އުދައްޔުގެ މަރު: ކުޑަކުއްޖަކު ހިމެނޭހެން ހަތަރު މީހަކަށް ދައުވާކުރަން ފޮނުވައިފި
ގއ. މާމެންދޫގައި ހިންގި މާރާމާރީއެއްގައި އުމުރުން 17 އަހަރުގެ ކުއްޖަކު ނިޔާވި މައްސަލައިގައި، ހަތަރު މީހަކަށް ދައުވާކުރަން ޕީޖީއަށް ފޮނުވައިފިއެވެ. މި ހަތަރު މީހުންގެ ތެރޭގައި 18 އަހަރު ނުފުރޭ ކުޑަކުއްޖަކު ވެސް ހިމެނެއެވެ.
މި މައްސަލައިގައި ހައްޔަރު ކޮށްފައި ވަނީ 25 އަހަރާއި 27 އަހަރުގެ ދެމީހުންނާއި 23 އަހަރު އަދި 18 އަހަރުގެ ދެ މީހެކެވެ. ނަމަވެސް މީގެ ތެރެއިން ދައުވާ ކުރަން ފޮނުވާފައި ވަނީ 4 މީހުންނަށެވެ.
ގއ މާމެންދޫގައި ހިންގި ނުރައްކާތެރި މާރާމާރީގައި އުމުރުން 17 އަހަރުގެ މުހައްމަދު އުދައްޔު ނިޔާވެފައިވާއިރު އޭނާގެ ބޭބެ އުމުރުން 21 އަހަރުގެ ފިރުޝާން ޒާހިރު ވަނީ ޒަހަމް ކޮށްލާފައެވެ. އުދައްޔުގެ ހަށިގަނޑު މިދިޔަ މަހު 15ގައި ޕޯސްޓްމޯޓަމް ހަދަން އިންޑިއާއަށް ފޮނުވުމަށްފަހު 18ވަނަ ދުވަހު ވަނީ އަނބުރާ ރާއްޖެ ގެނެސްފައެވެ.
ގއ. ވިލިނގިލީ އަތޮޅު ހޮސްޕިޓަލުގެ މެނޭޖަރު ޝަރީފު އަހްމަދު ވިދާޅުވި ގޮތުގައި އުދައްޔު އެ ހޮސްޕިޓަލަށް ގެންދިޔަ އިރުވެސް އޮތީ މަރުވެފައެވެ. އޭނާގެ ބުރަކައްޓަށް ވަޅީން ގިނަ ހަމަލާތަކެއް ދިނުމުގެ ސަބަބުން ފުން ޒަހަމްތަކެއް ލިބިފައިވާ ކަމަަށާއި އެއް ތަނަކަށް އެތައް ފަހަރަކު ވަޅި ޖަހާފައި ވާ ކަމަށް ވެސް ޝަރީފް ވިދާޅުވިއެވެ.
