަ ހަދާ ފިރިހެނެއްގެ ރޯލުން ފެނިގެންދާ ތަމްސީލެކެވެ. އެއީ އޭނާ ގްރޭޑް 6ގައި ތަމްސީލް ހާސިލު ކުރި ދުވަސްވަރު ކަމަށާއި އެއީ ކެރެކްޓަރ އެއްގެ ތެރެއަށް އެހާ ބޮޑަށް ވަދެވުނު އެންމެ ފުރަތަމަ ފަހަރު ކަމުގައި ވެސް އޭނާ ފާހަގަ ކުރިއެވެ. އަދި އެކްޓިންގ އަކީ ކޯއްޗެއް ކަން އެންމެ ފުރަތަމަ ފަހަރަށް އޭނާއަށް އެނގިގެން ދިޔައީ ވެސް އެ ތަމްސީލް ކުޅުމުންނެވެ. އަދި އެ ތަމްސީލްގެ އިތުރަށް ސްކޫލް ދައުރު ނިމެންދެން ވެސް އޭނާ ވަނީ އެތައް ތަމްސީލެއް ކުޅެފައެވެ.

"ތިން ބިބީ" އިން ފިލްމީ ދާއިރާއަށް

2018ގެ އެ ދުވަސްވަރަކީ ބައިސްކޯފު ދިވެހިންގެ ތެރެއަށް ތަޢާރަފުވި ދުވަސްވަރު ކަމުން އެދުވަސްވަރު، ބައިސްކޯފަކީ އާންމުންގެ މެދުގައި އެހާ މަގްބޫލު ޕްލެޓްފޯމެއް ނޫނެވެ. ވާޝިޔާއަށް "ތިން ބިބީ" ކުޅުމުގެ ދައުވަތު އައީ ވެސް އެ ދުވަސްވަރުއެވެ. އެގޮތުން އޭނާގެ އެކުވެރިއެއް ކަމަށް ވާ ދިވެހި ފިލްމީ ދާއިރާގައި މިއަދު ފިޔަަޖަހަމުން އަންނަ ތަރި ނަތާޝާ އޭނާއަށް އެ ދައުވަތު ދިނެވެ.

"ތިން ބިބީ" ސީރީޒަކީ ނަތާޝާގެ އެކުވެރިއެއް ކަމަށްވާ މުންކޮ ތައްޔާރު ކުރަން އުޅުނު ސީރީޒެކެވެ. އެހެން ކަމުން ނަތާޝާގެ ގާތުގައި އެކްޓް ކުރަން ޝައުގުވެރިކަން ހުރި ކުއްޖަކު އުޅޭނަމަ އަންގާލަދިނުމަށް މުންކޮ އޮތީ އެދިފައެވެ. ކޮންމެއަކަސް، ނަތާޝާގެ މި ދައުވަތު އެންމެ ފުރަތަމަ ވާޝިޔާ ގަބޫލެއް ނުކުރިއެވެ. އެތައް ސަބަބު ތަކަކާ ހެދިއެވެ. އޭނާއަށް އެކްޓް ކުރެވޭނެ ކަން އޭނާއަށް އޭރު ގަބޫލު ނުކުރެވޭތީއެވެ. އަދި އޭނާ އަކީ އެހެން މީހުންނާއެކު މަސައްކަތް ކުރަން ވަރަށް ލަދު ގަންނަ މީހަކަށް ވާތީއެވެ. އޭނާއަށް ސަކަރާތްޖަހައި "ކޫލް" ކޮށް އުޅެވޭނީ ހަމައެކަނި ރައްޓެހިންގެ ގާތުގައި ކަމަށް ވާތީއެވެ،

އެކްޓް ކުރަން ވީމަ ޝިޔާ އޭތި މައިންޑްގަ އިނީ ވެސް ވަރަށް ބިރުވެރި ކޮށް، އެކްޓް ކުރަން ޖެހޭ ހިސާބުން މީހުންނަށް އެނގޭނޭ މީހުން ބަލާނޭ މީހުން ހިތަށް އަރާނެ އެއްޗަކާ ދޭތެރޭ. އެގޮތަށް އުނދަގޫވެފަ ނަފްސާނީ ވެފައި ހުރީ

ދެން އިމޭޖަސް/ޝަމްވީލް

ވާޝިޔާ "ތިން ބިބީ" ދޫކޮށްލިޔަސް ތިން ބިބީން ވާޝިޔާ ދޫކޮށެއް ނުލި

ނަތާޝާއާއި ވާޝިޔާއާ ދެމެދު މިވާހަކަ ދެކެވުނުތާ ދެތިން ދުވަސް ފަހުން ވާޝިޔާ ދިރާގުގެ އިސްތިހާރެއް ކުޅެން ދިޔައެވެ، ކަން ދިމާކުރި ގޮތުން އެތަނުން ވެސް ވާޝިޔާއާ ކުރިމަތިލާން ޖެހުނީ "ތިން ބިބީ"އާ އެވެ. އެއީ ތިން ބިބީގެ ޕްރޮޑިއުސަރު މުންކޮއާ ވާޝިޔާއާ ބައްދަލުވި ފުރަތަމަ ފަހަރެވެ.

ދިމާވީމަ މުންކޮ ބުނަނީ ނަތާ ދެއްކި ހެއްޔޯ އެއްވެސް ވާހަކައެއް ބުނީމަ ޝިޔާ އަހާލިން ތިއީ އެ މުންކޮ ހޭ، އެގޮތަށް ކޮންވަރޒޭޝަން ބިލްޑް ވީ

އެހިސާބުން ވެސް ވާޝިޔާ ތިން ބިބީ ކުޅެން އާނ ބަހެއް ނުބުނެއެވެ. އެހެން ނަމަވެސް "ޓްރައި" ކުރެވިދާނެ ކަމުގައި މުންކޮ ގާތުގައި އޭނާ ބުންޏެވެ. ވާޝިޔާ އަކީ އޭނާ ބުނާ ބަހެއްގައި ނަމަ ހިފަހައްޓާ މީހެއް ކަމުން އެހިސާބުން އޭނާ ނިންމީ ތިން ބިބީ ކުޅުމަށެވެ.

