މަޑަވެލީގައި މަގު ކޮނުމުގެ ތެރޭގައި ފެނުނު އިންސާނުންގެ ކަށިތަކެއް، ވަޅުނުލާ އުކާލާފައިވާ ކަމުގެ ތުހުމަތު
ގދ.މަޑަވެލި ގައި ނަރުދަމާގެ މަސައްކަތް ކުރަން މަގު ކޮނުމުގެ ތެރޭގައި ފެނުނު އިންސާނުންގެ ކަށިތަކެއް، ވަޅުނުލާ ސަޙަރާ ތެރެއަށް އުކާލާފައިވާ ކަމުގެ މައްސަލައެއް ފެންމަތިވެއްޖެއެވެ.
އެކަށިތަކުގެ ފޮޓޯ މީސްމީޑިއާ ގައި ހިއްސާ ކުރަމުން މީހަކު ބުނެފައި ވަނީ 3 މާރިޗް ވީ ބުދަ ދުވަހު މަޑަވެލި ނަރުދަމާގެ މަސައްކަތަށް "މޭނާ" މަގު ކޮނުމުގެ ތެރެއިން ފެނިގެން ނަގާފައިވާ އިންސާނެއްގެ ކަށިތަކެއް މިއަދާއި ހަމައަށް ވެސް ވަޅުނުލާ، ސަހަރާގައި ބަހައްޓާފައި ހުރި ކަމަށެވެ.
"ދެން" އަށް މައުލޫމާތު ދެއްވަމުން މަޑަވެލި ކައުންސިލު ނައިބު ރައީސް ޢަޒަމް މުޙައްމަދު ވިދާޅުވީ، އެކަށިތައް ފެނިފައިވަނީ މިމަހުގެ 3 އާއި 4 ވަނަ ދުވަހު، ނަރުދަމާގެ މަސައްކަތް ކުރަން މަގު ކޮނުމުގެ ތެރޭގައި ކަމަށާއި، އެކަށިތައް ވަޅުލާފައިވާ ކަމަށެވެ.
"މިމަހުގެ 3 އާއި 4 ވަނަ ދުވަހު ނަރުދަމާގެ މަސައްކަތް ކުރަން މަގު ކޮނުމުގެ ތެރޭގައި އިންސާނުންގެ ބައިވަރު ކަށިތަކެއް ފެނިފައި ވަނީ. ކަމާބެހޭ ފަރާތްތަކުގެ އިރުޝާދުގެ މަތިން، އޮންނަ އުސޫލުގެ ތެރެއިން އެކަށިތައް މިހާރު ވަނީ ވަޅުލާފަ" ޢަޒަމް ވިދާޅުވިއެވެ.
ކައުންސިލު ގެ ނައިބު ރައީސް ވިދާޅުވި ގޮތުގައި މީގެ ކުރިން 2016 ވަނަ އަހަރު ވެސް އެރަށު މަގު ކޮނުމުގެ ތެރޭގައި ވަނީ އިންސާނުންގެ ކަށިތަކެއް ފެނިފައެވެ. ނަމަވެސް އޭރު ކޮނުނީ ގަބުރުސްތާނާ ކައިރި މަގެއް ކަމަށާއި، މިފަހަރު ކޮނެފައި މިވަނީ ގަބުރުސްތާނާ ވަރަށް ދުރު މަގެއް ކަމުގައި ވެސް ޢަޒަމް ވިދާޅުވިއެވެ.
