"އާންމު ތަންތަން ހަދާ މަރާމާތު ކުރާ އިރު އަޅުގަނޑުމެންނާ މެދު ވިސްނާނީ ކޮންއިރަކުންބާ؟"
ވިލިމާލޭ ޓާމިނަލާއި ދިމާލުން ފުޑް ކޯޓަށް ވަންނަ ދިމާ އަލަށް މަރާމާތު ކުރި ގޮތަކުން ޚާއްސަ އެހީއަށް ބޭނުންވާ ފަރާތަކުން މީސް މީޑިއާ ގައި ކަންބޮޑުވުން ފާޅު ކޮށްފިއެވެ.
އެމްޓީސީސީ ގެ ކަސްޓަމަރ ސާވިސް އެސިސްޓަންޓް އެއްގެ މަގާމުގައި މަސައްކަތް ކުރާ ގދ. ގައްދޫ/ނިރޮޅުގެ މިރުޒާ މުނީރު (27 އ.) އާއްމު ގޮތެއްގައި އިންނަނީ މާލެ-ވިލިމާލޭ ފެރީ ޓާމިނަލްގައި ޓިކެޓު ކަނޑާށެވެ. ޚާއްސަ އެހީއަށް ބޭނުންވާ ފަރާތަކަށްވީ ނަމަވެސް މިރުޒާ އަބަދު ވެސް ފާހަގަ ވެފައިވަނީ ވަރަށް ވެސް ހިތްވަރުގަދަ، އަދި މިފަދަ ކަންކަމާމެދު އަބަދުވެސް އަޑު އުފުލާ ފަރާތެއްގެ ގޮތުގައެވެ.
އެގޮތުން ފޭސްބުކްގައި އޭނާ ރޭގައި ކުރި ޕޯސްޓެއްގައި ވަނީ، ފުޑްކޯޓަށް ވިލިމާލޭ ޓާމިނަލް ކުރިމަތިން ވަންނަން ހުންނަ ދިމާ ހަދާފައިވާ ގޮތާމެދު ކަންބޮޑުވުން ފާޅު ކޮށްފައެވެ. އެތަން މިހާރު ހަދާފައި ހުރި ގޮތުން ފުރޮޅުލީ ގޮނޑީގައި އިންނަ ޚާއްސަ އެހީއަށް ބޭނުންވާ މީހަކަށް އެ ދިމާލުން އެތަނުގެ ތެރެއަކަށް ނުވަދެވޭނެއެވެ.
މިކަމާއި ގުޅޭގޮތުން "ދެން" އަށް މައުލޫމާތު ދެމުން މިރުޒާ ބުނީ އޭނާއަކީ އާއްމު ގޮތެއްގައި ވެސް ހެނދުނު ސައިބޯން ވިޔަސް އެދިމާލުން ފުޑް ކޯޓަށް ވަންނަ މީހެއް ކަމަށެވެ.
"އިއްޔެ ޑިއުޓީން ނިމެން ކައިރިވެފައި ހުއްޓާ ހަވީރު ޑިއުޓީ އަށް އައި ކުއްޖާ ބުނީ ދެން މިރޫ އަކަށް ނުދެވޭނެ ދޯ އޭ ހަވީރު ސައިބޯލަން ފުޑް ކޯޓަށް. އެއީ ކީއްވެތޯ އެހީމަ ބުނީ ޑިއުޓީ ނިންމާލާފަ ދަމުން ބަލާބަލާށޭ، އެތަން ހޮޅިޖަހާފަ ބަންދު ކޮށްލަނީއޭ. ދެން އެގަޑީގައި އަޅާނުލީ. ރޭގައި ދެން އަޅުގަނޑު ގޮސް ބަލާލީ. އަޅުގަނޑު މިހާރު އާންމުކޮށް ހެނދުނު ސައި ބޯން ދަނީ އެތަނަށް. ހަވީރު ވެސް މިހެން އުޅެލާފަ ދަން." މިރުޒާ ބުންޏެވެ.
ފުޑް ކޯޓަށް ވަނުން މިހާރު ހަދާފައިވާ ގޮތުން އެފަޅިން ނުވަދެވޭނެ ކަމަށާއި އޭނާއަށް ވެސް ޖެހޭނީ އެހެން މީހުން ފަދައިން ފުޑް ކޯޓު ވަށާ ޖަހާފައި ދާން ކަމަށް ވެސް މިރުޒާ ބުންޏެވެ.
"ޕޮއިންޓަކީ، އާދައިގެ މީހަކަށް (މިބުނީ ހިނގާފަ އުޅޭ މީހަކަށް) ކިތަންމެ ދުރަކަށް ވެސް ވަށާލާފައި ދެވިދާނެ. އެކަމަކު އަޅުގަނޑަކީ ގޮނޑިއެއްގައި އިންނަ މީހެއް، އަހަންނަށް ވެސް އެހާ ދުރަށް ދެވިދާނެ، އެކަމަކު އެއީކީ ފަސޭހަ ކަމެއް ނޫން ދޯ. ހޮޅިތަކާއި އެއްޗެހި ވަށައިގެން އަޅާފަ އޮންނަ ތަނެއް އެއީ. ކުރިން އަޅާފަ ހުރި ހޮޅިތައް އަދިވެސް ނުނެގި އެހުރީ. އެހެންމީހުންނަށް ހޮޅިޖަހާފަ ހުންނަ ތަނުން ފަސޭހައިން ދެވުނަސް އަހަންނަށް އުނދަގޫވާނޭ. އެރޫޓުން އަޅުގަނޑުމެން ކަހަލަ މީހުންނަށް ވެސް ދެވޭނެ ފަސޭހަ ގޮތް އޮންނަން ޖެހޭނެ" މިރުޒާ ބުންޏެވެ.