ދެން އޯކޭއޭ ކޮންމެ ގޮތެއް ވިޔަސް ކުރާނީ އޭ އެކްޓް ކުރަން ނޭނގުނަސް ލެޓްސް ސީއޭ ދޯ

ތިން ބިބީގައި ވާޝިޔާގެ ތަޖުރިބާ

ވާޝިޔާގެ ފުރަތަމަ ފެނިލުމަކީ ތިން ބިބީ ކަމުގައި ވީ ނަމަވެސް އޭނާއަށް އެ ޕްރޮޖެކްޓުގައި މަސައްކަތް ކުރުމަކީ މާ އުނދަގޫ ކަމަކަށް ނުވިއެވެ. ސަބަބަކީ މުންކޮގެ ފަރާތުން އޭނާއަށް ލިބިގެން ދިޔަ އެހީތެރިކަމެވެ. މުންކޮއާ އެކު މަސައްކަތް ކޮށްލަން ފަސޭހަ ކަމެވެ. އެހެން ނަމަވެސް ވާޝިޔާ ދިޔައީ އޭނާ އަދިވެސް ބިރު ގަންނަ ކަމަށާއި އަދި ޖެހިލުން ވާ ކަމަށް ވެސް މުންކޮ ގާތުގައި ބުނަމުންނެވެ. އެހެން ނަމަވެސް ފިލްމީ ދާއިރާއަށް ލޯހުޅުވާލުމަށް ވާޝިޔާއަށް ހިތްވަރު ދިނީ ،މުންކޮއެވެެ.

މުންކޮ އަބަދުވެސް ބުނާނެ ދޯ ޝިޔާއަށް ވާނޭ، ދެން ވަރަށް ސަޕޯޓިވް

ތިން ބިބީގެ ޝޫޓިން ފެށި އިރު ވާޝިޔާގެ އުމުރަކީ އެންމެ 19 އަހަރެވެ. އޭނާއާ އެކު އެ ސީރީޒްގައި މަސައްކަތް ކުރި އެހެން ހުރިހާ ފަންނާނުންނަކީ ވެސް އޭނާއަށްވުރެ އުމުރުގެ ގޮތުން ދޮށީ ފަންނާނުންނެވެ. އެގޮތުން އެ ސީރީޒަކީ ވާޝިޔާ އަދި ނަތާޝާގެ ފުރަތަމަ ފެނިލުމެވެ. ނަމަވެސް އެކުގައި މަސައްކަތް ކުރި އަނެއް ފަންނާނުންނަކީ އޭގެ ކުރިން ވެސް ދާއިރާގެ މަސައްކަތް ތަކުން ފެނިފައިވާ ފަންނާނެކެވެ. އެހެން ކަމުން ނަތާޝާ އަދި ވާޝިޔާ މަސައްކަތް ކުރީ"ޑިސަޕޮއިންޓް" ނުވާނެ މިންވަރަކަށް މަސައްކަތް ކުރާށެވެ.

ތިން ބިބީގެ ޝޫޓިންގް ގެ ތެރެއިން ވާޝިޔާ އެހެން ބައިވެރިންނާއެކު

އެންމެ ފުރަތަމަ ނެގި މަންޒަރު ތަކަކީ އަތުގައި ކާޑް ތަކެއް "ޝަފުލް" ކުރާ މަންޒަތުތަކެކެވެ. އެހެން ނަމަވެސް އެ ދުވަހު ވެސް ވާޝިޔާ ޝޫޓިންގ އަށް ދިޔައީ ވަރަށް ރީތި ވެލައިގެންނެވެ. ޝޫޓިން ކުރިއަށް ދާން ފެށުމުން މުންކޮ އޭނާ ގާތުގައި ހަމައެކަނި އަރާނީ އަތް ކަމުގައި ބުންޏެވެ. އެހެން ނަމަވެސް ކެމެރާ އިންގޮތުން އޭނާއަށް ހީވީ އޭނާގެ މޫނު ވެސް އަރާ ހެންނެވެ.

ވާޝިޔާ ބުނީ އެންމެ ފުރަތަމަ ތިން ބިބީގެ ޝޫޓިންގ އަށް ދިޔައިރު އެވަރުވެސް ނޭނގޭ ކަމަށެވެ. އެހެން ނަމަވެސް ޝޫޓިންގައި ހޭދަ ކުރެވުނު ކޮންމެ ވަގުތަކީ ވެސް ވަރަށް މަޖާ އަދި އެހާމެ ހިތްހަމަ ޖެހޭ ވަގުތުތަކެއްގެ ގޮތުގައި އޭނާ ފާހަގަ ކުރިއެވެ،

މިހާރު "ތިން ބިބީ" ކުޅެލަން ލިބިއްޖެ ނަމަ މާ ރީއްޗަށް ކުޅެވޭނެކަން ޔަގީން

ތިން ބިބީގެ މަސައްކަތާ ދޭތެރޭ ހިތްހަަމަ ޖެހޭތޯ ކުރި ސުވާލަކަށް ޖަވާބު ދެމުން ވާޝިޔާ ބުނީ އެއަށްވުރެ ރަނގަޅަށް އެ މަސައްކަތް ކުރެވޭނެ ކަމަށް މިހާރު ގަބޫލު ކުރާ ކަމަށެވެ. އޭރު މަސައްކަތާމެދު ހިތްހަމަ ޖެހުނު ނަމަވެސް މިހާރުގެ ބެސްޓާއި އޭރުގެ ބެސްޓް ވަރަށް ތަފާތު ވާނެ ކަމުގައި ފާހަގަ ކުރިއެވެ.

