ޕްރޮޖެކްޓް ދިނުމުގައި އެސަރަހައްދެއްގެ ވިޔަފާރިވެރިންނަށް އިސްކަން ދޭގޮތަށް ހަމަޖައްސައިފި
ދައުލަތުގެ އޮފީސްތަކުން ކުރިއަށް ގެންދާ ޕްރޮޖެކްޓުތަކުގައި، އެޕްރޮޖެކްޓެއް ކުރިއަށް ގެންދާ ސަރަހައްދަކަށް ނިސްބަތްވާ ވިޔަފާރިވެރިންނަށް އިސްކަން ދިނުމުގެ އުސޫލު އެކުލަވާލައިފިއެވެ.
ދައުލަތުގެ މާލިއްޔަތު ގަވާއިދަށް ރިއާޔަތްކޮށް އެދައުލަތެއްގެ އޮފީހަކުން އާންމުކޮށް އިއުލާން ކޮށްގެން ކުރިއަށް ގެންދާ ބީލަންތަކުގައި، އެރަށަކަށް ނުވަތަ އެއަތޮޅަކަށް ނިސްބަތްވާ ފަރާތްތަކަށް މަސައްކަތް ހަވާލު ކުރުމުގައި އިސްކަންދިނުމުގައި އަމަލު ކުރާނެ ގޮތުގެ ގަވައިދު މިހާރު ވަނީ ގެޒެޓު ކުރެވިފައެވެ.
ގެޒެޓު ކުރެވިފައިވާ އުސޫލުގެ މަޤުސަދުގައި ބުނެފައިވަނީ، ރާއްޖޭގައި ރަޖިސްޓަރީކޮށްގެން ހިންގާ އެންމެ ކުދި، އަދި މެދު ފަންތީގެ ވިޔަފާރިތަކުގެ ދައުރު ރާއްޖޭގެ އިގްތިސޯދުގައި ފުޅާކުރުމުގެ އިތުރުން އެފަދަ ވިޔަފާރިތަކަށް ދެމެހެއްޓެނިވި ގޮތެއްގައި ތަރައްގީވުމުގެ ގާބިލުކަން ފަހިކޮށްދިނުމުގެ ގޮތުން ދައުލަތުގެ އޮފީސްތަކުން ތަކެއްޗާއި ހިދުމަތް ހޯދުމުގައާއި އަދި މަސައްކަތް ކުރުވާއިރު، އެންމެ ކުދި، ކުދި އަދި މެދު ފަންތީގެ ވިޔަފާރިތަކަށް އިސްކަން ދިނުން ކަމަށެވެ.
މީގެ އިތުރުން ދައުލަތުގެ އޮފީސްތަކުން ތަކެއްޗާއި ހިދުމަތް ހޯދުމުގައާއި، މަސައްކަތް ކުރުވާއިރު، ހާމަކަންބޮޑު ހަމަހަމަ އުސޫލެއްގެ ތެރެއިން، ރާއްޖޭގެ އެކި ސަރަހައްދުތަކަށް ނިސްބަތްވާ ބީލަންވެރިންގެ ބައިވެރިވުން އިތުރުކުރުމާއެކު، އެ މަސައްކަތަކަށް ދިވެހީންނަށް އިސްކަން ދިނުން ކަމަށް ވެސް އެ އުސޫލުގައި ފާހަގަކޮށްފައިވެއެވެ.
ދައުލަތުން ކުރިއަށް ގެންދާ ފަސް މިލިއަން ރުފިޔާއަށް ވުރެ ކުދި ޕްރޮކިޔުމަންޓް ހަވާލު ކުރަން ވާނީ ދިވެހި ވިޔަފާރިވެރިންނަށް އެކަނި ކަމަށާއި، ފުރަތަމަ ފަހަރަށް ހުޅުވާލާ އިއުލާނާ ގުޅިގެން ދިވެހި ވިޔަފާރިއެއް ކުރިމަތިނުލާނަމަ، ނުވަތަ ބީލަމުގެ ޝަރުތުތައް ފުރިހަމަވާ ދިވެހި ވިޔަފާރިއެއް ނެތްނަމަ، ދެވަނަ ފަހަރަށް އެ ތަކެތި ނުވަތަ އެ ހިދުމަތް ހޯދުމަށް ބޭރުގެ ފަރާތްތަކަށް ކުރިމަތިލެވޭގޮތަށް އިއުލާން ކުރަންވާނެ ކަމަށްވެސް އުސޫލުގައި ބުނެފައިވެއެވެ.
ހަމައެއާއެކު، ދައުލަތުގެ އިދާރާތަކުން ކުރިއަށްގެންދާ ޕްރޮކިއުމަންޓުގެ އަންދާޒާ އަގު
ދެ މިލިއަން ފަސް ލައްކަ ރުފިޔާއަށްވުރެ ކުޑަނަމަ، އެ ޕްރޮކިއުމަންޓެއް ހުޅުވާލަން ވާނީ އެންމެ ކުދި، ކުދި އަދި މެދު ފަންތީގެ ވިޔަފާރިތަކަށް އެކަނި ކަމުގައި ވެސް އެ އުސޫލުގައި ބުނެފައިވެއެވެ. އެހެންނަމަވެސް، ފުރަތަމަ ފަހަރަށް ހުޅުވާލާއިރު އެފަދަ ފަރާތަކުން ކުރިމަތި ނުލާނަމަ، ނުވަތަ ޝަރުތު ފުރިހަމަވާ ފަރާތެއް ނެތްނަމަ، އެ ފަންތިއަށް ނުފެތޭ ދިވެހި ވިޔަފާރިތަކަށް ކުރިމަތިލެވޭ ގޮތަށް އަލުން އިއުލާން ކުރަން ޖެހޭނެ ކަމަށް ވެސް އެ އުސޫލުގައި ބުނެފައި ވެއެވެ.
