Tuesday, 17 November 2026
Advertisement
Ooredoo — Article-Top (leaderboard)
ޚަބަރު

ސުޕްރީމް ކޯޓުގެ ފަނޑިޔާރުކަމަށް ސަމީރު އައްޔަންކުރަން ރައީސްއަށް ލަފާ އަރުވަނީ

ސުޕްރީމް ކޯޓުގެ ފަނޑިޔާރުކަމަށް ސަމީރު އައްޔަންކުރަން ރައީސްއަށް ލަފާ އަރުވަނީ

ހުސްވެފައިވާ ސުޕްރީމް ކޯޓުގެ ފަނޑިޔާރުކަމަށް ހައިކޯޓުގެ ކުރީގެ ފަނޑިޔާރު ސަމީރު އައްޔަންކުރަން ރައީސް ޑރ. މުހައްމަދު މުއިއްޒުއަށް ލަފާ އަރުވަން ޖުޑީޝަލް ސާވިސް ކޮމިޝަން(ޖޭއެސްސީ)އިން ނިންމައިފިއެވެ.

ސުޕްރީމް ކޯޓުގެ ފަނޑިޔާރުކަމުގެ މަގާމަށް ކުރިމަތިލުމުގެ ފުރުސަތު ހުޅުވާލީ އެ ކޯޓުގެ ފަނޑިޔާރު އަލީ ރަޝީދު އަންނަ މަހުން ފެށިގެން ރިޓަޔާ ކުރައްވާތީއެވެ. އެހެންވެ އެ މަގާމަށް ކުރިމަތިލުމުގެ ފުރުސަތު ހުޅުވާލުމުން މިދިޔަ މަހުގެ އަށްވަނަ ދުވަހު މުއްދަތު ހަމަވިއިރު އެ މަގާމަށް ކުރިމަތިލެއްވީ ސަމީރުގެ އިތުރުން ހައި ކޯޓުގެ ފަނޑިޔާރު އަބްދުއްރައޫފް އިބްރާހިމްއެވެ.

ޖޭއެސްސީގެ އޮފިޝަލަކު ވިދާޅުވީ އެ މަގާމަށް ސަމީރު އައްޔަނުކުރަން ރައީސްއަށް ލަފާ އަރުވަން ނިންމާފައިވާ ކަމަށެވެ.

އެ ލަފައާއެކު ރައީސް ސަމީރުގެ ނަން މަޖިލީހަށް ހުށަހެޅުމުން އެކަމާ މެދު މަޖިލީހުގައި ވޯޓެއް ނަގާ ސަމީރުއަށް ރުހުން އޮތްތޯ ބަލާނެއެވެ.

ސުޕްރީމް ކޯޓުގެ ފަނޑިޔާރަކަށް މުސާރައާ އިނާޔަތްތަކުގެ ގޮތުގައި 80،000 ރުފިޔާއަށް ވުރެ ބޮޑު އާމްދަނީއެއް ލިބޭނެއެވެ.

އެ މަގާމަށް ކުރިމަތިލުމުގެ ޝަރުތުތަކުގެ ތެރޭގައި ސުންނަތް ޖަމާއަތުގެ މުސްލިމަކަށްވުމާއި އަދި ސިޔާސީ ޕާޓީއެއްގައި ހަރަކާތްތެރިނުވާ މީހެއް ކަމުގައި ވުން ހިމެނެއެވެ. އަދި އިސްލާމީ ޝަރީއާ ނުވަތަ ގާނޫނު ނުވަތަ ގާނޫނާއި އިސްލާމީ ޝަރީއާގެ ރޮނގުން ފުރަތަމަ ޑިގްރީ ހާސިލުކޮށްފައިވުން ވެސް ޝަރުތުތަކުގެ ތެރޭގައި ހިމެނެއެވެ.


ރިއެކްޝަން

Advertisement
Allied — Dhen Online (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.