މީގެ އިތުރުން، ތިން ބިބީ އަލުން ކުޅެލަން ލިބޭނެ ނަމައޭ ހިތަށް އަރާ ކަމުގައި ވެސް ވާޝިޔާ ބުންޏެވެ. ނަމަވެސް އެ ޓީމާއެކު އެ ދުވަސްވަރު ކުރެވިފައިވާ މަސައްކަތާ މެދު ވާޝިޔާ ވަރަށް ހިތްހަމަ ޖެހެއެވެ. އަދި ބެލުންތެރިން ވެސް އެ ސީރީޒްއާ ދޭތެރޭ އަދި އޭނާގެ އެކްޓިންގއާ ދޭތެރޭ ވެސް ވަރަށް ފައްސި ވާހަކަތަކެއް ދެއްކި ކަމުގައި ވާޝިޔާ ބުންޏެވެ.

"އޭރު ޝިޔާގެ ބެސްޓް އޭނީ ދީފަ، އޭރުގެ ބެސްޓާ މިހާރުގެ ބެސްޓާ ހާސްބައި ތަފާތު. ދެން ފީލް ވަނީ ރީ ޓްރައި އެއް ލިބޭނެ ނަމައޭ ތިން ބިބީ ކުޅެން ވެސް. ދި ޓީމް އިޒް އެވްރީތިން، އައިއެމް ހެޕީ"

ހަމަ އެހެންމެ ބެލުންތެރިންގެ ފަރާތުން ވެސް ތިންބިބީއަށް ވަރަށް ބޮޑު ތަރުހީބެއް ލިބިގެން ދިޔަ ކަމުގައި ވާޝިޔާ ފާހަގަ ކުރިއެވެ. އަދި އެގޮތަށް އަހްލާގު ހިފަހައްޓައިގެން ހިތްވަރާއެކު ކުރިއަށް ދާން މަސައްކަތް ކުރާ ނަމަ "ސްޓާރ"އަކަށް އޭނާއަށް ވެވިދާނެ ކަމަށް މުންކޮ ބުނި ކަމުގައި ވެސް ވާޝިޔާ ފާހަގަ ކުރިއެވެ.

ވާހަކަފޮތުގައި ވެސް ނެތް ކެރެކްޓަރއަކުން ވާޝިޔާއަށް "އެހެނަސް"

ތިން ބިބީ ސީރީޒް ވެގެން ދިޔައީ ވާޝިޔާއަށް ދާއިރާގައި ކުރިއަށް ދިއުމަށް ވަރަށް ބޮޑު ހިތްވަރެއް ލިބިގެން ދިޔަ ސީރީޒަކަށެވެ. އެ ސީރީޒުން އޭނާއަށް ބެލުންތެރިންގެ ފަރާތުން އަދި އެކުގައި މަސައްކަތް ކުރި ޓީމުގެ ފަރާތުން ލިބިގެން ދިޔަ ތަރުހީބުގެ ސަބަބުން ފިލްމު ކުޅެވިދާނެ ކަން އޭނާއަށް ގަބޫލު ކުރެވުނެވެ.

ތިން ބިބީއަށް ފަހު ވާޝިޔާ ފެނިގެން ދިޔައީ "ދި ބައިސްކޯފް ޝޯވ" އިންނެވެ. އެ ޝޯވ އަކީ ބައިސްކޯފްގެ އަދާހަމަތައް ބެލުންތެރިންނާ ހަމައަށް ގެނެސްދިނުމަށްޓަކައި ނާއި އާއި އިގްބާލް ހޯސްޓްކޮށް ވީޓީވީން ގެނެސްދިން ޝޯވއެކެވެ. އެ ޝޯވ ހުށަހެޅުމުގެ ފުރުސަތު ވާޝިޔާއަށް ލިބުންވީ ނަސީބު އައިސް އޭނާގެ އަތުގައި ހިފަން މަގުފަހި ކުރުވި ކަމަކަށެވެ.

އެހެނަސް ގެ ޝޫޓިންގްގެ ތެރެއިން ވާޝިޔާ އިތުރު އެހެން ފަންނާނުންނާއެކު

ދިވެހީންގެ ތެރޭގައި މި ފަހުން އެންމެ މަގުބޫލުވި ޑްރާމާ ސީރީޒް "އެހެނަސް" އަކީ އިގްބާލްގެ އުފެއްދުމެކެވެ. އަދި ދި ބައިސްކޯފް ޝޯވ އިން އިގްބާލް އަށް ވާޝިޔާއާ ބައްދަލުވެ އޭނާއަށް ވާޝިޔާގެ ފަރާތުން ހުނަރުވެރިކަން ފެނިގެން ދިޔައެވެ. އަދި އެހެނަސްގެ ވާހަކަ ފޮތުގައި ނުވެސް ނެތް ކެރެކްޓާރއެއް އޭނާ މި ޑްރާމާ ސީރީޒަށް އުފަން ކުރިއެވެ. އެއީ އެ ސީރީޒްގައި ވާޝިޔާ ފެނިގެންދާ ރޯލް "ޕިންކް"އެވެ.

މި ފުރުސަތު ލިބުމާއެކު ވާޝިޔާއަށް ލިބުނީ ބަޔާން ކުރަން ވެސް ދަތި އުފާވެރި ކަމެކެވެ. ސަބަބެއް ނެތިއެއް ވެސް ނޫނެވެ. މި ފުރުސަތު އޭނާއަށް ލިބުނުއިރު ވެސް އޭނާ ދިޔައީ "އެހެނަސް" ސީރީޒް ގަވައިދުން ބަލަމުންނެވެ. އަދި މި ސީރީޒަކީ ދިވެހި އެހެން ސީރީޒްތަކާ ތަފާތު، މޮޅު ސީރިޒަކަށް ވާތީ މި ސީރީޒްގައި މަސައްކަތް ކޮށްލުމުގެ ފުރުސަތު އޭނާއަށް ލިބުމުން އޭނާ ނުހަނު އުފާވި ކަމުގައި އޭނާ ބުންޏެވެ.

އެހެނަސްގައި ވެސް ވާޝިޔާގެ ފަރާތުން ފެނިގެން ދިޔައީ ތަފާތު މޮޅު އެކްޓިންގ އެކެވެ. އަދި ބެލުންތެރިންގެ މެދުގައި ބޮޑު މަގުބޫލުކަމެއް ހޯދި މި ސީރީޒް ވާޝިޔާގެ މި ރޯލާއެކު އިތުރަށް ފުރިހަމަ ވެގެން ދިޔައެވެ.

