ކެމްޕެއިން ކުރުމަށް ހަމަހަމަ ފުރުސަތު ނެތް އިންތިޚާބެއް އިންސާފުވެރިވާނެ ހަމަ އެއްގޮތެއްވެސް ނޯންނާނެ: ސެމްބެ

ކެމްޕެއިން ކުރުމަށް ހަމަހަމަ ފުރުސަތު ނެތް އިންތިޚާބެއް އިންސާފުވެރިވާނެ ހަމަ އެއްގޮތެއް ވެސް ނޯންނާނެ ކަމަށް ރައްޔިތުންގެ މަޖިލީހުގެ ފަރެސްމާތޮޑާ ދާއިރާގެ މެމްބަރު ހުސެއިން މުހައްމަދު ލަތީފް (ސެމްބެ) ވިދާޅުވެއްޖެއެވެ.

Ads by Hajj Corporation

އަންނަ އޭޕްރިލް މަހުގެ 10 ވަނަ ދުވަހު ބޭއްވޭ ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ އިންތިޚާބަށް ކެމްޕެއިން ކުރުމުގެ މަސައްކަތް ޕާޓީތަކުންނާއި ކެންޑިޑޭޓުން ކުރަމުން އަންނައިރު، އެ އިންތިހާބުތަކަށް ކެމްޕެއިނު ކުރުމުގެ ހަމަހަމަ ފުރުސަތު ލިބިފައިނުވާ ކަމަށްބުނެ އިދިކޮޅު ފަރާތްތަކުން އަންނަނީ ކަންބޮޑުވުން ފާޅުކުރަމުންނެވެ.

މިކަމާ ގުޅޭގޮތުން މެމްބަރު ޙުސެއިން ވިދާޅުވީ، ސަރުކާރުން ދަނީ ލިބިފައިވާ ބާރުގެ ބޭނުން ނަހަމަ ގޮތުގައި ކުރަމުން ކަމަށާއި ކެމްޕެއިން ކުރުމަށް ހަމަހަމަ ފުރުސަތު ނެތް އިންތިޚާބެއް އިންސާފުވެރިވާނެ ހަމަ އެއްގޮތެއް ވެސް ނޯންނާނެ ކަމަށެވެ.

"ވާދަވެރި ފަރާތްތަކުގެ އަތްފައި ބަނދެލައި ކެމްޕެއިން ކުރަން ފުރުސަތުނުދީ، ސަރުކާރުން އެދަނީ ލިބިފައިވާ ބާރުގެ ބޭނުން ނަހަމަ ގޮތުގައި ކުރަމުން. ކެމްޕެއިން ކުރުމަށް ހަމަހަމަ ފުރުސަތު ނެތް އިންތިޚާބެއް އިންސާފުވެރިވާނެ ހަމަ އެއްގޮތެއް ވެސް ނޯންނާނެ." މެމްބަރު ޙުސެއިން ވިދާޅުވިއެވެ.

ޤާނޫނު ބުނާގޮތުން އިންތިޚާބު ބާއްވާ ތާރީހުގެ 28 ދުވަސް ކުރިން ހަމަހަމަ ކަމާއެކު ހުރިހާ ކެންޑިޑޭޓުންނަށާއި، ޕާޓީތަކަށް ކެމްޕެއިން ކުރުމުގެ ފުރުސަތު އިލެކްޝަން ކޮމިޝަނުން ފަހިކޮށްދޭން ޖެހެއެވެ. ނަމަވެސް އިދިކޮޅު ޕްރޮގްރެސިވް ކޯލިޝަނަށް އެފުރުސަތު ފަހިކޮށް ދީފައިނުވާކަމަށް ބުނެ ޝަކުވާ ހުށަހަޅާފައިވާ ކަމަށް އީސީން ވެސް ވަނީ ވިދާޅުވެފައެވެ.