‘’ދެވަނަ ފިޔަވަހީގައި ގޯތި ދޭނެ ބިން އެބަހުރި، މާލޭ ރައްޔިތުން ބިންވެރި ނުކުރެވެންވީ ސަބަބު އަންގައިދޭން ޖެހޭ"
ހުޅުމާލޭ ދެވަނަ ފިޔަވަހީގައި ހުސްބިން އެބަހުރި ކަމަށާއި، އެބިންތަކުގައި މާލޭގެ ރައްޔިތުން ބިންވެރި ކުރުމަށް އަދުގެ ސަރުކާރަށް ނުކުޅެދިފައިވާ ސަބަބު ރައްޔިތުންނަށް އަންގައިދޭން ޖެހޭ ކަމަށް ކުރީގެ ހައުސިންގ މިނިސްޓަރު ޑރ މުހައްމަދު މުއިއްޒު ވިދާޅުވެއްޖެއެވެ.
މުއިއްޒު މިހެން ވިދާޅުވީ، މުއިއްޒުގެ ކެމްޕޭން ރަސްމީކޮށް ފެށުމަށް މ. ދިމްޔާތުގައި މިއަދު ބޭއްވި ރަސްމިއްޔާތުގައެވެ. މިރަސްމިއްޔާތުގައި މުއިއްޒު ވާހަކަފުޅު ދައްކަވަމުން ވިދާޅުވީ، މިސަރުކާރުން ހުޅުމާލޭގެ ދެވަނަ ފިޔަވަހީގައި އޮތް ހުސްބިމުން މާލޭގެ ރައްޔިތުން ބިންވެރި ކުރުމަށް ނުކުޅެދޭ ސަބަބު ރައްޔިތުންނަށް އަންގައިދޭން ޖެހޭ ކަމަށެވެ. މީގެ އިތުރުން ރައީސް ޔާމީނުގެ ވެރިކަމަކީ ދިވެހިރާއްޖެއަށް އެންމެ ގިނަ ހައުސިންގް ޔުނިޓުތައް ގެނެސްދީފައިވާ ވެރިކަން ކަމުގައި ވެސް މުއިއްޒު ފާހަގަ ކުރެއްވިއެވެ.
ހަމައެއާއެކު މާލޭގެ ވިޔަފާރި ބަނދަރު ގުޅިފަޅަށް ބަދަލުކުރުމަކީ އަދުގެ ސަރުކާރުގެ ސިޔާސަތަކަށް ވެފައިވާއިރު، ރައީސް ޔާމީނުގެ ދައުރުގައި، ވިޔަފާރި ބަނދަރު ބަދަލުކުރުމަށް ނިންމާފައި އޮތީ ތިލަފުށްޓަށް ކަމަށާއި، އަދި ގުޅީފަޅަކީ ރައްޔިތުންގެ ބޯހިޔާވަހިކަމަށް ޚާއްސަ ރަށަކަށް ހެދުމަށް ރައީސް ޔާމީނުގެ ސަރުކާރުން ނިންމެވި ކަމުގައި ވެސް މުއިއްޒު ފާހަގަ ކުރެއްވިއެވެ. އެހެން ނަމަވެސް މިއަހަރު އެމަޝްރޫޢު ފެށޭނެ ވާހަކަ އިވުނު ނަމަވެސް ރައްޔިތުންގެ އާދޭހަކީ ގުޅީފަޅަކީ ގެދޮރު ދިނުމަށް ޚާއްސަ ތަނަކަށް ހެދުން ކަމުގައި ވެސް މުއިއްޒު ވިދާޅުވިއެވެ.
މި ރަސްމިއްޔާތުގައި މުއިއްޒު އިތުރަށް ވާހަކަފުޅު ދައްކަވަމުން ވިދާޅުވީ، ހުޅުމާލޭގެ ދެވަނަ ފިޔަވަހީގައި ބާއްވާފައިވާ ކޮންމެ ގާބުރިއަކީ ވެސް ކުރީ ސަރުކާރުގެ މަސައްކަތް ކަމަށާއި އެ ބިމުން މާލޭގެ ރައްޔިތުންނަށް ގޯތި ދޭނެ ޖެހޭނެ ކަމަށެވެ. އެހެންކަމުން ރައްޔިތުން އެމަނިކުފާނަށް ފުރުސަތު ދެއްވައިފިނަމަ މާލެއަކީ ހިތްފަސޭހަ ތަނަކަށް ހަދާ ، އިޖުތިމާއީ މައްސަލަތަކަށް ހައްލު ހޯއްދަވައި ދެއްވުމަށް ، އެމަނިކުފާނަށް ލިބޭ މެންޑޭޓްގެ ތެރެއިން މަސައްކަތް ކުރައްވާނެ ކަމަށެވެ.