ބެލުންތެރިންނަށް ސަޕްރައިޒެއް

ވާޝިޔާގެ ކުރިއަށް ހުރި މަސައްކަތްތަކާ ބެހޭ ގޮތުން "ދެން" އިން ކުރި ސުވާލަކަށް ޖަވާބު ދެމުން ވާޝިޔާ ވަނީ ބެލުންތެރިންނަށް ވަރަށް އަވަހަށް ސަޕްރައިޒެއް ލިބިގެންދާނެ ކަމަށް ބުނެފައެވެ. އެ ސަޕްރައިޒްގެ މަސައްކަތް މިހާރު ވެސް ކުރިއަށް އެބަ ދާ ކަމަށާއި އެއީ އޭނާ އެކްޓު ކޮށްފައިވާ ވީޑިއޯ ލަވައެެއް ކަމުގައި ވެސް އޭނާ ބުންޏެވެ. ނަމަވެސް އެލަވައާ ބެހޭގޮތުން އަދި އިތުރަށް ވާހަކަ ދެއްކެން ނެތްކަމުގައި ފާހަގަކުރަމުން ވާޝިޔާ ބުނީ އެއީ ގިނަ ބައެއްގެ "ފޭވަރިޓް" ލަވައެއް ކަމަށެވެ.

"ވަރަށް ލޯބި ލަވައެއް ދޯ. ޝިޔާގެ ވެސް ވަން އޮފް ދި ފޭވަރިޓް އެއީ ހަމަ ފެށުނީއްސުރެއްވެސް. އެ ލަވައިގައި އުޅެން ޝިޔާއަށް ލިބުނީމަ އެތައް އަހަރެއް ފަހުން"

މީގެ އިތުރުން ހަމަ އެމްވީގެ ފަރާތުން އުފައްދާ ސީރީޒްއެއް ކަމަށްވާ "ސަަފަރު"ގެ މަސައްކަތް ވެސް ކުރަމުން ގެންދާ ކަމުގައި ވާޝިޔާ ބުންޏެވެ. އެ ސީރީޒަކީ ފިލްމީ ދާއިރާއަށް މުޅިން އައު ތަރިއެއް ވެސް ފެނިގެންދާނެ ސީރީޒެއްގެ ގޮތުގައި ވާޝިޔާ ފާހަގަ ކުރިއެވެ. މި ސީރީޒް ވެގެން ދާނީ ވާޝިޔާގެ އެންމެ ފުރަތަމަ "ތްރިލާ" ސީރީޒަށެވެ.

ހާޖަރާ އާއި ސިއްތިފުޅާއެކު ވަރަށް "ލައުޑް" ސީނެއް ކުޅެލަން ބޭނުން

ދިވެހި ފިލްމީ ދާއިރާގައި ނަވާރަސަތޭކައިގެ އަހަރުތަކުގެ ތެރޭގައި އެންމެ އުހުގައި އުޅުނު ފަންނާނުންގެ ތެރޭގައި ހާޖަރާ އާއި ސިއްތިފުޅު ހިމެނެއެވެ. އަދި މިއަދު ވެސް މިދެ ފަންނާނުންގެ މަޖާ އަދި ރުޅިގަދަ މަންޒަރުތައް އެތައް ބަޔަކު ބަލައެެވެ. އަދި އެ ފަންނާނުން ދުނިޔޭގައި ނެތްކަމުގައި ވިޔަސް އެމަންޒަރުތައް ނަކަލު ކޮށް އެ ފަންނާނުންގެ ހަނދާން އައު ކުރާ އެތައް ދިވެހީންނެއް މިއަދު ވެސް އުޅެއެވެ.

ވާޝިޔާ އަކީ ވެސް އެފަދަ ދިވެއްސެއްކަން ގައިމެވެ. ފިލްމީ ދާއިރާއަށް އޭނާ ނުކުތުމުގެ ކުރިން ވެސް އޭނާ އަކީ ހާޖަރާ އަދި ސިއްތިފުޅުގެ ވަރަށް ބޮޑު ފޭނެކެވެ. އަދި މި ދެފަންނާނުންނާއެކު ވަރަށް "ލައުޑް" ސީނެއް ކުޅެލަން ބޭނުންވާ ކަމުގައި ވާޝިޔާ "ދެން"އާ ވާހަކަ ދައްކަމުން ބުންޏެވެ.

ވާޝިޔާ އިތުރަށް ފާހަގަ ކުރީ މިދެފަންނާނުންނަކީ ހަގީގަތުގައި ވެސް ވަރަށް ހުނަރުވެރި ދެ ފަންނާނުން ކަމަށެވެ. އެގޮތުން ކުރީގެ ފިލްމުތަކުގައި ދައްކުވައިދޭ ރުޅިގަދަ ސީންތަކުގައި އެތައް އިރެއް ވަންދެން ހުއްޓާނުލާ "ރާސްޓަސް"ކިޔާފައި ކޮށިކަމެއް ނެތި، ކުށެއް ނުޖެހި ބޮޑެތި ޑައިލޮގްތައް ނިންމާލާ ކަމުގައި އޭނާ ފާހަގަ ކުރިއެވެ. އަދި އެގޮތަށް އެ ފަންނާނުންނާއެކު "ފަތިވަރުތަކެއް އަމުނާލަން" ބޭނުންވާ ކަމުގައި ޝިޔާ ހެވިފައި އިނދެ ބުންޏެވެ.

