ޗައިނާއިން ހަދިޔާކުރި ވެކްސިންގެ 2 ވަނަ ޝިޕްމަންޓް ރާއްޖެ ގެނެސްފި
ޗައިނާ ސަރުކާރުން ހަދިޔާ ކޮށްފައިވާ ސިނޮފާމް ވެކްސިނުގެ ދެވަނަ ޝިޕްމެންޓު ރާއްޖެ ގެނެސްފިއެވެ.
ރާއްޖެއަށް ޗައިނާއިން ވަނީ ސިނޯފާމުގެ ވެކްސިނުގެ 200،000 ޑޯޒް ހަދިޔާ ކޮށްފައެވެ. މިހާރު ރާއްޖޭގައި ޖަހަމުން އަންނަނީ ސިނޯފާމުގެ ވެކްސިނެވެ. އެއް ލައްކަ ޑޯޒް ރާއްޖެ ގެނެސްފައި ވަނީ މި މަހުގެ 24 ވަނަ ދުވަހުގެ ރެއެވެ.
ވެކްސިނުގެ ދެވަނަ ޝިޕްމެންޓު ރާއްޖެއަށް ގެނެސްފައި ވަނީ ޤައުމީ އެއާލައިންގެ މަތިންދާ ބޯޓެއްގައެވެ. ޗައިނާއިން ހަދިޔާކުރި ސިނޯފާމުގެ ވެކްސިނުގެ ފުރަތަމަ ޝިޕްމެންޓު ވެސް ރާއްޖެއަށް ގެނައީ މޯލްޑިވިއަންގެ މަތިންދާ ބޯޓެއްގައެވެ.
މިދިޔަ ފެބްރުއަރީ މަހުގެ 3 ވަނަ ދުވަހު، ހެޔޮ އެދޭ ފަރާތަކުން ވެސް ވަނީ ސިނޯފާމްގެ 5000 ޑޯޒް ރާއްޖެއަށް ހަދިޔާ ކޮށްފައެވެ.
ސިނޯފާމް ވެކްސިން ދިނުމަށް ރާއްޖެއިން ހުއްދަ ދިނީ މި މަހުގެ 14 ވަނަ ދުވަހުގައެވެ. އަދި ސިނޯފާމު ވެކްސިން ދޭން ފެށީ މި މަހުގެ 22 ވަނަ ދުވަހުއެވެ. މި ވެކްސިން ދެނީ އުމުރުން 18 އަހަރާއި 60 އަހަރާ ދެމެދުގެ މީހުންނަށެވެ.
މިހާތަނަށް މުޅި ރާއްޖެއިން ޖުމްލަ 233،875 މީހުންނަށް ވެކްސިން ދީފައި ވެއެވެ.
