ލޯކަލް ކައުންސިލް އިންތިޚާބާ ގުޅިގެން "ދެން" އިން ގެނެސްދޭ "މަންދޫބުންގެ ބަސް" ފުއާދު އިފްތިތާޙް ކޮށްދެއްވައިފި
ލޯކަލް ކައުންސިލް އިންތިޚާބަށް ޚާއްޞަކޮށް "ދެން" އިން ތަޢާރަފް ކުރި ވެބްސައިޓް "މަންދޫބުންގެ ބަސް" އިފްތިތާހު ކޮށްފިއެވެ.
އިލެކްޝަންސް ކޮމިޝަން(އީސީ)ގައި އިއްޔެ އޮތް ބައްދަލުވުމެއްގައި "ދެން"ގެ މި ސައިޓް އިފްތިތާޙް ކޮށްދެއްވީ އެ ކޮމިޝަންގެ ކުރީގެ ރައީސް އަދި މިހާރުގެ މެމްބަރު އަހުމަދު ފުއާދު ތައުފީގެވެ.
ސައިޓް އިފްތިތާޙް ކޮށްދެއްވުމަށް ފަހު ފުއާދު ދެއްކެވި ވާހަކަފުޅުގައި "ދެން" އިން ކުރި މި މަސައްކަތަކީ ވަރަށް ބޭނުންތެރި އަދި މުހިންމު މަސައްކަތެއް ކަމަށް ވަނީ ފާހަގަ ކުރައްވާފައެވެ. އަދި މިފަދަ މަސައްކަތްތަކުގައި އިލެކްޝަންސްއިން ދެވެން އޮތް އެއްބާރުލުމެއް ދެއްވާނެކަމަށް އެމަނިކުފާނު ވިދާޅުވިއެވެ. މީގެ އިތުރުން "ދެން" ވަރަށް ބޮޑަށް ކުރިއަރައިގެން ދާތަން ފެންނަމުންދާ ކަން ފާހަގަ ކުރައްވާ ނޫހަށް ކުރިއެރުމާއި ކާމިޔާބަށް އެދޭ ކަމަށް ވެސް އެމަނިކުފާނު ވިދާޅުވިއެވެ.
ފުއާދު ތަޢުފީޤް "ދެން" ގެ ނޫސްވެރިޔާ އާލިމް އާއެކު -- ދެން އިމޭޖްސް/އިބްރާހީމް ޝަމްވީލް
މި ސައިޓާ ގުޅޭ ގޮތުން "ދެން"ގެ ސީއީއޯ އަރީޙް ވިދާޅުވީ ސައިޓްގެ ބޭނުމަކީ އިންތިޚާބުގައި ވާދަ ކުރާ ކެނޑިޑޭޓުންގެ މައުލޫމާތު އެއް ތަނަކުން ފެންނަ ގޮތް ހެދުމާއި ކެނޑިޑޭޓުން ޕްރޮމޯޓްވުމުގެ ފުރުސަތު ހުޅުވާލުން ކަމަށެވެ.
"ސައިޓުން ފެނިވަޑައިގަންނަވާނެ ކެނޑިޑޭޓުން އަތޮޅާއި ރަށާއި އަދި ޕާޓީތައް ވެސް ވަކީން ، މީގެ އިތުރުން ކެނޑިޑޭޓުން ޕްރޮމޯޓް ކޮށްދިނުމުގެ މަސައްކަތް އަޅުގަނޑުމެން ވިޔަފާރި އުސޫލުން ކުރިއަށް ގެންދާނަން" އަރީޙް ވިދާޅުވިއެވެ.
އަރީޙް ވިދާޅުވީ "މަންދޫބުންގެ ބަސް" މި ވެބްސައިޓްގައި ކޮންމެ ކެނޑިޑޭޓުންގެ ތަޢާރަފެއް ވިޔަފާރި އުސޫލުން ކުރިޔަށް ގެންދިއުމަށް ވަނީ ނިންމާފައެވެ. އަދި ޕްރަފައިލް ޖަހާ ކެނޑިޑޭޓުންގެ ޚަބަރާއި ކެނޑިޑޭޓްގެ ޕޯސްޓަރު "ދެން" ގެ މީސްމީޑިއާ މަންސަ ތަކުގައި އިޝްތިހާރު ކުރުމަށް ނިންމާފައިވާ ކަމަށް ވެސް އަރީޙް ވިދާޅުވިއެވެ.
"މަންދޫބުންގެ ބަސް"އާ ގުޅޭ ގޮތުން މައުލޫމާތު އިތުރު މައުލޫމާތު ސާފު ކުރައްވަން ބޭނުންފުޅުވާ ފަރާތްތަކުން "ދެން"ގެ ފޭސްބުކް ޕޭޖް ނުވަތަ ފޯން ނަމްބަރު 9632022 އާ ގުޅުއްވައިގެން މައުލޫމާތު ސާފު ކުރެއްވޭނެއެވެ.
"ދެން" އަކީ މަދު ދުވަސްކޮޅެއްގެ ތެރޭގައި ގިނަ ބައެއްގެ މަޤްބޫލުކަން ހޯދާފައިވާ ނޫހެކެވެ. ދުވާލެއްގެ މައްޗަށް ބައި ލައްކައަށްވުރެ ގިނަ މީހުން ޒިޔާރަތް ކުރާ "ދެން" ގެ ވެބްސައިޓަށް މަހެއްގެ މައްޗަށް 2 މިލިޔަނެއްހާ މީހުން ޒިޔާރަތް ކުރެއެވެ. "ދެން" އަކީ ރާއްޖޭގައި 5 ވަނަ އަށް އެންމެ ގިނަ މީހުން ޒިޔާރަތް ކުރާ ނޫސްކަން ފާހަގަ ކޮށްލެވެއެވެ.
Ads by STO