ޒުލޭހާގައި "ޝީލާ"ގެ ރޯލްގެ ރިމޭކެއް ހަދަން ބޭނުން

ކުރީގެ ދިވެހި ފިލްމުތަކުގެ ރިމޭކެއް ހަދަން ލިބިއްޖެ ނަމަ ރިމޭކް ހަދާނީ ކޮން ފިލްމެއްގެ ކޮން ކެރެކްޓާރއެއްގެތޯ ވާޝިޔާއާ ސުވާލު ކޮށްލީމެވެ. ޖަވާބުގައި ވާޝިޔާ ބުނީ އެއް ފިލްމު ހިޔާރު ކުުރުން ވާނީ ވަރަށް އުނދަގޫ ކަމަކަށް ކަމަށާއި ވަރަށް ގިނަ ފިލްމުތަކުގެ ރިމޭކް ހަދަން ބޭނުންވާ ކަމަށެވެ. އަދި އެތަނުން ދެތިން ފިލްމެއްގެ ނަން އޭނާ "ދެން"އާ ހިއްސާ ކުރިއެވެ.

އެންމެ ފުރަތަމަ ވާޝިޔާ ބުނީ ކަލާޔާނުލާގައި ނިއުމާ ކުޅެފައިވާ "ނާޒް"ގެ ރޯލްގެ ރީމޭކެއް ހަދަން އޭނާ ބޭނުންވާ ކަމަށެވެ. އަަދި ދެވަނަ އަށް އޭނާ ބުނީ ފިލްމު ޒުލޭހާގައި ޝީލާ ކުޅެފައިވާ ޒުލޭހާ މަންމަގެ ރޯލް ކުޅެލަން އޭނާ ވަރަށް ބޭނުންވާ ކަމަށެވެ. އަދި މީގެ އިތުރުން އުދަބާނި ފިލްމުގައި އާމިރާ ކުޅެފައިވާ ރޯލުން ވެސް އޭނާ ފެންނަން ބޭނުންވާ ކަމުގައި އޭނާ ފާހަގަ ކުރިއެވެ.

ދެން ފަތިސް ހަނދުވަރުގައި "ޖިންނި ކުޑަކުއްޖާ"ގެ ރޯލްގައި ވެސް އުޅެން ބޭނުން.

ލަވައެއްގެ ރިމޭކް ހަދަން ލިބިއްޖެނަމަ ވާޝިޔާ ރިމޭކް ހަދާނީ ކޮންލަވައެއް ބާ؟

ލަވައެެއްގެ ރިމޭކެއް ހަދަން ލިބިއްޖެ ނަމަ ވާޝިޔާ އެންމެ ބޮޑަށް ކުޅެން ބޭނުންވާ ލަވައަކީ ދިވެހީންގެ ތެރޭގައި ސުޕަރ ހިޓް ލަވައެއް ކަމަށްވާ "މަ ހޭނެތި ދާނޭ" އެވެ. އެ ލަވައަކީ ޝިރާނީ މީގެ ކުރިން އެކްޓް ކޮށްފައިވާ ލަވައެކެވެ. އެގޮތުން އެލަވައިގައި ޝިރާނީގެ ރޯލް އޭނާ ކުޅެލަން ބޭނުންވާ ކަމަށް ވާޝިޔާ ބުންޏެވެ.

މީގެ އިތުރުން، ނިއުމާގެ "ފުރަތަމަ ވެސް ފެނުނީމާ" އާއި "ޖާނޭ ދޫވެ ޖާން"ގެ ވެސް ރިމޭކެއް ހަދަން ބޭނުންވާ ކަމުގައި ވާޝިޔާ ފާހަގަ ކުރިއެވެ. އަދި އަލީ ރަމީޒްގެ "ފިނިފެން މަލެކޭ" ލަވައިގައި ވެސް އުޅެން ބޭނުންވާ ކަމުގައި ވާޝިޔާ ބުންޏެވެ.

މީގެ އިތުރުން ކޮންމެ ގޮތެއް ވިޔަސް ރިމޭކެއް ހަދާނެ ލަވައެއް ކަމުގައި ވާޝިޔާ ފާހަގަކުރީ، "ޖާނޭ ދޫވެ ޖާން" މިލަވައެވެ. މަޖާ ރާގެއްގައި ވާޝިޔާ "ދެން"އާ ވާހަކަ ދައްކަމުން ބުނީ، އޭނާ އާއި އޭނާގެ އެކުވެރި ޝިފާއާ ދެމީހުން ވެގެން ނަމަވެސް މި ލަވަ ކުޅެން ވަރަށް ބޭނުންވާ ކަމަށެވެ. އަދި މަޖާ ރާގެއްގައި ވާޝިޔާ ބުނީ މިހާރު ނަމަ އެލަވައިގެ ޝޫޓިންގ ގެ ތެރެއިން ހިނގާފައި ދާން ޖެހޭނީ ދަރުމަވަންތަ ހޮސްޕިޓިލް ކައިރިން ކަމަށެވެ.

ރީކޯ މޫސައާ އެކު ފަތިސް ހަނދުވަރު ކުޅެން ވަރަށް ބޭނުން

ދިވެހި ފިލްމީ ދާއިރާ މިހާރު ދޫކޮށްލާފައިވާ ފަންނާނުންގެ ތެރެއިން އެކުގައި މަސައްކަތް ކޮށްލަން އެންމެ ބޭނުންވާ ފިރިހެން ތަރިއަކީ ކޮބާތޯ ވާޝިޔާއާ ސުވާލު ކޮށްލީމެވެ. އޭނާ ބުނީ ރީކޯ މޫސައާ އެކު ފަތިސް ހަނދުވަރުގައި އުޅެން އޭނާ ބޭނުންވާ ކަމަށެވެ. އަދި ރީކޯ މޫސަ އެކްޓް ކޮށްފައިވާ މަޝްހޫރު ލަވަ "ދަނީހެ އައިސްބަލާ"ގައި ވެސް ރީކޯއާއެކު އެކްޓް ކޮށްލަން ވަރަަށް ބޭނުންވާ ކަމުގައި ވާޝިޔާ ފާހަގަ ކުރިއެވެ.

