މުއިއްޒުގެ ކެމްޕޭނު ރަސްމީކޮށް ފަށައިފި
ލޯކަލް ކައުންސިލް އިންތިހާބުގައި، މާލޭގެ މޭޔަރުކަމަށް ވާދަކުރައްވާ، ކުރީގެ ހައުސިންގ މިނިސްޓަރު ޑރ މުހައްމަދު މުއިއްޒުގެ ކެމްޕޭނު ރަސްމީކޮށް ފަށައިފިއެވެ.
މ. ދިމްޔާތުގައި ބޭއްވުނު މި ރަސްމިއްޔާތުގައި، މުއިއްޒުގެ ކެމްޕޭނު ރަސްމީކޮށް ފަށްޓަވައިދެއްވީ، އިދިކޮޅު ކޯލިޝަން ހިންގެވުމާ ހަވާލުވެ ހުންނެވި، ޕީއެންސީގެ ރައީސް އަބްދުރަޙީމް އަބްދުالله (އަދުރޭ)އެވެ.
މިރަސްމިއްޔާތުގައި ޑރ މުއިއްޒު ވާހަކަފުޅު ދައްކަވަމުން ވިދާޅުވީ، މާލޭގެ ރައްޔިތުން އެތައް އަހަރުތަކެއް ވަންދެން ތަހައްމަލު ކުރަމުން ދިޔަ ވޭންތައް އެބަހުރި ކަމަށާއި، އެކަންކަމަށް އެންމެ އެދެވޭ ހައްލެއް ހޯދައިދެވިފައިވަނީ، ކުރީގެ ރައީސުލް ޖުމްހޫރިއްޔާ ރައީސް އަބްދުالله ޔާމީން އަބްދުލް ޤައްޔޫމުގެ ވެރިކަމުގައި ކަމަށެވެ.
މީގެ އިތުރުން ގެދޮރުވެރިވުމުގެ އަމާޒަކީ، މިއަދު މާލޭގެ ރައްޔިތުންގެ އެންމެ ބޮޑު އަމާޒުކަމުގައި ފާހަގަކޮށް މުއިއްޒު ވިދާޅުވީ، އެ އަމާޒުތަކަށް ވާސިލުވުމަށް އެންމެ އެކަށޭނަ މަސައްކަތްތަކެއް ކޮށް، އެންމެ ރަނގަޅު ނަތީޖާއެއް ނެރެދިނީ ވެސް ކުރީގެ ރައީސް ޔާމީން އަބްދުލް ޤައްޔޫމުގެ ސަރުކާރުގައި ކަމުގައި މުއިއްޒު ވަނީ ވިދާޅުވެފައެވެ.
މީގެ އިތުރުން ފުށިދިއްގަރު ފަޅާއި ގުޅިފަޅު ހިއްކައިގެން ބޯހިޔާވަހިކަން ބޭނުންވާ ރައްޔިތުންނަށް ގެދޮރާއި ފުލެޓު ފޯރުކޮށްދިނުމުގެ މަޝްރޫޢެއް ރާވައި އިއުލާނުކޮށް، އެ މަޝްރޫޢަށް ކުރިމަތިލީ 5،000 މީހުންނަށް އެއިރު ލިޔުން ދިން ނަމަވެސް، އަދުގެ ސަރުކާރުން އެކަމުގައި ކަންކުރީ ކިހިނެއްތޯ ވެސް ޑރ.މުޢިއްޒު ވަނީ ސުވާލު ކުރައްވާފައެވެ.
ހުޅުމާލޭގައި ބިން އޮވެ، އެތަނުން ގޯތި ނުދޭތީ އެކަމާ ފާޑުވިދާޅުވަމުން ޑރ މުއިއްޒު ވިދާޅުވީ، ރައީސް ޔާމީނުގެ ސަރުކާރަކީ ރާއްޖޭގެ ތާރީޚުގައި އެންމެ ގިނަ ފުލެޓު އެޅި ސަރުކާރު ކަމާމެދުގައި އެއްވެސް ގޮތަކަށް ރައްޔިތުން ޝައްކެއް ނުކުރާނެ ކަމަށާއި، އެމަނިކުފާނު ވާހަކަފުޅު ދައްކަވަނީ ނަތީޖާ ނެރެދިނުމުގެ ތަޖުރިބާއާއެކުގައި ކަމަށް ވެސް މުއިއްޒު ފާހަގަ ކުރެއްވިއެވެ.
