Monday, 16 November 2026
Advertisement
MWSC — SmartMeter (leaderboard)
ވިޔަފާރި

ފުރަތަމަ 9 މަހު އިޤްތިޞާދީ ހަރަކާތްތައް 81.1 ބިލިއަން ރުފިޔާއަށް

ފުރަތަމަ 9 މަހު އިޤްތިޞާދީ ހަރަކާތްތައް 81.1 ބިލިއަން ރުފިޔާއަށް

މިއަހަރުގެ ފުރަތަމަ ނުވަ މަސްދުވަހުގެ އިޤްތިޞާދީ ހަރަކާތްތައް 81.1 ބިލިއަން ރުފިޔާއަށް އަރާފައިވާއިރު، ސެޕްޓެމްބަރު މަހު އެކަނި ވެސް އިޤްތިޞާދަށް 330 މިލިއަން ރުފިޔާގެ ކުރިއެރުމެއް ލިބިއްޖެއެވެ.

މޯލްޑިވްސް ބިއުރޯ އޮފް ސްޓެޓިސްޓިކްސް (އެމް.ބީ.އެސް)އިން ނެރޭ 'މަންތްލީ އިންޑިކޭޓާސް އޮފް އިކޮނޮމިކް ގްރޯތް' ރިޕޯޓުގައިވާ ގޮތުން، 2025ވަނަ އަހަރުގެ ސެޕްޓެމްބަރު މަހާ އަޅާބަލާއިރު މިއަހަރުގެ ސެޕްޓެމްބަރު މަހު ރާއްޖޭގެ އިޤްތިޞާދު ވަނީ 4.0 އިންސައްތަ ކުރިއަރާފައެވެ. އަދި ޖެނުއަރީން ސެޕްޓެމްބަރަށް ރެކޯޑުކުރެވުނު 81.1 ބިލިއަން ރުފިޔާއަކީ ކުރީ އަހަރުގެ އެ މުއްދަތާ އަޅާބަލާއިރު 2.5 އިންސައްތައިގެ ކުރިއެރުމެކެވެ.

އެމް.ބީ.އެސް އިން ފާހަގަކުރާ ގޮތުގައި، 2026ވަނަ އަހަރުގެ ފުރަތަމަ ނުވަ މަސްދުވަހުގެ ތެރެއިން އޭޕްރީލް މަސް ފިޔަވައި އެހެން ހުރިހާ މަހެއްގައި ވެސް ކުރީ އަހަރަށްވުރެ އިޤްތިޞާދީ ކުރިއެރުން ވަނީ މަތިވެފައެވެ. 2019 ވަނަ އަހަރުގެ އަސާސީ އަގުތަކަށް ބަލާއިރު ސެޕްޓެމްބަރު މަހުގެ އިޤްތިޞާދީ މިންވަރު 8.51 ބިލިއަން ރުފިޔާގައި ހުރިއިރު، އަހަރީ ކުރިއެރުން އޮގަސްޓު މަހު ހުރި 2.4 އިންސައްތައާ އަޅާބަލާއިރު ވަނީ މަތިވެފައެވެ. މީގެ އިތުރުން 2024ވަނަ އަހަރުގެ ސެޕްޓެމްބަރު މަހާ އަޅާބަލާއިރު މިއީ 10 އިންސައްތައިގެ އިތުރުވުމެކެވެ.