" އޯކޭ ޝިޔާ ހިނގާފާނަން މުޅި ލަވައިގައި ވެސް ޝިޔާ ހަމަ ހިނގަހިނގާ ހުރެފާނަން، ހަމަ ރީކޯ މޫސަ ޝިޔާ ފަހަތުން އައިސް އައިސް ހުންނަންޏާ އޯކޭ "

ވާޝިޔާ އިތުރަށް ފާހަގަ ކުރީ އޭނާއަށް ރީކޯ މޫސާއާ 2018 ވަނަ އަހަރު ބައްދަލުވީ ކަމަށެވެ. އަދި އެފަހަރު މޫސަ ގާތުގައި އޭނާއާއެކު ލަވައެއްގައި އުޅެލަން ބޭނުންވާ ވާހަކަވެސް ބުނި ކަމުގައި ވާޝިޔާ ފާހަގަކުރިއެވެ. އަދި ޖަވާބުގައި ރީކޯ މޫސަ ބުނީ އެދުވަސް މިހާރު ގޮސްފި ކަމަށް ކަމުގައި ވެސް ވާޝިޔާ ބުންޏެވެ.

ޝިޔާގެ މިސްރާބު ދާއިރާގެ އެންމެ އުހަށް

ފިލްމީ ދާއިރާގައި ވާޝިޔާ އެންމެ ދެކެން ބޭނުންވާ ދުވަހަކީ އޭނާއަށް ސްޓޭޖް މަތިން އެވޯޑެއް ލިބޭ ދުވަހެއް ނޫނެވެ. އަދި ގިނަ ފިލްމުތަކެއް ކުޅުމެއް ވެސް ނޫނެވެ. އޭނާ ދެކޭ ހުވަފެނަކީ ކެމެރާ ކުރިމަތީގައި ވިޔަސް އަދި ކެމެރާ ފުރަގަހުގައި މަސައްކަތް ކޮށްގެން ވިޔަސް އޭނާގެ މަަސައްކަތްތައް އިންޑަސްޓްރީގެ ނަންހިނގާ ފަރާތްތަކުން ގަބޫލު ކުރާ ދުވަހެއް އައުމެވެ. އެގޮތުން މޭކަޕް އާރޓިސްޓެއްގެ ގޮތުން ކަމުގައި ވިޔަސް، ނުވަތަ އެހެން ވެސް މަސައްކަތެއް ކޮށްގެންވިޔަސް އިންޑަސްޓްރީގެ ތެރޭގައި ނަން ހިނގާ މީހުން އޭނާގެ މަސައްކަތްތައް ބަލައިގަތުމަކީ އޭނާ ވަރަށް ބޭނުންވާ ކަމެއްގެ ގޮތުގައި ވާޝިޔާ ފާހަގަ ކުރިއެވެ.

ދަ ބައިސްކޯފު ޝޯވް ގެ ޝޫޓިންގް ގެ ތެރެއިން ވާޝިޔާ

ފިލްމީ ދާއިރާގެ އެވޯޑެއް ލިބުމަކީ އަދި މާ ދުރުގައި އޮތް ކަމެއް ކަމަށާއި އެކަމަށްޓަކައި ކުރަން ޖެހޭ މަސައްކަތްތައް އަދި ކުރިއަށް އޮތީ ކަމުގައި އޭނާ އިތުރަށް ފާހަގަ ކުރިއެވެ. އަދި އޭނާ ކުރިއަށް ދާން ބޭނުންވަނީ "އާރޓް ޑައިރެކްޝަން"ގެ ދާއިރާއިން ކަމުގައި ވެސް ވާޝިޔާ ފާހަގަ ކުރިއެވެ.

އެންމެ ފަހުން އޮފް ޑޭ އެއް ނެގި ދުވަހެއް ހަނދާނެއް ނެތް

އަމިއްލަ ދިރިއުޅުމުގައި އެހެން މީހުންނެކޭ ވެސް އެއްފަދައިން ވާޝިޔާ ވެސް ހާސިލުކުރަން ބޭނުންވާ ކަންތައްތަކެއް އެބަހުއްޓެވެ. އެގޮތުން އޭނާ ބޭނުންވާ އެއްކަމަކީ ކައިވެނި ކޮށްގެން ވިޔަސް ނޫނަސް ހަމަޖެހޭ ދިރިއުޅުމެއް އުޅުން ކަމަށް ކަމުގައި އޭނާ ބުންޏެވެ. އަދި މަދު މަސައްކަތްތަކެއް ކޮށްގެން ވިޔަސް އަމިއްލަ ހަރަދުތައް ފޫބައްދާ ހިތްހަމަ ޖައްސާލުމަށް ޗުއްޓީ ހޭދަކޮށްލަން ދިއުމުގެ ފުރުސަތު ވެސް ލިބޭފަދަ މީހަކަށް ވާން ބޭނުން ކަމުގައި ވާޝިޔާ އިތުރަށް ފާހަގަ ކުރިއެވެ.

ވާޝިޔާ ބުނީ އެހެން މީހަކަށް ބަރޯސާ ވުމަކީ އޭނާ ދުވަހަކު ވެސް ކުރަން ބޭނުންވާ ކަމެއް ނޫން ކަަމަށެވެ. އަދި މިހާރު ވެސް އޭނާ ދިރިއުޅެމުންދަނީ އެއްވެސް މީހަކަށް ބަރޯސާ ނުވެ އަމިއްލައަށް ކަމުގައި ވެސް ވާޝިޔާ ބުންޏެވެ. އަދި މިހާރު އޭނާ މަސައްކަތް ކުރަމުން ދަނީ ބިޒީ ޝެޑިއުލެއްގައިކަން ފާހަގަ ކުރަމުން ވާޝިޔާ ބުނީ 2019ވަނަ އަހަރުން ފެށިގެން އޭނާ އެންމެ ފަހުން "އޮފް" ދުވަހެއް ނެގި ހަނދާން ނުވާ ކަމަށެވެ.

