އިންސާފުވެރި އިންތިޚާބެއް ބާއްވަން ބޭނުންނަމަ އުސޫލުުތައް ބަދަލުކޮށް، ޚާއްސަ އުސޫލުތަކެއް ގެންނަން ޖެހޭ
ކުރިޔަށް އޮތް ލޯކަލް ކައުންސިލްތަކުގެ އިންތިޚާބަކީ އިންސާފުވެރި އިންތިޚާބެއް ކަމުގައި ހަދަން ބޭނުންނަމަ، ހެލްތް ޕްރޮޓެކްޝަން އެޖެންސީން މިހާރު އާއްމު ކޮށްފައިވާ ގައިޑްލައިންގައިވާ އުސޫލުތަކަށް ބަދަލު ގެންނަން ޖެހޭ ކަމަށް އިލެކްޝަންސް ކޮމިޝަނުގެ ނައިބު ރައީސް އިސްމާއިލް ހަބީބު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން އިލެކްޝަންސް ކޮމިޝަން އަދި ހެލްތު ޕްރޮޓެކްޝަން އެޖެންސީގެ ބޭފުޅުންނާ ބައްދަލު ކުރުމަށް މިއަދު އޮތް ބައްދަލުވުމުގައި ވާހަކަފުޅު ދައްކަމުން، ހަބީބު ވިދާޅުވީ، މިހާރު އެޗްޕީއޭއިން އާއްމު ކޮށްފައި ވަނީ އާއްމު އުސޫލެއް ކަމަށާއި އިންތިޚާބަށް ޚާއްސަ އުސޫލެއް ބޭނުންވާ ކަމަށެވެ. ނޫންނަމަ އިންތިޚާބު އިންސާފުވެރި ނުވެދާނެ ކަމަށްވެސް ހަބީބު ވިދާޅުވިއެވެ،
"އުސޫލުތައް ޚާއްސަ ވެގެން ނޫނިއްޔާ އިންސާފުވެރި އިންތިޚާބެއް ބޭއްވޭނެ ކަމާމެދު، އަޅުގަނޑުމެނަށް ޔަޤީނެއް ނުކުރެވޭ." ހަބީބު ވިދާޅުވިއެވެ.
ހަބީބުގެ ވާހަކަފުޅުގައި އިތުރަށް ވިދާޅުވީ، ގައިޑްލައިންގައި ހަވާލާދީފައި ހުރީ އާއްމު އުސޫލުތަކަށް ކަމަށެވެ. މިގޮތުން، އާއްމު ރައްޔިތުން ދަތުރު ކުރުމުގެ އުސޫލާއި، އާއްމު މީހުން ބައްދަލުވުންތައް ބޭއްވުމުގައި އަމަލު ކުރަން ޖެހޭ އުސޫލަށް ގައިޑްލައިންގައި ހަވާލާ ދީފައިވާކަން ހަބީބު ފާހަގަ ކުރެއްވިއެވެ. އަދި މުޅި ގައިޑްލައިންއަށް ބަލާލުމުން، އެ ބައްޓަން ކުރެވިފައި ވަނީ، ކަރަންޓީންގައި ތިބި މީހުންނާއި އައިސޮލޭޝަންގައި ތިބި މީހުންނަށްޓަކައި އޮތް އެއްޗެއްގެ ގޮތުގައި ކަމަށާއި ލޯކަލް ކައުންސިލް އިންތިޚާބުގައި ވޯޓް ލާމީހާގެ ޙައްޤާއި ކެނޑިޑޭޓުން އަދި ޕާޓީ ތަކުގެ ޙައްޤު ކަށަވަރު ކުރުމަށްޓަކައި އިތުރު ލުއިތަކެއް ލިބިދެން ޖެހޭ ކަމަށް އިލެކްޝަން ކޮމިޝަނުން ދެކެވަޑައިގަންނަވާ ކަަމަށް ހަބީބް ވިދާޅުވިއެވެ.
ހަބީބްގެ ވާހަކަފުޅުގައި އިތުރަށް ވިދާޅުވީ، ގައިޑްލައިންއަށް ބަލާލާއިރު، ކެންޕެއިން ކުރުމުގެ ހަމަހަމަ ފުރުސަތުގެ ވާހަކަ ނެތް ކަމަށާއި އިންތިޚާބުގައި ވާދަ ކުރައްވާ ކެނޑިޑޭޓުންނަށް އެފުރުސަތެއް ނެތް ކަމަށް ޤަބޫލު ކުރައްވާ ކަމަށްވެސް ވިދާޅުވިއެވެ.
ހަބީބު ވަނީ މިހާރު އޮތް ގައިޑްލައިންގައި ބައެއް ކަންކަން ސާފު ނުވާކަން ފާހަގަ ކުރައްވާފައެވެ. މިގޮތުން، މޮނިޓަރިންގގެ ހާލަތުގައި އޮންނަ ރަށްރަށަށް އިލެކްޝަން ކޮމިޝަންގެ މެންބަރުނަށް އެރޭނެތޯ ހަބީބު ވަނީ ސުވާލު އުފައްދާފައެވެ. އެފަދަ ރަށްރަށަށް ނޭރޭނަމަ، އެރަށް ވޯޓް ކަރުދާސް ނުގެންދެވޭނެ ކަމަށް ވެސް ހަބީބު ވިދާޅުވިއެވެ.
"މިސާލަކަށް މޮނިޓަރިންގގެ ހާލަތުގައި ހުންނަ ރަށަކަށް. އަޅުގަނޑުމެން އެރަށަށް ފޮނުވާ ޓްރައިނަރު އެރަށަށް އެރޭނެތޯ. ބައެއް ރަށްރަށުން އެބަ ބުނޭ މޮނިޓަރިންގގެ ހާލުގައި އެމީހުންނަށް ކަރަންޓީން ނުވެ އޮފިޝަލުންނާ ބައްދަލު ނުކުރެވޭނޭ. އެއީ އެޗްޕީއޭގެ ޤަވާއިދުގައި އެހެން އޮންނާނީ." ހަބީބް ވިދާޅުވިއެވެ
ހަބީބު ވިދާޅުވީ، އިލެކްޝަން ކޮމިޝަނުން ބަޖެޓް ކުޑަ ކުރީ، އެޗްޕީއޭއިން ގައިޑްލައިންތަކަށް ލުއި ދޭނެ ކަމަށް ބަލާފައި ކަމަށެވެ. އަދި ގެސްޓްހައުސް ހުންނަ ރަށަކުން އިތުރު ރަށަކަށް ދާންނަމަ ކަރަންޓީންވާން ޖެހުމާއި ރިސޯޓްތަކަށް ގޮސްފައާއި، ބޭރު ޤައުމުތަކުން އައިސް ކަރަންޓީންވާން ޖެހޭނަމަ ވަރަށް ބޮޑު ޚަރަދެއް ހިނގާނެ ކަމަށް ހަބީބު ފާހަގަ ކުރެއްވިއެވެ.
