ރިލަޓީ ޝޯގެ ވާހަކަތައް ވަކިގޮތަކަށް ފަތުރަނީ ސިޔާސީ ވަކި މަޤްސަދެއް ހާސިލުކުރަން: ރާއްޖެ ޓީވީ
ރާއްޖެޓީވީގެ ރިއަލިޓީ ޝޯ "ޕްރިސްޓާ އޮއިލް ސެލެބްރިޓީ ރޭސް" އާއި ބެހޭ ގޮތުން ޚަބަރުތައް ފަތުރާފައި ވަނީ ސިޔާސީ ވަކި މަޤްޞަދެއްގައި ކަމަށް ރާއްޖެ ޓީވީން ބުނެފިއެވެ.
ރާއްޖެޓީވީން މިއަދު ނެރުނު ބަޔާނެއްގައި ބުނެފައި ވަނީ، ރިއަލިޓީ ޝޯއެއް ތައްޔާރު ކުރުމުގައި އެމްއެންޑީއެފް އިން ވެފައިވާ އެހީތެރިކަމާ ގުޅޭގޮތުން ހަގީގަތެއް ނެތް ގޮތަށް މީޑިއާތަކުން ވާހަކަ ފަތުރުމުންދާ ކަމަށެވެ. އަދި އެ ވާހަކަތަކަކީ ރާއްޖެޓީވީއާއި އެމްއެންޑީއެފާ މެދު ރައްޔިތުންގެ ހިތުގައި ނުބައި ތަޞައްވުރެއް އުފައްދަން ފަތުރާފައިވާ ދޮގު ޚަބަރުތަކެއް ކަމަށް ވެސް އެޗެނަލުން ބުނެފައި ވެއެވެ.
"ޕްރިސްޓާ އޮއިލް ސެލެބްރިޓީ ރޭސް" ޝޯގައި އެމްއެންޑީއެފްގެ އުޅަނދުތަކާއި ވަސީލަތްތައް ބޭނުން ކުރުމުގެ ފުރުސަތު ދިނުމުން ބައެއް މީޑިއާތަކުން ވަނީ ކަންބޮޑުވުން ފާޅުކޮށްފައެވެ.
އެކަންބޮޑުވުންތަކަށް ޖަވާބު ދެއްވަމުން އެމްއެންޑީއެފްގެ ތަރުޖަމާނު މޭޖަރ އިބްރާހިމް އާޒިމް ވިދާޅުވީ ޒަމާނުންސުރެ ވެސް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ދަނީ އާންމު ރައްޔިތުންނާއި، ވަކިވަކި ފަރުދުންނާއި އަމިއްލަ ޖަމްއިއްޔާ ޖަމާޢަތްތަކާއި މީޑިއާތަކާއި ކުންފުނިތަކާއި ކައުންސިލްތަކުން އަދި ސުކޫލް މަދަރުސާތަކުން އިންތިޒާމްކުރާ ހަރަކާތްތަކުގައި ދިވެހި އަސްކަރިއްޔާގެ އެހީތެރިކަމަށް، އެ ފަރާތްތަކުން އެދޭ ކަންކަމުގައި ސިފައިންގެ އޮޕަރޭޝަންތަކަށް ދަތިނުވާނެ ގޮތެއްގެ މަތިން ލިބެން ހުރި ވަސީލަތްތައް ފޯރު ކޮށްދިނުމުގައި ހުރި މިންވަރަކުން ހުއްޓުމެއްނެތި ފޯރުކޮށްދެމުން ދާ ކަމަށެވެ.
އަދި މިއީ ރައްޔިތުންނާއި ދިވެހި އަސްކަރިއްޔާއާ ދެމެދު އޮންނަ ބަދަހި ގުޅުމާއި އިތުބާރު، އިތުރަށް ބަދަހިކޮށް ދެމެހެއްޓުމުގެ މާތް މަޤްޞަދުގައި ޒަމާނުންސުރެ، ފޯރު ކޮށްދެމުންދާ ސިފައިން ޢިޖްތިމާޢީ ޚިދުމަތެއް ކަމުގައި ވެސް އާޒިމް ވިދާޅުވިއެވެ.
ނަމަވެސް މިކަމާމެދު ބައެއް މީޑިއާތަކުން ކަންބޮޑުވުން ފާޅުކޮށް ބައެއް ޚަބަރުތައް ލިޔެފައިވާތީ ރާއްޖެޓީވީން މިއަދު ބުނީ އެއީ އަލަށް ރާއްޖޭގައި ކުރާ ކަމެއް ނޫން ކަމަށާއި ވަކި އުސޫލެއްގެ ދަށުން އެމްއެންޑީއެފް އާ މަޝްވަރާކޮށް އެފަދަ އެހީތައް ހޯދޭ ކަމަށެވެ.
"ނަމަވެސް މީގެ ކުރިން ކޮށްފައިވާ އެފަދަ ކަންކަން އެނގިތިބެ އެކަންކަން ފޮރުވޭނެ ފަދަ ގޮތަކަށް ޚަބަރުތައް ފަތުރާފައި ވަނީ ސިޔާސީ ވަކި މަޤްޞަދެއްގައި" ރާއްޖެ ޓީވީން ބުނެފައި ވެއެވެ.