ބިނާ ކުރުވަނިވި ފާޑުކިޔުމަށް މަރުހަބާ، ނަމަވެސް ހަނގާ ކުރާ ނަމަ ވަރަށް ދެރަވޭ

ވާޝިޔާ ފިލްމީ ދާއިރާއަށް ވަންތާ ގާތްގަނޑަކަށް 2 އަހަރުވެފައިވާއިރު މިހާތަނަށް ކުރިމަތިލާން ޖެހުނު އެންމެ ބޮޑު ގޮން ޖެހުމަކީ ކޮބައިތޯ ކުރި ސުވާލަކަށް ޖަވާބު ދެމުން އޭނާ ފާހަގަކުރީ، އެއީ އާންމުންގެ ފަރާތުން ލިބެމުން ދިޔަ "ބޭޑް" ކޮމެންޓުތައް ކަމުގައެވެ.ބިނާކުރުވަނިވި ފާޑުކިޔުމަކީ ދާއިރާއިން ކުރިއަށް ދާން ލިބޭ އިތުރު ހިތްވަރެއް ކަން ގަބޫލު ކުރި ނަމަވެސް ބައެއް ފަރާތްތަކުން ހަނގާ ކުރުމުގެ ނިޔަތުގައި ފާޑުކިޔުންތައް އޭނާއަށް ރައްދުކުރުމަކީ އޭނާ މިދާއިރާއިން ކުރިއަށް ދާން ލިބުނު ވަރަށް ބޮޑު ގޮންޖެހުމެއް ކަމުގައި ވެސް ވާޝިޔާ ފާހަގަކުރިއެވެ.

އެހެންނަމަވެސް މިއަދާ ހަމައަށް ވެސް ވާޝިޔާ، ފިލްމީ ދާއިރާގެ މިހާ ހިސާބަށް އައިސްފައި އެ ހުރީ އެތައް މިންނެތް މަސައްކަތް ތަކަކުންކަން ވިސްނާލައިފި ކޮންމެ މީހަކަށް ވެސް އެނގިގެން ދާނެއެވެ. މިހުރިހާ ކަމަކީ ވެސް "ޗެލްންޖު"ތަކެއްގެ ސިފައިގައި ވާޝިޔާ ވަނީ ސިފަކޮށްފައެވެ. އަދި އެ "ޗެލެންޖު"ތަކާ ކެރިގެން ކުރިމަތިލާ މިއަދު އޭނާ އަކީ ފިލްމީ އިންޑަސްޓްރީގައި ކާމިޔާބު ފަންނާނެއްކަން ވާޝިޔާ ވަނީ ހާމަކޮށްދީފައެވެ.

މީގެ އިތުރުން ވާޝިޔާ ބުނީ ފިލްމެއްގައި ނުވަތަ ފޮޓޯއެއްގައި އޭނާ ރަމްޒު ކޮށްދޭ ކެރެކްޓާ އަކީ އޭނާ ނޫން ކަމަށެވެ. އެހެން ކަމުން އެ ކެރެކްޓާ އަކަށް އަމާޒުވާ ފާޑުކިޔުންތަކަކީ އޭނާ ޕާސަނަލީ ނަގާ ކަންތައްތަކެއް ނޫން ކަމަށް ވެސް އޭނާ ބުންޏެވެ.

ވާޝިޔާ ހުރީ ހުސްކޮށްނެއް ނޫން، ލޯބިވެރިއަކު ޚިޔާރު ކުރުމުގައި ސިފައަކަށް ނުބަލާ

ވާޝިޔާއާ އެކީ ހޭދަ ކޮށްލެވުނު އުފާވެެރި ވަގުތުގައި އޭނާގެ އަމިއްލަ ދިރިއުޅުމުގެ ބައެއް ވާހަކަތައް ވެސް އޮޅުން ފިލުވާލާ ހިތްވިއެވެ.ވާޝިޔާއަށް އިންތިޒާރު ކޮށްގެން ތިބި، އަދި ވާޝިޔާއަށް ހިތްދޫވެފައި ތިބި ފިރިހެން ކުދިންނަށް ވާޝިޔާ ދޭން އޮތީ އެހާ އުފާވެރި ޚަބަރެއް ނޫނެވެ. ގިނަ ދުވަސްތަކަކު ހުސްކޮށް ހުރުމަށްފަހު މިހާރު އޭނާ އުޅެނީ ލޯބީގެ ގޮތުން މީހަކާ ގުޅިގެންނެވެ. އަދި އޭނާގެ ލޯބިވެރިޔާއާ އެކު އޭނާ އުޅެނީ ވަރަށް އުފަލުގައި ކަމުގައި ވެސް އޭނާ ހެވިފައި އިނދެ ބުންޏެވެ.

މިހާރު ސިންގަލްއެއް ނޫން، ވަރަށް ދުވަހު ސިންގަލް ކޮށް ހުރެވިއްޖެ. މިހާރު ސިންގަލްއެއް ނޫން، އައި އޭމް ވެރީ ހެޕީ އެބައުޓް އިޓް

ވާޝިޔާ ބުނީ ލޯބިވެރިއަކު ޚިޔާރު ކުރުމުގައި އޭނާ ސިފައަށް ނުބަލާ ކަަމަށެވެ. ލޯބިވެރިއެއް ޚިޔާރު ކުރުމުގައި އޭނާއަށް އެންމެ މުހިންމު އެއްޗަކީ އެމީހެއްގެ މިޒާޖެވެ. އަދި އަޚްލާގެވެ. އެމީހަކީ ހަރުދަނާ، ރަނގަޅު އަޚްލާގެއްގެ ވެރިއަކަށް ވެފައި ވާޝިޔާގެ ކަންތައްތައް ބެލެހެއްޓުމުގެ ގާބިލިއްޔަތުކަން ލިބިފައިވާނަމަ ސިފައަކީ އޭނާއަށް ލޯބިވެރިއަކު ޚިޔާރު ކުރުމުގައި މުހިންމު އެއްޗެއް ނޫނެވެ.

ސްމާރޓް ވީމަ، ސްޓޭބަލް ވީމަ، އަމިއްލަ މީހާ ބެލޭ ވަރަށް ހަރުދަނާ މީހަކަށްވީމަ އޭތި ޝިޔާއަށް ވަރަށް އެޓްރެކްޓިވް. އެގޮތަށް މީހުން ރީތިވޭ.

