ކޮވިޑް-19: މުޅި އައްޑޫސިޓީ މޮނީޓަރިންގަށް ލައިފި
އައްޑޫސިޓީ ހިތަދޫން ކަރަންޓީނުގައި ނެތް ދެ މީހަކު ކޮވިޑް-19 އަށް ފައްސިވުމާ ގުޅިގެން، އެސިޓީ މޮނީޓަރިންގަށް ލައިފިއެވެ.
"ދެން" އަށް އެނގިފައިވާ ގޮތުގައި އައްޑޫސިޓީ ހިތަދޫން މިއަދު ފައްސިވެފައި ވަނީ، ހިތަދޫ އެއާޕޯޓުގައި މަސައްކަތް ކުރާ ދެ މީހެކެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން މިއަދު ކުރިން ވަނީ ހަމައެކަނި ހިތަދޫ މޮނީޓަރިންގަށް ލާފައެވެ. ނަމަވެސް އިރުކޮޅެއް ކުރިން އިއުލާނު ކުރީ މުޅި އައްޑޫސިޓީ މޮނީޓަރިންގަށް ލީ ކަމަށެވެ.
އެ ސިޓީގެ މޭޔަރު ޢަބްދުﷲ ޞާދިޤު "ދެން" އަށް މައުލޫމާތު ދެއްވަމުން ވިދާޅުވީ، ހިތަދޫން ފައްސި ވެފައިވަނީ ބަލިވެގެން ފްލޫ ކްލިނިކަށް ދެއްކި ދެ ފިރިހެނުން ކަމަށެވެ.
"ބަލިވެގެން ފްލޫ ކްލިނިކަށް ދެއްކި ދެ މީހަކު ފައްސި ވެފައިވަނީ. މިހާރު އެދެމީހުން ވަނީ އައިސޮލޭޓް ކުރެވިފަ. ކޮންޓެކްޓް ޓްރޭސިންގ ހެދުމުގެ މަސައްކަތް ކުރަމުންދަނީ" ޞާދިޤު ވިދާޅުވިއެވެ.
ހިތަދޫން ކަރަންޓީންގައި ނެތް ދެ މީހަކު ފައްސިވިއިރު، އެ ސިޓީގެ ހުޅުމީދޫ ސައިޓަކުން 24 މީހަކު ވަނީ ކޮވިޑް-19 އަށް ފައްސިވެފައެވެ.