ރިއަލް އެސްޓޭޓް، ވިޔަފާރި އަދި އިމާރާތްކުރުމުގެ ދާއިރާ ކުރިއަށް

ސެޕްޓެމްބަރު މަހުގެ އިޤްތިޞާދީ ކުރިއެރުމުގެ މައިގަނޑު ސަބަބަކީ ރިއަލް އެސްޓޭޓް، ހޯލްސޭލް އަދި ރީޓެއިލް ވިޔަފާރި، އަދި އިމާރާތްކުރުމުގެ ދާއިރާގެ ހަރަކާތްތައް އިތުރުވުމެވެ. މި މުއްދަތުގައި އިޤްތިޞާދީ ކުރިއެރުމަށް އެންމެ ބޮޑު ހިއްސާއެއް ވެފައިވަނީ ރިއަލް އެސްޓޭޓް ދާއިރާއިންނެވެ. އެއީ 0.9 ޕަސެންޓޭޖް ޕޮއިންޓެވެ. ހޯލްސޭލް އަދި ރީޓެއިލް ވިޔަފާރި އާއި އިމާރާތްކުރުމުގެ ދާއިރާގެ ކޮންމެ ދާއިރާއަކުން 0.8 ޕަސެންޓޭޖް ޕޮއިންޓް ހިއްސާކޮށްފައިވާއިރު، ޞިއްޙީ އަދި އިޖުތިމާޢީ ޚިދުމަތްތަކުގެ ދާއިރާއިން ވަނީ 0.6 ޕަސެންޓޭޖް ޕޮއިންޓް އިތުރުވެފައެވެ.

އަހަރުން އަހަރަށް ބަލާއިރު އިމާރާތްކުރުމުގެ ދާއިރާގެ މަސައްކަތްތައް 16.6 އިންސައްތަ ކުރިއަރައި 457 މިލިއަން ރުފިޔާއަށް އަރާފައިވެއެވެ. އަދި ހޯލްސޭލް އަދި ރީޓެއިލް ވިޔަފާރި 8.8 އިންސައްތަ ކުރިއަރައި 815 މިލިއަން ރުފިޔާއަށް އަރާފައިވާއިރު، މި ކުރިއެރުމުގެ މައިގަނޑު ސަބަބަކީ އެތެރެކުރެވުނު (އިމްޕޯޓް) މުދަލުގެ މިންވަރު އިތުރުވުން ކަމަށް އެމް.ބީ.އެސް އިން ފާހަގަކުރެއެވެ. މީގެ އިތުރުން ދަތުރުފަތުރާއި މުވާޞަލާތީ ދާއިރާއަށް ވެސް ވަނީ 0.6 އިންސައްތައިގެ ކުރިއެރުމެއް ލިބިފައެވެ.

އޮގަސްޓު މަހާ އަޅާބަލާއިރު ހަރަކާތްތެރިކަން މަޑުޖެހުން

އޮގަސްޓު މަހާ އަޅާބަލާއިރު، ސެޕްޓެމްބަރު މަހުގެ އިޤްތިޞާދީ ދުވެލި ވަނީ 11.6 އިންސައްތަ ނުވަތަ 1.12 ބިލިއަން ރުފިޔާ ދަށްވެފައެވެ. ސެޕްޓެމްބަރު މަހުގެ އިޤްތިޞާދީ ހަރަކާތްތަކުގެ އެންމެ ބޮޑު ހިއްސާއެއް (18.5 އިންސައްތަ) ފޯރުކޮށްދިން ފަތުރުވެރިކަމުގެ ދާއިރާ ވަނީ މަހުން މަހަށް ބަލާއިރު 29.5 އިންސައްތަ ދަށްވެފައެވެ. މީގެ މައިގަނޑު ސަބަބަކީ މެދުއިރުމަތީގެ ހިނގަމުންދާ ހަނގުރާމައެވެ. މި ހަމަނުޖެހުން ނިމުމުން ފަތުރުވެރިކަން ކުރިއަށްވުރެ ރަނގަޅުވާނެ ކަމަށް އަންދާޒާކުރެވެއެވެ. މި ދަށްވުމަކީ 2024 އަދި 2025ވަނަ އަހަރު ވެސް އޮގަސްޓު މަހުން ސެޕްޓެމްބަރު މަހަށް އިޤްތިޞާދީ ހަރަކާތްތައް މަޑުޖެހޭ އާންމު އުސޫލުން އައިސްފައިވާ ބަދަލެކެވެ. އެހެންނަމަވެސް، ވޭތުވެދިޔަ ތިން އަހަރުގެ ތަފާސްހިސާބަށް ބަލާއިރު، މިއަހަރުގެ ސެޕްޓެމްބަރު މަހަކީ އެންމެ ބޮޑު އިޤްތިޞާދީ ކުރިއެރުމެއް ރެކޯޑުކުރެވުނު މަހެކެވެ.

ރިއެކްޝަން

Advertisement
Allied — Dhen Online (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.