މީގެ އިތުރުން ވާޝިޔާގެ ލޯބިވެރިއަކަށް ވެވޭނީ ތެދުވެރި އަދި ވަފާތެރި މީހަކަށެވެ. އަދި ތެދުވެރިކަމަކީ އޭނާ ވަރަށް ބަލައިގަންނަ ސިފައެއް ކަމަށް ވާޝިޔާ ފާހަގަ ކުރިއެވެ. އަދި ސިފައަށް ބަލާއިރު، ފަލަވިޔަސް، ހިކިވިޔަސް އަދި ދޮން ވިޔަސް އޭނާއަށް މައްސަަލައަކަށް ނުވާނެ ކަމުގައި ވެސް ޝިޔާ މަޖާ ރާގެއްގައި ބުންޏެވެ.

"އަހަރެންގެ ވެސް ހުރޭ ވަރަށް މޮޅު ދަރިއެއް" މަންމަގެ މި ޖުމުލައިން ވާޝިޔާ އުފަލުން ފޮޅުނު

ދިރިއުޅުމުގައި ކޮންމެ މީހަކަށް ވެސް އުފާވެރި ދުވަސްތަކާއި ހިތާމަވެރި ދުވަސްތައް އަންނާނެ ކަން ޔަގީނެވެ. އެގޮތުން ވާޝިޔާގެ ދިރިއުޅުމުގައި މިހާތަނަށް އައި އެންމެ އުފާވެރި ދުވަހަކީ ކޮބައިތޯ ސުވާލު ކޮށްލީމެވެ. އެ ދުވަހަކީ އޭނާގެ މަންމަ އޭނާ ދިން އިންޓަވިއުއެއް ޓީވީއިން ބެލުމަށްފަހު، "އަހަރެންގެ ވެސް ހުރޭ ވަރަށް މޮޅު ދަރިއެއް" އެހެން ބުނި ދުވަހެވެ.

އެ ދުވަހުގެ ހަނދާންތައް "ދެން"އާ ހިއްސާ ކުރަމުން ވާޝިޔާ އިތުރަށް ބުނީ މަންމަ ހުރީ ވަރަށް ބޮޑަށް އޭނާއާ މެދު ފަޚުރުވެރި ވެފައި ކަމަށެވެ. އަދި އެކަމާ އޭނާ ނުހަނު އުފާވި ކަމަށާއި އެއީ ދިރިއުޅުމުގައި އައި އެންމެ އުފާވެރި ދުވަހުގެ ގޮތުގައި އޭނާ ސިފަކުރިއެވެ.

ފޭނުންނަށް ޝިޔާގެ މެސެޖެއް!

ކޮންމެ މީހެއްގެ ވެެސް ކުރިއެރުމުގައި އެންމެ ބޮޑު ހިއްސާއެއް ވާ އެއްބަޔަކީ އެމީހެއްގެ ސަޕޯޓަރުންކަން ޔަގީނެވެ. އަދި ފިލްމީތަރިންގެ ކާމިޔާބީގައި އެ ތަރިންގެ ފިލްމުތަކާއި އެކިކަހަލަ އުފެއްދުންތައް ބަލާ އުޅޭ އެތަރިންގެ ފޭނުންގެ ދައުރު ވަރަށް ވެސް ބޮޑެވެ. ވާޝިޔާ ވަނީ އޭނާގެ ފޭނުންނަށް އިންޓަވިއު ނިންމާލަމުން މެސެޖެއް ދީފައެވެ.

ވާޝިޔާ ބުނީ އޭނާގެ ބެލުންތެރިންނާ ހަމައަށް ވީހާވެސް ގިނައިން ރަނގަޅު އުފެއްދުންތައް ގެނެސްދެވޭތޯ މަސައްކަތް ކުރާނެ ކަމަށެވެ. އަދި ކުރިއަށް އޮތް ތަނަށް ވަރަށް ގިނަ މަސައްކަތް ތަކެއް އެބަހުރި ކަމަށާއި ބެލުންތެރިންނާ އަށް ވާޝިޔާގެ މޫނު ވަރަށް ގިނައިން ފެނިގެންދާނެ ކަމުގެ ޔަގީންކަން އަރުވާ ކަމަށެވެ. އަދި މި ދާއިރާ ދޫކޮށްލަން އޭނާ އެއްވެސް ވަރަކަށް ނުވިސްނާ ކަމުގައި ވެސް ވާޝިޔާ ފާހަގަ ކުރިއެވެ.

މީގެ އިތުރުން ވާޝިޔާ ވަނީ އޭނާގެ ސަޕޯޓަރުންނަށް ވަރަށް ހާއްސަ ޝުކުރެއް އަދާ ކޮށްފައެެވެ. އަދި އޭނާގެ ސަޕޯޓަރުންގެ ފަރާތުން އޭނާއަށް ލިބެމުންދާ ލޯބި ނުލިބޭ ނަމަ އޭނާއަކީ އެއްވެސް މީހެއް ނޫން ކަމަށާއި އޭނާ މިދާއިރާގައި ކުރިއަށް ދިއުމަށް އެންމެ  ބޮޑަށް އެހީވެދޭ ބަޔަކީ އޭނާގެ ސަޕޯޓަރުން ކަމަށް އޭނާ ފާހަގަ ކުރިއެވެ.

"ދެން" އިން ވާޝިޔާއާ އިންޓަރވިއު ކުރަނީ / ދެން އިމޭޖަސް/ޝަމްވީލް

ވާޝިޔާއާ އެކު ހޭދަކުރެވުނު ގަޑިއިރުގެ ތެރޭގައި އޭނާގެ ފަރާތުން ފެނިގެން ދިޔައީ އޭނާގެ ރީތިކަމާއި އެއްވަރަށް ހިތްހެޔޮކަމާއި އެކުވެރިކަމުގެ ވެސް ރީތި ކަމެވެ. މަޖާ މިޒާޖެވެ. އެހެން މީހުންނާ ގުޅޭ އެކުވެރި ކަމެވެ. ވާޝިޔާއަށް އަޅުގަނޑާއި "ދެން" ޓީމުގެ ފަރާތުން އެދެނީ އަބަދުވެސް ކާމިޔާބަށެވެ.