އައްޑޫގެ ސްކޫލްތައް ބަންދުކޮށްފި
އައްޑޫ ސިޓީ މޮނީޓަރިންގެ ހާލަތަށް ގެނައުމާ ގުޅިގެން، އެ ސިޓީ ހުރިހާ ސްކޫލެއް ބަންދު ކޮށްފިއެވެ.
ކަރަންޓީނުގައި ނެތް ދެ މީހަކު ކޮވިޑް-19 އަށް ފައްސިވުމާ ގުޅިގެން އައްޑޫސިޓީ ހިތަދޫއަށް އަރާ ފޭބުން މަނާކޮށް، މޮނީޓަރިންގަށް ލާފައި ވަނީ މިއަދުގެ ވަގުތެއްގައެވެ. އެ ސިޓީގެ މޭޔަރު ޢަބްދުﷲ ޞާދިޤު "ދެން" އަށް މައުލޫމާތު ދެއްވަމުން ވިދާޅުވީ، ހިތަދޫން ފައްސި ވެފައިވަނީ ބަލިވެގެން ފްލޫ ކްލިނިކަށް ދެއްކި ދެ ފިރިހެނުން ކަމަށެވެ.
ހިތަދޫން ކަރަންޓީންގައި ނެތް ދެ މީހަކު ފައްސިވިއިރު، އެ ސިޓީގެ ހުޅުމީދޫ ސައިޓަކުން 24 މީހަކު ވަނީ ކޮވިޑް-19 އަށް ފައްސިވެފައެވެ.
އައްޑޫ މޮނީޓަރިން ހާލަތަށް ގެނައުމުން އެ ސިޓީގެ ހުރިހާ ސްކޫލް މާދަމާ އިން ފެށިގެން އެޗްޕީއޭ އިން ވަކި ގޮތެއް އަންގަންދެން ބަންދުކުރުމަށް މިހާރު ވަނީ ނިންމާފައެވެ.
އެޗްޕީއޭ އިން މިއަދު ނެރުނު އެންގުމެއްގައި ބުނެފައިވަނީ އައްޑު މޮނީޓަރިންގެ ހާލަތަށް ގެނެސްފައި ވަނީ ކޮވިޑް-19 އާ ގުޅިގެން ސިއްހީ ގޮތުން އިތުރަށް ބަލަންޖެހޭ ކަންކަން ބެލުމަށް ކަމަށެވެ.
