ޒަމާނީ އިންޖީނުގެއެއްގެ އުންމީދު، ސްޓެލްކޯއިން އުކުޅަހަށް ވެސް ދީފި!

ހަތަރު މެގަވޮޓްގެ ކަރަންޓު އުފެއްދޭނެ، ޒަމާނީ އައު އިންޖީނުގެއެއްގެ ބިންގާ ސްޓޭޓް އިލެކްޓްރިކް ކޮމްޕެނީ (ސްޓެލްކޯ)އިން މިދިޔަ ހުކުރުދުވަހު އއ. އުކުޅަހުގައި އަޅައިފިއެވެ.
ސްޓެލްކޯއިން ބުނިގޮތުގައި މި އިންޖީނުގެ ވެގެންދާނީ އުކުޅަހަށް އަންނަމުންދާ ތަރައްގީގެ މުހިއްމު ބައިވެރިއަކަށެވެ.
އުކުޅަހަކީ ލޯކަލް ޓުއަރިޒަމްގެ ދާއިރާގައި ރާއްޖޭގެ އެންމެ ކުރީ ސަފުން ގުނާލެވޭ އެއް ރަށެވެ. އަދި އެރަށުގައި މިވަގުތުވެސް އެކި ފަންތީގެ އެކިފެންވަރުގެ ގެސްޓްހައުސްތައް އިމާރާތް ކުރުމުގެ މަސައްކަތް ދަނީ ކުރެވެމުންނެވެ. އެ ގެސްޓްހައުސްތަކަށް ބޭނުންވާ ކަރަންޓު ފޯރުކޮށްދިނުމަށާއި، ހިދުމަތް ދިނުމުގައި ދިމާވާ މައްސަލަތައް ހައްލު ކުރަން ބަލާއިރު، އުކުޅަހު އިންޖީނުގެއަކީ ނިސްބަތުން ވަރަށް ކުޑަ ތަނެއްކަން ސްޓެލްކޯއިން ވަނީ ފާހަގަ ކޮށްފައެވެ.
"މީގެ އިތުރުން މިވަގުތު ވެސް އުކުޅަހުގެ ވޯލްޓޭޖް ޑްރޮޕް ހައްލު ކުރުމަށްޓަކައި ކަރަންޓު ޑިސްޓްރިބިއުޝަން ވިއުގަ އަޕްގްރޭޑް ކުރުމުގެ މަސައްކަތް ދަނީ ކުރެވެމުން. އަދި ފެބްރުއަރީ މަހުގެ ތެރޭގައިވެސް އުކުޅަހަށް އިތުރު 600 ކިލޯވޮޓްގެ ޖަނަރޭޓަރެއް ވަނީ ގެންދެވިފައި. މިކަންކަން މިހެން ހުރުމާއެކު، އުކުޅަހަށް އަންނަ ތަރައްގީގެ އެންމެ މުހިންމު ބައިވެރިޔާގެ ހައިސިއްޔަތުން މިކުންފުނިން ނިންމާފައި މިވަނީ މުސްތަގުބަލުގައި އެރަށަށް އަންނާނެ ކުރިއެރުމާއި، ތަރައްގީއަށް އަދި ދުރު މުސްތަގުބަލަށް ވިސްނާ، އުކުޅަހުގައި މިހާރު ފޯރުކޮށްދެމުން މިގެންދާ 812 ކިލޯވޮޓްގެ އިންޖީނުގެ ގޭގެ ބަދަލުގައި 4 މެގަވޮޓްގެ ކަރަންޓު އުފެއްދޭނެ މުޅިން އައު އިންޖީނުގެއެއް އެޅުމަށް." ސްޓެލްކޯއިން ބުންޏެވެ.
<img class="alignnone wp-image-71610 size-full" src="https://cdn.dhen.mv/wp-content/uploads/2021/03/IMG-b85a2de7ebdb4d265e3b9a51cb73b53a-V.jpg" alt="" width="1280" height="853" />
މި އިންޖީނުގެ ވެގެންދާނީ ޒަމާނުއްސުރެ އިންޖީނުގެތަކާމެދު ދެކެމުން އައި ގޮތް ބަދަލު ކޮށްލާ، އުކުޅަހުގެ ރީތި ނަލަ ލޭންޑް މާކަކަށް ވެގެންދާނެ އިންޖީނުގެއަކަށް ކަމަށް ވެސް ސްޓެލްކޯއިން ބުނެއެވެ. އަދި މި އިންޖީނުގެއަކީ، އިތުރު ސަލާމަތީ ހިދުމަތްތަކާ، ވެންޓިލޭޝަން ރަނގަޅު އަދި އުސްކޮށް އިމާރާތް ކުރެވޭ ޒަމާނީ ފެންވަރު ރަނގަޅުތަނެއް ކަމަށް ވެސް ބުނެފައިވެއެވެ.
"މި އައު އިންޖީނުގެ ވެގެންދާނީ، އަޑު މަޑު، ތިމާވެއްޓާ ރައްޓެހި ތަނަކަށް. އެގޮތުން އިންޖީނުގެއަށް ބޭނުންވާ ކަރަންޓު އުފައްދައިދޭނީ އިންޖީނުގޭގައި ހަރުކުރާ ސޯލާ ޕެނަލްތަކުން." ސްޓެލްކޯއިން އިތުރަށް ބުނެފައިވެއެވެ.
އޮންލައިން މޮނިޓަރިންގ އާއި، ޓެކްނިކަލް ސަޕޯޓްގެ އިތުރުން، އުކުޅަހުގައި އެޅޭ އައު އިންޖީނުގެ ވެގެންދާނީ މުވައްޒަފުންނަށް ރައްކާތެރި މަސައްކަތުގެ މާހައުލަކަށް ކަމަށް ވެސް އެކުންފުނިން ބުނެއެވެ.
ސްޓެލްކޯގެ އުންމީދަކީ މި އައު އިންޖީނުގެއާއެކު، އުކުޅަހަށް އަންނަމުންދާ ތަރައްގީގައި އޮންނަ އެ ކުންފުނީގެ ހިއްސާ ވީހާވެސް ބޮޑުކޮށް، ރައްޔިތުންނަށް ފައިދާ ހުރި، ފަސޭހަ ހިދުމަތެއް ދިނުންކަން އެކުންފުނިން ފާހަގަ ކޮށްފައިވެއެވެ.



-1.webp)

ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.